Tarıhı qola júlde

Semserlesýden Grýzııanyń Tbılısı qalasynda ótken álem chempıonatynda Qazaqstannnyń namysyn qorǵaǵan tórt sańlaǵymyz qola júldeni jeńip alyp, álemdi aýzyna qaratty. Syn alańyna shyqqan Kırıll Prohodov, Rýslan Qurbanov, Vadım Sharlaımov pen Elmır Álimjanovtar tórttigi úshinshi oryn úshin básekede osy sport túrinde aldyna jan salmaı álemdik  reıtıngte úshinshi satyda kele jatqan Franııa quramasyn  tas-talqan etip jeńip, álem chempıonatynyń qola júldesine ıe boldy. Bul súıinshilep jarııa eter jańalyq aıtýly  sport túrinen  komandalyq saıysta Qazaqstan tarıhyndaǵy alǵashqy  súbeli jeńis dep qýana aıtamyz.

Bul eki eldiń arasyndaǵy teke-tires 2023 jyly ótken edi. Sol keskilesken shaıqasta Franııa sportshylarynyń baǵy janǵan. Bizdiń semser ustaǵan serkelerlimiz sol bir ketken eseni qaıtaryp jeńisti oljalap otyr.

Erler arasynda sapy baǵdarlamasy boıynsha ótken jekpe-jekte bizdiń jigitter Franııany 45:31 esebimen jeńip tize búkitirdi. Bul jeńis el tarıhyndaǵy altyn árippen jazyltyn aıtýly jeńis dep bilemiz. Buǵan deıin Mılanda ótken álem chempıonatynda jekeleı synda jerlesimiz Rýslan Qurbanov qola júldege qol jetkizgen bolatyn.

Qazaqstannyń namysyn qorǵaǵan elimizdiń bul tórttigi jarys jolynda  reseılik beıtarap komandany 45:35 esebimen jeńgen. Kelesi kezdesýlerinde  Qytaı quramasyn 38:37 esebimen jeńip, shırek fınalda qazirgi álem chempıondary Italııamen jolyǵady. Tartysqa toly ótken bul kezdesýde qazaqstandyq semsershiler  álem chempıony degen ataǵyna qaramaı Italııany 45:43 esebimen jeńip, jartylaı fınalǵa joldama alady.

Jartylaı fınalda Japonııaǵa 41:42 esebimen jol berip úshinshi oryn úshin ótetin jekpe-jekke bar kúshterin sarqyp salýǵa shyǵady.  Al úshinshi oryn úshin ótkizgen básekede el namysyn abyroımen qorǵaǵan noıandarymyz aıdy aspanǵa shyǵaryp, Olımpıadanyń 1908, 1924, 1932, 1948, 1980, 1988, 2004, 2008 jáne 2016 jyldardaǵy chempıony, osy sport túrinde álem kóshin bastap turǵan Franııa quramasyn  dármensiz jaǵdaıǵa qaldyryp jeńisti julyp alady.

«Uıada ne kórseń ushqanda sony ilesiń», degen eken babalarymyz. Osyndaı ǵalamat jeńiske jetýi ósken ortasy men daıyndalyp shyqqan jattyǵý oryndarynyń úlesi zor ekeninde aıtqanymyz durys bolar. Olımpıada chempıony Eldos Smetov, Olımpıadanyń kúmis júldegeri Ashat Jıtkeev syndy sańlaqtardy tárbıelep shyǵaryp otyrǵan Almaty qalasyndaǵy Kárken Ahmetov atyndaǵy Olımpıada rezervi respýblıkalyq mamandandyrylǵan mektep-ınternat-kolledjinen qanat qaǵyp ushyp jatqan áıgili sportshylar az emes. Sondaı-aq, semserlasý sportynan bul mektep-ınternattan ósip óngen Elmır Álimjanov halyqarlyq, álemdik jarystarda qanjyǵasy maılanyp, el namysyn abyroımen qorǵap keledi.

Semserlesý sportynan 2 dúrkin Olımpıada chempıony, 3 dúrkin Olımpıada oıyndarynyń kúmis júldegeri 8 dúrkin álem chempıony, 16 dúrkin Eýropa chempıony aty ańyzǵa aınalǵan sańlaq sportshy Sofıa Velıkaıa da aıtýly mektep-ınternattyń túlegi.  Osy bir ustahana ispettes mektep-ınternattyń búgingi kúngi maqtanshtarymyz qos birdeı túlegi  Elmır Álimjanov pen Kırıll Prohodovtar osy álem chempıonatynan tarıhı el qorjynyna qola júldeni salyp berip otyrǵan sańlaqtarymyz. Sondyqtan da bul jer qazaq sportynyń maıtalmandaryn tárbıelep shyǵaryp otyrǵan qasıetti qarashańyraq dese bolǵandaı.

Sonymen birge osy tórttiktiń arasyndaǵy Rýslan Qurbanovtyń sheberligine súısine qol soǵa ketken oryndy bolar. Bul semsershi álem jarystarynda eki márte qola júldeni jeńip alyp otyr. Onyń biri jekeleı bolsa ekinshisi komandalyq synda. Elge oralǵan soń bizdiń qazaqy dástúrmen shashý shashyp qarsy alarymyz belgili. Sol qurmet marapattardyń arasynda  Rýslanǵa eńbegi sińgen sportshy sheberi  ataǵy berilip jatsa artyq bolmas edi. Iá, ony sport tizginin ustaǵan Mınıstrlik qaperinde ustaıtyn shyǵar degen  senim bar. Endi osy el namysyn álem jarysynda abyroımen qorǵan kelgen sańlaqtarymyz osy qarqynmen aldaǵy Olımpıada asýyn altyn júldemen baǵyndyrar degen úmitti arqaý etemiz.

Aqyn ORDABAIULY,

ALMATY