قىسقى ازيادا: 85 سپورتشى مەن 32 جاتتىقتىرۋشىعا قارجىلاي سىياقى بەرىلدى

مەملەكەت باسشىسىنىڭ حالىقارالىق ارەنادا ۇزدىك ناتيجە كورسەتكەن سپورتشىلاردى ىنتالاندىرۋ تۋرالى تاپسىرماسىنا سايكەس، قىتايدىڭ حاربين قالاسىندا وتكەن IX قىسقى ازيا ويىندارىندا ۇزدىك اتانعان وتاندىق سپورتشىلاردى قولداۋ ماقساتىندا ۇكىمەت قاۋلىسىمەن 372،6 ميلليون تەڭگە ءبولىندى. قارجىلاي سىياقى ازيا ويىندارىندا ۇزدىك 85 سپورتشى مەن 32 جاتتىقتىرۋشىعا بەرىلدى. بۇل تۋرالى تۋريزم جانە سپورت مينيسترلىگى حابارلادى.

قىتايداعى اق ازيادادا وتانداستارىمىز 4 التىن، 9 كۇمىس جانە 7 قولا مەدال جەڭىپ الىپ، جالپىكوماندالىق ەسەپتە 34 ەلدىڭ ىشىندە 4-ورىنعا تۇراقتاعان ەدى. ەل قورجىنىنا التىن جۇلدەلەردى بياتلوننان جەكەلەي سىندا ونەر كورسەتكەن ۆلاديسلاۆ كيرەەۆ، فريستايل-اكروباتيكاداعى سينحروندى سەكىرۋ جۇبى، شورت-ترەك سپورتىنان 5000 مەترلىك ەستافەتا كومانداسى جانە شايبالى حوككەيدەن ەرلەر قۇراماسى سالدى.

مينيسترلىكتىڭ حابارلاۋىنشا، جەڭىمپازدار مەن جۇلدەگەرلەردى ماراپاتتاۋ – مەملەكەت باسشىسىنىڭ تاپسىرماسى اياسىندا جۇزەگە اسىرىلىپ جاتقان سپورتتى دامىتۋعا باعىتتالعان مەملەكەتتىك ساياساتتىڭ ءبىر بولىگى. كەيىنگى 6 جىلدا ەلىمىزدە 314 دەنە شىنىقتىرۋ جانە ساۋىقتىرۋ كەشەنى مەن 58 ءجۇزۋ باسسەينى سالىندى. ناتيجەسىندە دەنە شىنىقتىرۋمەن جۇيەلى تۇردە اينالىساتىن حالىقتىڭ ۇلەسى 31،5 پايىزدان (5،9 ملن ادام) 41،4 پايىزعا (8،4 ملن ادام) دەيىن ارتتى. سپورت ينفراقۇرىلىمىن دامىتۋ – ۇلت دەنساۋلىعىن نىعايتۋعا، سىرقاتتىڭ الدىن الۋعا، الەۋمەتتىك وسال توپتاردىڭ ۇلەسىن ازايتۋعا جانە حالىقتىڭ ءومىر ءسۇرۋ ساپاسىن ارتتىرۋعا باعىتتالعان ماڭىزدى ينۆەستيتسيا.

سونىمەن قاتار ەلىمىزدە بالالار مەن جاسوسپىرىمدەر سپورتىن دامىتۋعا ەرەكشە كوڭىل ءبولىنىپ كەلەدى. 2021 جىلى پرەزيدەنت تاپسىرماسىنا سايكەس سپورت ۇيىرمەلەرىن جان باسىنا قارجىلاندىرۋ تەتىگى ەنگىزىلدى. قازىرگى تاڭدا ەل بويىنشا 4 پەن 17 جاس ارالىعىنداعى 250 مىڭنان استام بالا 7 مىڭنان اسا سپورت ۇيىرمەسىندە تۇراقتى تۇردە جاتتىعادى. كەيىنگى بەس جىلدا ەلىمىزدەگى بالالار مەن جاسوسپىرىمدەر سپورت مەكتەپتەرىنىڭ سانى 481-دەن 521-گە، ال سپورتتىق دايارلىقپەن قامتىلعان بالالار سانى 357 مىڭنان 406 مىڭعا ءوستى، — دەلىنگەن حابارلامادا.

وسىنداي كەشەندى ءارى جۇيەلى جۇمىس مەملەكەتتىڭ سپورت ارقىلى دەنى ساۋ، بەلسەندى ءارى باسەكەگە قابىلەتتى ۇلت قالىپتاستىرۋعا باعىتتالعان ستراتەگيالىق ۇستانىمىن ايقىن كورسەتەدى. سپورت – ءار ازاماتتىڭ ومىرىندە ماڭىزدى ورىن الۋعا ءتيىس.