تۋريزم جانە سپورت ءمينيسترى ەربول مىرزابوسىنوۆ تاەكۆوندودان XXXII جازعى ۋنيۆەرسيادا مەن جاسوسپىرىمدەر اراسىنداعى ازيا چەمپيوندارى مەن وسى جارىستاردىڭ جۇلدەگەرلەرىمەن كەزدەستى. وعان حالىقارالىق تاەكۆوندو فەدەراتسياسىنىڭ (WT) پرەزيدەنتى چۋنگۆون چوۋ، قازاقستان تاەكۆوندو فەدەراتسياسىنىڭ پرەزيدەنتى قۇدىرەت شاميەۆ، جاتتىقتىرۋشىلار مەن جاس سپورتشىلار قاتىستى، دەپ حابارلادى تۋريزم جانە سپورت مينيسترلىگى.
جيىندا مينيستر دوكتور چوۋعا تاەكۆوندونى الەمدىك دەڭگەيدە دامىتۋعا قوسقان ۇلەسى ءۇشىن العىس ايتتى.
ەربول مىرزابوسىنوۆ حالىقارالىق جارىستاردىڭ جەڭىمپازدارى مەن جۇلدەگەرلەرىن قۇتتىقتاپ، ولاردىڭ جەتىستىكتەرى بۇكىل ەل ءۇشىن ماقتانىش ەكەنىن اتاپ ءوتتى. گەرمانيادا وتكەن XXXII جازعى ۋنيۆەرسيادادا ساميرحون اباباكيروۆ التىن مەدال جەڭىپ السا، مالايزيادا جالاۋى جەلبىرەگەن جاسوسپىرىمدەر اراسىنداعى ازيا چەمپيوناتىندا ايىم سەرىكباەۆا، بۋنەد باحرامقۇلوۆ پەن ارۋجان نايمانباەۆا توپ جاردى.
سارى قۇرلىق دوداسىندا ەرەكشە كوزگە تۇسكەن ايىم سەرىكباەۆا ءتۋرنيردىڭ ۇزدىك سپورتشىسى اتانسا، ونىڭ جەكە جاتتىقتىرۋشىسى ەركەبۇلان ەرمەكاليەۆ سپورتشىنى دايىنداعانى ءۇشىن العىس حاتپەن ماراپاتتالدى.
سونداي-اق مينيستر ۇلتتىق قۇراما كوماندانىڭ باس جاتتىقتىرۋشىسى ەسبول سۇلتانوۆقا وتاندىق تاەكۆوندونى دامىتۋعا قوسقان ەلەۋلى ۇلەسى جانە كوماندامەن تابىستى جۇمىسى ءۇشىن العىس ايتتى.
بۇگىندە مەملەكەت سىزدەردىڭ جوعارى جەتىستىككە جەتىپ، شەبەرلىكتەرىڭىزدى شىڭداۋعا بارلىق جاعداي جاساپ وتىر. ارقايسىڭىزبەن جەكە جۇمىس ىستەيتىن جاتتىقتىرۋشىلارىڭىز بار.
بۇگىنگى جەتىستىكتەر – كوپ جىلدىق ەڭبەكتىڭ، جۇيەلى دايىندىقتىڭ جانە ءوز ىسىنە ادالدىقتىڭ ناتيجەسى. سىزدەر الەمدىك ارەنادا ەل نامىسىن ابىرويمەن قورعاپ، ەلىمىزدى بۇكىل الەمگە تانىتىپ جۇرسىزدەر، – دەدى مينيستر.
سپورتشىلارعا قۇرمەت گراموتالارى، العىس حاتتار مەن فەدەراتسيا اتىنان سەرتيفيكاتتار تابىس ەتىلدى.
14-16 تامىز كۇندەرى استاناداعى جاقسىلىق ۇشكەمپىروۆ اتىنداعى جەكپە-جەك سارايىندا تاەكۆوندودان Kazakhstan Open 2025 حالىقارالىق رەيتينگتىك ءتۋرنيرى بولادى.
دوداعا الەمنىڭ 22 ەلىنەن 750-دەن استام سپورتشى قاتىسادى دەپ جوسپارلانىپ وتىر. ولاردىڭ قاتارىندا وليمپيادا چەمپيوندارى، الەم چەمپيوناتتارىنىڭ جۇلدەگەرلەرى جانە الەمدىك رەيتينگتىڭ كوشباسشىلارى بار. جارىس كادەتتەر، جاسوسپىرىمدەر مەن ەرەسەكتەر اراسىندا بولادى.