SportPress.kz قازاقستان سپورت جاڭالىقتارى
الماتىدا امبروزيانىڭ گۇلدەۋىنە بايلانىستى ماۋسىمدىق اللەرگيا ءورشىپ تۇر. ادەتتە ول شىلدەنىڭ سوڭى مەن قازان ايىنىڭ ارالىعىندا بايقالادى، تامىز-قىركۇيەكتە شارىقتاۋ شەگىنە جەتەدى. امبروزيا ەڭ كۇشتى اللەرگەندەردىڭ ءبىرى سانالادى. اللەرگيانىڭ بەلگىلەرى: مۇرىننان سۋ اعۋ، بىتەلۋ، تۇشكىرۋ، كوزدىڭ قىشۋى مەن قىزارۋى، تەرى بورتپەلەرى، سونداي-اق برونح دەمىكپەسىنىڭ اسقىنۋى مۇمكىن. اۋرۋدى جەڭىلدەتۋ جولدارى تۋرالى «وق-جەتپەس» «الماتى» ەمدەۋ-ساۋىقتىرۋ كەشەنىنىڭ تەراپەۆت دارىگەرى جانىبەك زەينالعابدى ايتىپ بەردى.
– جانىبەك قانىش ۇلى، قانداي الدىن الۋ شارالارىن ۇسىناسىز؟
– ەگەر سىزدە امبروزياعا اللەرگيا بار دەگەن كۇدىك بولسا، اللەرگولوگ-دارىگەرگە قارالىڭىز. ول دياگنوزدى ناقتىلاپ، قاجەتتى ەمدى تاعايىندايدى. ەڭ قاراپايىم جول – اللەرگەنمەن بايلانىسۋدى ازايتۋ. امبروزيا گۇلدەۋ كەزەڭىندە تاڭەرتەڭگى ۋاقىتتا دالادا كوپ جۇرمەۋگە تىرىسىڭىز، سەبەبى ءدال وسى كەزدە توزاڭ كونتسەنتراتسياسى ەڭ جوعارى بولادى. سونداي-اق امبروزيا توزاڭىمەن ايقاسپالى رەاكتسيا تۋدىرۋى مۇمكىن ونىمدەردى (قاربىز، قاۋىن، بانان جانە ت.ب.) راتسيوننان الىپ تاستاعان دۇرىس. ءوز بەتىڭىزشە ەمدەلمەي، مامانعا جۇگىنىڭىز. دارىگەر بەلگىلەگەن انتيگيستاميندىك پرەپاراتتار سيمپتومداردى جەڭىلدەتۋگە كومەكتەسەدى.
– مۇنداي جاعدايدا شيپاجايداعى ەم قالاي كومەكتەسەدى؟
– شيپاجايدا ءبىز اعزانىڭ سەزىمتالدىعىن تومەندەتىپ، يممۋنيتەتتى نىعايتۋعا باعىتتالعان كەشەندى ەم-شارالاردى قولدانامىز. مىسالى، مينەرالدى سۋمەن ينگالياتسيا تىنىس الۋدى جەڭىلدەتەدى. فيزيوتەراپيا (ماگنيتوتەراپيا، لازەروتەراپيا) قابىنۋدى باسىپ، شىرىشتى قابىقتىڭ ءىسىنۋىن ازايتادى. وتتەكتى جانە فيتوۆاننالار سترەسستى تومەندەتىپ، تىنىس الۋ جۇيەسىنىڭ جۇمىسىن قالىپقا كەلتىرەدى. تۇزدى بولمە (گالوتەراپيا) تىنىس جولدارىن تازارتىپ، اللەرگيالىق بەلگىلەردى جەڭىلدەتەدى.
– دەمەك، شيپاجايداعى دەمالىس تەك جايلى ۋاقىت وتكىزۋ عانا ەمەس، ماۋسىمدىق اللەرگيا كەزىندە ناقتى كومەك دەۋگە بولا ما؟
– ءۇي جاعدايىنداعى ەمنەن ايىرماشىلىعى، مۇندا ءبىز ءار ادامعا جەكە بەيىمدەلگەن ەمدىك شارالار كەشەنىن ۇسىنامىز. ول سيمپتومداردى جەڭىلدەتىپ، گۇلدەنۋ ماۋسىمىن اۋىر اسقىنۋسىز وتكىزۋگە كومەكتەسەدى.
—اڭگىمەڭىزگە راحمەت!
اڭگىمەلەسكەن نۇرلان قۇمار،
الماتى
