تۇركىستان وبلىسىنىڭ اكىمى دە سپورتشىلارعا اۆتوكولىك تابىس ەتتى

تۇركىستان وبلىسىنىڭ سپورتشىلارى بيىلعى جىلدىڭ 9 ايىندا قازاقستان چەمپيوناتتارىندا – 1060 مەدال، ازيا چەمپيوناتتارىندا – 109 جۇلدە، الەم چەمپيوناتتارىندا 79 مەدال جەڭىپ الدى.

بۇگىن سولاردىڭ بىرقاتارىن تۇركىستان وبلىسىنىڭ اكىمى نۇرالحان كوشەروۆ ارنايى ماراپاتتاپ، قۇرمەت كورسەتتى. بەكزات ساتتارحانوۆ اتىنداعى سپورت كەشەنىندە وتكەن كەزدەسۋدە جۋىردا ەركىن كۇرەستەن جانە ارمرەستلينگتەن الەم چەمپيوناتىندا ەل سەنىمىن اقتاعان سپورتشىلار ماراپاتتالدى.

– سىزدەردى ەركىن كۇرەس پەن ارمرەستلينگتەن وتكەن الەم چەمپيوناتىنداعى تاريحي جەڭىسپەن شىن جۇرەكتەن قۇتتىقتايمىن! بۇل جەڭىستەر – ۇلكەن ەڭبەكتىڭ، قايسار مىنەزدىڭ ناتيجەسى. الەمدىك ارەنادا تۇركىستان وبلىسىنىڭ سپورتشىلارى  توپ جارعانى ءبىز ءۇشىن ۇلكەن ماقتانىش. سىزدەرگە وبلىس حالقىنىڭ جانە ءوزىمنىڭ اتىمنان شىنايى العىسىمدى بىلدىرەمىن. مەملەكەت باسشىسى قاسىم-جومارت كەمەل ۇلى توقاەۆ سپورت سالاسىن دامىتۋ جونىندە ناقتى تاپسىرمالار بەردى.

وبلىستا وسى باعىتتا اۋقىمدى جۇمىس ءجۇرىپ جاتىر. زاماناۋي سپورت نىساندارى اشىلىپ، ءوز ناتيجەسىن بەرۋدە. ماسەلەن، حورۆاتيادا وتكەن الەم چەمپيوناتىندا اسىلجان ەسەنگەلدى  باۋىرىمىز قولا جۇلدەگەرى اتاندى. بۇل جەڭىستىڭ ورنى ايرىقشا.  سەبەبى، وبلىس ورتالىعى اۋىسىپ، تۇركىستان وبلىسى دەپ اتالعالى بەرى ەركىن كۇرەستەن العاش رەت ەرەسەكتەر اراسىندا قولا مەدال يەگەرى شىعىپ وتىر. الەمگە ايگىلى شاردارانىڭ ارمرەستلينگ مەكتەبى تاعى دا سەنىمدى اقتادى.

ارمرەستلينگتەن بولگاريا ەلىنىڭ البەنا قالاسىندا وتكەن 46-شى الەم چەمپيوناتىندا  وبلىسىمىزدان 19 سپورتشى الەم چەمپيونى اتاندى. شىن جۇرەكتەن قۇتتىقتايمىن! بۇگىندە قازاقستان، سونىڭ ىشىندە ناقتى تۇركىستان وبلىسىنىڭ ورەندەرى ارمرەستلينگتەن الەمدىك دەڭگەيدە كوش باستاپ تۇر. بۇل ناتيجەلەر – وڭىردە سپورت ينفراقۇرىلىمىن دامىتۋ، دارىندى سپورتشىلاردى قولداۋ باعىتىنداعى جۇيەلى جۇمىستىڭ جەمىسى. ەندىگى ماقساتىمىز – وليمپيادا مەدالىن الۋ. ءبىزدىڭ باتىرلارىمىز ءۇمىتتى اقتايدى دەپ سەنەمىن! – دەدى نۇرالحان كوشەروۆ.

سالتاناتتى ءىس-شارادا نۇرالحان كوشەروۆ حورۆاتيادا وتكەن الەم چەمپيوناتىندا قولا جۇلدەگەر اتانعان اسىلجان ەسەنگەلدىگە جاڭا كولىكتىڭ كىلتىن تاپسىردى. سونىمەن بىرگە ارمرەستلينگتەن الەمنىڭ بىرنەشە دۇركىن چەمپيونى اتانىپ، ەل ابىرويىن اسىرىپ جۇرگەن سانجار زارۋبەككە، نۇرداۋلەت ايدارحانعا جانە ەرداۋلەت مۇحامبەتوۆكە دە العىس حات پەن «تەمىر تۇلپار» كىلتتەرى تاپسىرىلدى. ال ارمرەستلينگ قۇراماسىنا 10 ميلليون تەگەنىڭ سەرتيفيكاتى بەرىلدى. جالپى، 24 سپورتشى مەن باپكەر العىس حاتپەن ماراپاتتالدى.

زاگرەبتە وتكەن الەم چەمپيوناتىندا تۇركىستان وبلىسىنىڭ ورەنى اسىلجان ەسەنگەلدى 61 كەلى سالماق دارەجەسىندە قولا جۇلدە جەڭىپ الدى. بۇل سپورتشى جاستار اراسىنداعى الەم چەمپيوناتتارىندا دا كۇمىس جانە قولا جۇلدەگەر اتانعان. وبلىس اۋماعىندا ەركىن، گرەك-ريم جانە ايەلدەر كۇرەسىن دامىتۋ باعىتىندا اۋقىمدى جۇمىستار جۇرگىزىلۋدە. بۇگىندە 5500-دەن استام سپورتشى اتالعان سپورت تۇرلەرىمەن تۇراقتى تۇردە اينالىسادى. ولاردى 260 جاتتىقتىرۋشى دايىنداۋدا. قازىرگى تاڭدا 34 سپورت ۇيىمىندا كۇرەس ۇيىرمەلەرى بار.

ارمرەستلينگتەن بولگاريا ەلىنىڭ البەنا قالاسىندا وتكەن 46-شى الەم چەمپيوناتىندا  تۇركىستان وبلىسىنىڭ  19 سپورتشىسى الەم چەمپيونى اتاندى. ارمرەستلينگتەن وبلىس سايىپقىراندارى ازيا چەمپيوناتتارىندا 350 التىن ەنشىلەگەن. ال الەم چەمپيوناتتارىندا 113 التىن مەدال يەلەنىپ، قازاقستاننىڭ ءانۇرانىن شارىقتاتقان.