SportPress.kz Qazaqstan sport jańalyqtary
Túrkistan oblysynyń sportshylary bıylǵy jyldyń 9 aıynda Qazaqstan chempıonattarynda – 1060 medal, Azııa chempıonattarynda – 109 júlde, álem chempıonattarynda 79 medal jeńip aldy.
Búgin solardyń birqataryn Túrkistan oblysynyń ákimi Nuralhan Kósherov arnaıy marapattap, qurmet kórsetti. Bekzat Sattarhanov atyndaǵy sport kesheninde ótken kezdesýde jýyrda erkin kúresten jáne armrestlıngten álem chempıonatynda el senimin aqtaǵan sportshylar marapattaldy.
– Sizderdi erkin kúres pen armrestlıngten ótken álem chempıonatyndaǵy tarıhı jeńispen shyn júrekten quttyqtaımyn! Bul jeńister – úlken eńbektiń, qaısar minezdiń nátıjesi. Álemdik arenada Túrkistan oblysynyń sportshylary top jarǵany biz úshin úlken maqtanysh. Sizderge oblys halqynyń jáne ózimniń atymnan shynaıy alǵysymdy bildiremin. Memleket basshysy Qasym-Jomart Kemeluly Toqaev sport salasyn damytý jóninde naqty tapsyrmalar berdi.
Oblysta osy baǵytta aýqymdy jumys júrip jatyr. Zamanaýı sport nysandary ashylyp, óz nátıjesin berýde. Máselen, Horvatııada ótken álem chempıonatynda Asyljan Esengeldi baýyrymyz qola júldegeri atandy. Bul jeńistiń orny aıryqsha. Sebebi, oblys ortalyǵy aýysyp, Túrkistan oblysy dep atalǵaly beri erkin kúresten alǵash ret eresekter arasynda qola medal ıegeri shyǵyp otyr. Álemge áıgili Shardaranyń armrestlıng mektebi taǵy da senimdi aqtady.
Armrestlıngten Bolgarııa eliniń Albena qalasynda ótken 46-shy álem chempıonatynda oblysymyzdan 19 sportshy álem chempıony atandy. Shyn júrekten quttyqtaımyn! Búginde Qazaqstan, sonyń ishinde naqty Túrkistan oblysynyń órenderi armrestlıngten álemdik deńgeıde kósh bastap tur. Bul nátıjeler – óńirde sport ınfraqurylymyn damytý, daryndy sportshylardy qoldaý baǵytyndaǵy júıeli jumystyń jemisi. Endigi maqsatymyz – Olımpıada medalin alý. Bizdiń batyrlarymyz úmitti aqtaıdy dep senemin! – dedi Nuralhan Kósherov.
Saltanatty is-sharada Nuralhan Kósherov Horvatııada ótken álem chempıonatynda qola júldeger atanǵan Asyljan Esengeldige jańa kóliktiń kiltin tapsyrdy. Sonymen birge armrestlıngten álemniń birneshe dúrkin chempıony atanyp, el abyroıyn asyryp júrgen Sanjar Zárýbekke, Nurdáýlet Aıdarhanǵa jáne Erdáýlet Muhambetovke de alǵys hat pen «temir tulpar» kiltteri tapsyryldy. Al armrestlıng quramasyna 10 mıllıon tegeniń sertıfıkaty berildi. Jalpy, 24 sportshy men bapker alǵys hatpen marapattaldy.
Zagrebte ótken álem chempıonatynda Túrkistan oblysynyń óreni Asyljan Esengeldi 61 keli salmaq dárejesinde qola júlde jeńip aldy. Bul sportshy jastar arasyndaǵy álem chempıonattarynda da kúmis jáne qola júldeger atanǵan. Oblys aýmaǵynda erkin, grek-rım jáne áıelder kúresin damytý baǵytynda aýqymdy jumystar júrgizilýde. Búginde 5500-den astam sportshy atalǵan sport túrlerimen turaqty túrde aınalysady. Olardy 260 jattyqtyrýshy daıyndaýda. Qazirgi tańda 34 sport uıymynda kúres úıirmeleri bar.
Armrestlıngten Bolgarııa eliniń Albena qalasynda ótken 46-shy álem chempıonatynda Túrkistan oblysynyń 19 sportshysy álem chempıony atandy. Armrestlıngten oblys saıypqyrandary Azııa chempıonattarynda 350 altyn enshilegen. Al álem chempıonattarynda 113 altyn medal ıelenip, Qazaqstannyń Ánuranyn sharyqtatqan.
