«قايرات» پەن «پافوس» تەڭ ەسەپپەن تارقاستى

الماتىدا چەمپيوندار ليگاسىنىڭ جالپى كەزەڭىندەگى ءۇشىنشى تۋر اياسىندا «قايرات» پەن كيپردىڭ «پافوس» فۋتبول كلۋبتارى وينادى.

بۇل ماتچتا گول سوعىلعان جوق. ويىن تەڭ اياقتالىپ، ەسەپ 0:0 بولىپ تىركەلدى. ويىندا كوماندالاردىڭ گول سالۋعا مۇمكىندىكتەرى بىردەي بولدى. دەسە دە قارسىلاستار سوڭعى ساتتە تەڭبىل دوپتى تورعا توعىتا الماي جاتتى. جالپى، كوماندالار جاقسى ويىن ورنەگىن كورسەتتى. «قايراتتىڭ» قاقپاشىسى تەمىرلان اناربەك بىرنەشە سەيۆ جاساپ، كومانداسىن گولداردان قۇتقارىپ وتىردى. «پافوستىڭ» قاقپاشىسى دا كەرەمەت ويىن ۇلگىسىن كورسەتە ءبىلدى.

قىسقاسى، بۇل ماتچتى قاقپاشىلاردىڭ ويىنى دەۋگە بولادى.

ءبىرىنشى تۋردا «قايرات» سىرت الاڭدا پورتۋگاليانىڭ «سپورتينگ» كلۋبىنان 1:4 ەسەبىمەن، ال ەكىنشى تۋردا الماتىدا ءمادريدتىڭ «رەالىنان» بەس گول جىبەرىپ، ءىرى ەسەپپەن جەڭىلگەن ەدى.

كيپردىڭ «پافوسى» ءبىرىنشى تۋردا گرەكيانىڭ «وليمپياكوسىمەن» 0:0 ەسەبىمەن تەڭ ويناپ، ەكىنشى تۋردا ءوز الاڭىندا گەرمانيانىڭ «باۆارياسىنا» 1:5 ەسەبىمەن ەسە جىبەردى.

الماتىنىڭ كومانداسى كەلەسى كەزەڭدەردە «ينتەر» (يتاليا)، «كوپەنگاگەن» (دانيا)، «وليمپياكوس» (گرەكيا)، «بريۋگگە» (بەلگيا) جانە «ارسەنالمەن» (انگليا) وينايدى.

چەمپيوندار ليگاسىنىڭ توپتىق كەزەڭىنە بارلىعى 36 كوماندا قاتىسادى.

تۋرنير 16 قىركۇيەكتە باستالدى. سوڭعى — سەگىزىنشى تۋر 2026 جىلعى 28 قاڭتاردا بولادى. پلەي-وفف كەزەڭى 16-18 اقپان ارالىعىندا باستالىپ، 1/8 فينال 10-11 ناۋرىزدا، شيرەك فينال 7-8 ساۋىردە، جارتىلاي فينال 28-29 ساۋىردە وتەدى. فينالدىق ماتچ 30 مامىرعا جوسپارلانعان.

داستان كەنجالين،

استانا