«Qaırat» pen «Pafos» teń eseppen tarqasty

Almatyda Chempıondar lıgasynyń jalpy kezeńindegi úshinshi týr aıasynda «Qaırat» pen Kıprdiń «Pafos» fýtbol klýbtary oınady.

Bul matchta gol soǵylǵan joq. Oıyn teń aıaqtalyp, esep 0:0 bolyp tirkeldi. Oıynda komandalardyń gol salýǵa múmkindikteri birdeı boldy. Dese de qarsylastar sońǵy sátte teńbil dopty torǵa toǵyta almaı jatty. Jalpy, komandalar jaqsy oıyn órnegin kórsetti. «Qaırattyń» qaqpashysy Temirlan Anarbek birneshe seıv jasap, komandasyn goldardan qutqaryp otyrdy. «Pafostyń» qaqpashysy da keremet oıyn úlgisin kórsete bildi.

Qysqasy, bul matchty qaqpashylardyń oıyny deýge bolady.

Birinshi týrda «Qaırat» syrt alańda Portýgalııanyń «Sportıng» klýbynan 1:4 esebimen, al ekinshi týrda Almatyda Madrıdtiń «Realynan» bes gol jiberip, iri eseppen jeńilgen edi.

Kıprdiń «Pafosy» birinshi týrda Grekııanyń «Olımpıakosymen» 0:0 esebimen teń oınap, ekinshi týrda óz alańynda Germanııanyń «Bavarııasyna» 1:5 esebimen ese jiberdi.

Almatynyń komandasy kelesi kezeńderde «Inter» (Italııa), «Kopengagen» (Danııa), «Olımpıakos» (Grekııa), «Brıýgge» (Belgııa) jáne «Arsenalmen» (Anglııa) oınaıdy.

Chempıondar lıgasynyń toptyq kezeńine barlyǵy 36 komanda qatysady.

Týrnır 16 qyrkúıekte bastaldy. Sońǵy — segizinshi týr 2026 jylǵy 28 qańtarda bolady. Pleı-off kezeńi 16-18 aqpan aralyǵynda bastalyp, 1/8 fınal 10-11 naýryzda, shırek fınal 7-8 sáýirde, jartylaı fınal 28-29 sáýirde ótedi. Fınaldyq match 30 mamyrǵa josparlanǵan.

Dastan KENJALIN,

ASTANA