تۇركىستان تورىندە ءتول كۇرەسىمىزدەن الەم كۋبوگى باستالدى

تۇركىستان قالاسىندا قازاق دالاسىنىڭ داڭقتى باتىرى، كۇش اتاسى قاجىمۇقان مۇڭايتپاس ۇلىنىڭ جۇلدەسىنە ارنالعان قازاق كۇرەسىنەن ەرەسەكتەر اراسىنداعى الەم كۋبوگى سالتاناتتى تۇردە باستالدى، دەپ حابارلادى تۇركىستان وبلىسى اكىمىنىڭ ءباسپاسوز قىزمەتى.

ءتول سپورتىمىزدىڭ مارتەبەسىن ارتتىرۋدى ماقسات ەتكەن حالىقارالىق دودانىڭ اشىلۋ راسىمىنە تۇركىستان وبلىستىق ءماسليحات توراعاسى نۇرالى ءابىشوۆ، Qazaq Kuresi قاۋىمداستىعىنىڭ باس ديرەكتورى دامير بەكبوسىنوۆ جانە تۇركىستان وبلىسى اكىمىنىڭ ورىنباسارى ەرتاي التاەۆ قاتىسىپ، سپورتشىلارعا ساتتىلىك تىلەپ، جىلى لەبىزدەرىن ءبىلدىردى.

– تۇركى الەمىنىڭ رۋحاني استاناسى – قاسيەتتى تۇركىستانعا قوش كەلدىڭىزدەر! بۇگىن قازاق كۇرەسىنەن ۇلت ماقتانىشى، كۇش اتاسى قاجىمۇقان مۇڭايتپاس ۇلى اتىنداعى الەم كۋبوگى ءوتىپ جاتىر. قازاق كۇرەسى – ۇلتتىق سپورت تۇرلەرىنىڭ ىشىندە ايرىقشا رۋح پەن قايسارلىقتى دارىپتەيتىن ءتول ونەرىمىز. بۇگىندە الەمنىڭ 40-تان اسا ەلىندە قازاق كۇرەسىنىڭ فەدەراتسيالارى قۇرىلىپ، جۇيەلى جۇمىس اتقارىلۋدا. سوڭعى جىلدارى الەم، ازيا، افريكا جانە ەۋروپا چەمپيوناتتارى تۇراقتى وتكىزىلىپ، قازاق كۇرەسى جاڭا دەڭگەيگە كوتەرىلدى. سونداي-اق ەلىمىزدە جوعارى دارەجەدە ۇيىمداستىرىلىپ كەلە جاتقان «تۇران بارىسى»، «قازاقستان بارىسى»، «ەۋرازيا بارىسى» جانە «الەم بارىسى» سىندى تۋرنيرلەر حالىقتىڭ زور قىزىعۋشىلىعىنا يە. كۇنى كەشە قازاق كۇرەسىنەن ەرەسەكتەر اراسىنداعى ازيا چەمپيوناتى ءساتتى اياقتالدى. بۇگىندە تۇركىستان قالاسى قازاق كۇرەسىنىڭ حالىقارالىق ورتالىعىنا اينالىپ وتىر، – دەدى ەرتاي كەنجەبەك ۇلى.

30-31 قازان كۇندەرى وتەتىن ءدۇبىرلى دودادا 14 ەلدەن كەلگەن 100-گە جۋىق بالۋان بوز كىلەمگە شىعىپ، 8 سالماق دارەجەسى بويىنشا باق سىنايدى. ەر جىگىتتىڭ ەپتىلىگى مەن قايراتىن، رۋحى مەن ءتوزىمىن سىنعا سالاتىن بۇل جارىس الەمنىڭ ۇزدىك بالۋاندارىن انىقتاماق.

جىل وتكەن سايىن اۋقىمى كەڭەيىپ، ۇيىمداستىرۋ دەڭگەيى ارتىپ كەلە جاتقان بايراقتى باسەكە بيىل ەرەكشە فورماتتا وتۋدە. دودانىڭ جوعارى دەڭگەيدە وتۋىنە ەلىمىزدىڭ ۇلتتىق سپورت قاۋىمداستىعى مەن تۇركىستان وبلىسى اكىمدىگى بىرلەسە اتسالىسىپ وتىر.

قازاق كۇرەسىنىڭ ابىرويىن حالىقارالىق ارەنادا جاڭا بەلەسكە كوتەرۋدى كوزدەيتىن بۇل الەم كۋبوگى – سپورتشىلار ءۇشىن ۇلكەن سىن، ال جانكۇيەرلەر ءۇشىن ناعىز رۋح مەرەكەسى بولماق.