بايسۋفينوۆكە «بەس» دەگەن باعا بەرەمىز! (ۆيدەو)

بۇگىن كەشكە «استانا ارەنا» ەكى ساعاتتاي تەڭسەلىپ تۇردى. وسى كۇنى فۋتبولدان قازاقستان ۇلتتىق قۇراماسى 2026 جىلعى الەم چەمپيوناتى ىرىكتەۋ كەزەڭىندەگى كەزەكتى ويىنىن بەلگيا كومانداسىمەن ويناپ، جانكۇيەرگە كەرەمەت كەش سىيلادى.

بۇل ماتچ 1:1 ەسەبىمەن اياقتالدى. ءسويتىپ، تالعات بايسۋفينوۆ جاساقتاعان ۇلتتىق قۇراما دۇنيەجۇزىلىك رەيتينگتە 8-ورىندا تۇرعان ازۋلى قارسىلاسىمەن تەڭ ءتۇسىپ، جانكۇيەر قاۋىمنىڭ ىستىق ىقىلاسىنا بولەندى. اڭگىمەنىڭ اشىعىن ايتساق، كوپ ادام قازاقستان قۇراماسىنىڭ «قىزىق سايتاندارمەن» يىق ءتۇيىستىرىپ وينايتىنىنا، مىقتى قارسىلاسپەن تەڭ تۇسەتىنىنە سەنبەگەن ەدى. ماتچتا ەكى دوپ، ءارى كەتسە ءۇش دوپ ايىرماشىلىعىمەن جەڭىلەتىنىن ويلاعان ەدىك. الايدا، تالعات مارۋان ۇلى باستاعان قۇراما ويىننىڭ ءبىرىنشى مينۋتىنان باستاپ، الاڭنىڭ يەسى كىم ەكەنىن دۇركىن-دۇركىن شابۋىلدار ارقىلى ءبىلدىرىپ، ونى باس تورەشىنىڭ سوڭعى ىسقىرىعىنا دەيىن كورسەتىپ بەردى.

بۇل ماتچتا الاڭ يەلەرى نامىسقا تىرىسىپ، جاقسى ويناپ شىقتى. ۇلتتىق قۇراما سوڭعى ويىنداردا تامىرىنا قايتا قان جۇگىرگەن كوماندا ەكەنىن كورسەتتى. ويىنداعى ءبىرىنشى گولدى دا قازاقستان جاساعى سالدى. ماتچتىڭ 9-مينۋتىندا جاس شابۋىلشى داستان ساتباەۆ الاڭنىڭ ورتاسىنان قارا ءۇزىپ شىعىپ، بەلگيا قاقپاسىن سول اياعىمەن ءدال كوزدەدى. بۇل 17 جاستاعى جاس فۋتبولشىنىڭ قۇراما ساپىندا سوققان العاشقى گولى بولدى. بۇعان دەيىن ول ۇلتتىق قۇراما ساپىندا بەس رەت الاڭعا شىعىپ، جاقسى ويىن ورنەگىن كورسەتكەنىمەن، بىردە-ءبىر گول سالماعان ەدى.

وسىدان كەيىن بەلگيا ويىنشىلارى بىرىنەن سوڭ ءبىرى شابۋىل جاساپ، تەمىرلان اناربەكوۆ قورعاعان قاقپانى نىساناعا الىپ جاتتى. قازاقستان قۇراماسى دا قاراپ جاتپادى. اسىرەسە، عالىمجان كەنجەبەكتىڭ سول قاپتالدان شىرەنە تەپكەن سوققىلارى قارسىلاستارعا كادىمگىدەي قاۋىپ ءتوندىرىپ وتىردى. ونىڭ ساتباەۆتىڭ گولىنان كەيىن بەلگيا قورعاۋشىلارىنان سىتىلىپ ءوتىپ، قاقپانىڭ «توعىزدىعىن» نىساناعا الىپ، دوپتى شيىرا تەپكەنى دە ءالى كوز الدىمىزدان كەتپەي وتىر. ودان باسقا ەركىن تاپالوۆ، رامازان ورازوۆ، يسلام چەسنوكوۆ، ماكسيم سامورودوۆ، باعدات قايىروۆ، الىبەك قاسىم، يان ۆوروگوۆسكي ءوز پوزيتسيالارىندا لايىقتى ويناسا، ەكىنشى تايمدا الاڭعا شىققان دامير قاسابولات، دىنمۇحامەد قارامان، گەورگي جۋكوۆ پەن يۆان سۆيريدوۆ تا شاما-شارقىنشا ەسەپتى تەڭ ۇستاۋعا اتسالىستى. قاقپاشى تەمىرلان اناربەكوۆ تۋرالى بولەك اڭگىمە. ەگەر شىندىقتىڭ بەتىنە تۋرا قاراساق، ول بولماعاندا ۇلتتىق قۇراما بۇل ويىندا ۇلكەن ەسەپپەن جەڭىلەر ەدى. تەمىرلاننىڭ ءوزى ويىندا بىرنەشە سەيۆ جاسادى. بىرنەشە رەت قاقپاعا كىرىپ بارا جاتقان دوپتى قولىنىڭ ۇشىمەن قايتارىپ جىبەردى. ول ويىننىڭ ۇزدىك ويىنشىسى دەپ تانىلدى.

ماتچتىڭ سوڭىندا بەلگيا جاساعىنىڭ باس جاتتىقتىرۋشىسى رۋدي گارسيا دا تەمىرلان اناربەكوۆتىڭ ونەرىن باس بارماقپەن باعالاپ، ويىنشىلارىنىڭ گول سالا الماعاندارىنا وكىنىپ، باسىن شايقاپ قايتتى.

-قازاقستاننىڭ قاقپاشىسى مىقتى ەكەن. ءسوز جوق، — دەدى ول ءباسپاسوز ءماسليحاتىندا.

ەكىنشى تايمدا بەلگيالىقتار ەسەپتى تەز تەڭەستىرىپ كەتتى. ويىننىڭ 48-مينۋتىندا حانس ۆاناكەن وڭ قاپتالدان تيموتي كاستاننىڭ اۋەلەتە بەرگەن پاسىن باسپەن تورعا توعىتتى.

ماتچ وسىلاي الما-كەزەك شابۋىلدارمەن جالعاسىپ، قارسىلاستار ايقاسقا ءتۇسىپ جاتقاندا 77-مينۋتتا قازاقستان قۇراماسىنىڭ ويىنشىسى يسلام چەسنوكوۆ الاڭنان قۋىلدى. وسى كەزدە الاڭ يەلەرىنىڭ مويىنىنا ناعىز سىناق ءتۇستى. دەگەنمەن ۇلتتىق قۇراما بۇل سىناقتان دا سۇرىنبەي ءوتتى. تابلوداعى 1:1 دەگەن ەسەپ ويىننىڭ نەگىزگى ۋاقىتى اياقتالعان سوڭ قوسىلعان 5 مينۋتتا دا وزگەرمەدى. وسىلايشا، وتانداستارىمىز 10 ويىنشىمەن ازۋلى قارسىلاستارىنا قارسى ماتچتا ەسەپتى تەڭ ۇستاپ، ەرلىك كورسەتتى. ال بەلگيا بۇگىن قازاقستاندى جەڭگەن جاعدايدا الەم چەمپيوناتىنىڭ فينالدىق كەزەڭىنە جولداما الار ەدى. ەندى بەلگيا 18 قاراشادا ءوز الاڭىندا ليحتەنشتەين قۇراماسىمەن وينايدى.  «قىزىل سايتاندار» قازىردىڭ وزىندە مۋنديالعا شىعىپ وتىر دەسەك بولادى. قولدا بار مالىمەتكە قاراعاندا، ولار J توبىندا 7 ويىنان كەيىن 15 ۇپاي جيناپ، ءبىرىنشى ورىندا تۇر.

ەكىنشى ورىندا 7 ماتچتا 13 ۇپاي يەلەنگەن سولتۇستىك ماكەدونيا كومانداسى كەلە جاتسا، ونىڭ وكەشەسىن 7 ويىندا 13 ۇپاي العان ۋەلس جاساعى باسىپ كەلەدى. ەندى ەكىنشى ورىننىڭ تاعدىرى دا وسى سولتۇستىك ماكەدونيا مەن ۋەلستىڭ ويىنىنىڭ اراسىندا شەشىلەدى. ال قازاقستان كومانداسى ىرىكتەۋ ءتۋرنيرىن بەسىنشى ورىنمەن اياقتادى. ۇلتتىق قۇراما 8 ماتچتا 8 ۇپاي جينادى. ەكى رەت جەڭىپ، ەكى رەت تەڭ ويناپ، ءتورت رەت جەڭىلىپ، 9 دوپ سوعىپ، 13 گول جىبەرىپ، ءوز توبىندا بەسىنشى ورىن الدى.

قازاقستان ۋەلستەن 1:3، 0:1، سولتۇستىك ماكەدونيادان 0:1، بەلگيادان 0:6 ەسەبىمەن جەڭىلىپ، سولتۇستىك ماكەدونيامەن 1:1 تەڭ تۇسسە، ليحتەنشتەيندى 4:0، 2:0 ەسەبىمەن جەڭدى.

ءسوز سوڭىندا ۇلتتىق قۇراما كوماندانىڭ باس جاتتىقتىرۋشىسىنىڭ مىندەتىن اتقارۋشى تالعات بايسۋفينوۆ تۋرالى ايتپاسقا بولمايدى. ءبىر سوزبەن ايتساق، تالعات مارۋان ۇلى باس جاتتىقتىرۋشى بولىپ قالۋ كەرەك دەپ ويلايمىز. ءبىزدىڭ ەلگە رەسەيدەن دە باسقا شەتەلدەن دە «مامان» كەرەك ەمەس. بىزگە قازاقپەن قازاقشا سويلەيتىن، ويىنشىنىڭ جۇرەگىنە جەتەتىن سوزدەر ايتىپ، ونى تىڭعىلىقتى دايىنداپ، نامىسىن قايراپ، الاڭعا جىگەرلەندىرىپ شىعاراتىن جاتتىقتىرۋشى كەرەك. قازىر ءبىز بۇل ورىنعا بايسۋفينوۆتەن باسقا باپكەردى كورىپ وتىرعان جوقپىز. سوندىقتان دا ءبىز وعان بۇعان دەيىن باس جاتتىقتىرۋشى بولعان ءالي اليەۆتىڭ جولىن جالعاستىرىپ، بۇلاقتىڭ كوزىن اشىپ، كوماندانى جىگەرلەندىرىپ ويناتقانى ءۇشىن «بەس» دەگەن باعا بەرەمىز! وعان ءبارىمىز كەلىسەمىز دەپ ويلايمىز.

قازاقستان – بەلگيا – 1:1

گول سوققان: ساتباەۆ 9 – ۆاناكەن 48

ەسكەرتۋلەر: تاپالوۆ 29، ساتباەۆ 46، قايىروۆ 69، بايسۋفينوۆ 78، اناربەكوۆ 84 – ونانا 40

الاڭنان قۋىلدى: چەسنوكوۆ 79

قازاقستان: اناربەكوۆ (ق)، ۆوروگوۆسكي، قاسىم، ءالىپ (ك)، قايىروۆ،​ تاپالوۆ (جۋكوۆ 90+2)، ورازوۆ (قاسابۋلات 90+1)، سامورودوۆ (قارامان 80) – كەنجەبەك (اشىربەك 57)، چەسنوكوۆ، ساتباەۆ (سۆيريدوۆ 56);

قوسالقى قۇرام: سەيسەن (ق)،  شايزادا (ق)، س.استانوۆ، مالىي، جاگوروۆ، ە.استانوۆ، جۋمات;

باس جاتتىقتىرۋشىنىڭ مىندەتىن اتقارۋشى: تالعات بايسۋفينوۆ.

بەلگيا:  سەلس (ق)، سەيس (دە كەيپەر 81)، دە ۆينتەر، تەاتە، كاستان، راسكين (ۆەرمان 89)، ونانا (تيلەمانس 71)، ۆاناكەن، دە كەتەلارە (وپەندا 71)،  دوكۋ، تروسسار (سالەماكەرس 71);

قوسالقى قۇرام: لاممەنس (ق)،  ۆاندەۆووردت (ق) – مەحەلە – ۆيتسەل، ليۋكەباكيو، ۆانحاۋتتە، مورەيرا;

باس جاتتىقتىرۋشى: رۋدي گارسيا.

تورەشىلەر: دوناتاس رۋمشاس، الەكساندر راديۋس، دوۆيداس سۋجەدەليس، روبەرتاس ۆاليكونيس ء(بارى – ليتۆا).;

15.11.2025. «استانا ارەنا»، استانا. 28 012 كورەرمەن.

 

داستان كەنجالين،

استانا