Baısýfınovke «bes» degen baǵa beremiz! (VIDEO)

Búgin keshke «Astana Arena» eki saǵattaı teńselip turdy. Osy kúni fýtboldan Qazaqstan ulttyq quramasy 2026 jylǵy álem chempıonaty irikteý kezeńindegi kezekti oıynyn Belgııa komandasymen oınap, jankúıerge keremet kesh syılady.

Bul match 1:1 esebimen aıaqtaldy. Sóıtip, Talǵat Baısýfınov jasaqtaǵan ulttyq qurama dúnıejúzilik reıtıngte 8-orynda turǵan azýly qarsylasymen teń túsip, jankúıer qaýymnyń ystyq yqylasyna bólendi. Áńgimeniń ashyǵyn aıtsaq, kóp adam Qazaqstan quramasynyń «qyzyq saıtandarmen» ıyq túıistirip oınaıtynyna, myqty qarsylaspen teń túsetinine senbegen edi. Matchta eki dop, ári ketse úsh dop aıyrmashylyǵymen jeńiletinin oılaǵan edik. Alaıda, Talǵat Marýanuly bastaǵan qurama oıynnyń birinshi mınýtynan bastap, alańnyń ıesi kim ekenin dúrkin-dúrkin shabýyldar arqyly bildirip, ony bas tóreshiniń sońǵy ysqyryǵyna deıin kórsetip berdi.

Bul matchta alań ıeleri namysqa tyrysyp, jaqsy oınap shyqty. Ulttyq qurama sońǵy oıyndarda tamyryna qaıta qan júgirgen komanda ekenin kórsetti. Oıyndaǵy birinshi goldy da Qazaqstan jasaǵy saldy. Matchtyń 9-mınýtynda jas shabýylshy Dastan Sátbaev alańnyń ortasynan qara úzip shyǵyp, Belgııa qaqpasyn sol aıaǵymen dál kózdedi. Bul 17 jastaǵy jas fýtbolshynyń qurama sapynda soqqan alǵashqy goly boldy. Buǵan deıin ol ulttyq qurama sapynda bes ret alańǵa shyǵyp, jaqsy oıyn órnegin kórsetkenimen, birde-bir gol salmaǵan edi.

Osydan keıin Belgııa oıynshylary birinen soń biri shabýyl jasap, Temirlan Anarbekov qorǵaǵan qaqpany nysanaǵa alyp jatty. Qazaqstan quramasy da qarap jatpady. Ásirese, Ǵalymjan Kenjebektiń sol qaptaldan shirene tepken soqqylary qarsylastarǵa kádimgideı qaýip tóndirip otyrdy. Onyń Sátbaevtyń golynan keıin Belgııa qorǵaýshylarynan sytylyp ótip, qaqpanyń «toǵyzdyǵyn» nysanaǵa alyp, dopty shıyra tepkeni de áli kóz aldymyzdan ketpeı otyr. Odan basqa Erkin Tapalov, Ramazan Orazov, Islam Chesnokov, Maksım Samorodov, Baǵdat Qaıyrov, Álibek Qasym, Ian Vorogovskıı óz pozıııalarynda laıyqty oınasa, ekinshi taımda alańǵa shyqqan Damır Qasabolat, Dinmuhamed Qaraman, Georgıı Jýkov pen Ivan Svırıdov ta shama-sharqynsha esepti teń ustaýǵa atsalysty. Qaqpashy Temirlan Anarbekov týraly bólek áńgime. Eger shyndyqtyń betine týra qarasaq, ol bolmaǵanda ulttyq qurama bul oıynda úlken eseppen jeńiler edi. Temirlannyń ózi oıynda birneshe seıv jasady. Birneshe ret qaqpaǵa kirip bara jatqan dopty qolynyń ushymen qaıtaryp jiberdi. Ol oıynnyń úzdik oıynshysy dep tanyldy.

Matchtyń sońynda Belgııa jasaǵynyń bas jattyqtyrýshysy Rýdı Garsııa da Temirlan Anarbekovtyń ónerin bas barmaqpen baǵalap, oıynshylarynyń gol sala almaǵandaryna ókinip, basyn shaıqap qaıtty.

-Qazaqstannyń qaqpashysy myqty eken. Sóz joq, — dedi ol baspasóz máslıhatynda.

Ekinshi taımda belgııalyqtar esepti tez teńestirip ketti. Oıynnyń 48-mınýtynda Hans Vanaken oń qaptaldan Tımotı Kastannyń áýelete bergen pasyn baspen torǵa toǵytty.

Match osylaı alma-kezek shabýyldarmen jalǵasyp, qarsylastar aıqasqa túsip jatqanda 77-mınýtta Qazaqstan quramasynyń oıynshysy Islam Chesnokov alańnan qýyldy. Osy kezde alań ıeleriniń moıynyna naǵyz synaq tústi. Degenmen ulttyq qurama bul synaqtan da súrinbeı ótti. Tablodaǵy 1:1 degen esep oıynnyń negizgi ýaqyty aıaqtalǵan soń qosylǵan 5 mınýtta da ózgermedi. Osylaısha, otandastarymyz 10 oıynshymen azýly qarsylastaryna qarsy matchta esepti teń ustap, erlik kórsetti. Al Belgııa búgin Qazaqstandy jeńgen jaǵdaıda álem chempıonatynyń fınaldyq kezeńine joldama alar edi. Endi Belgııa 18 qarashada óz alańynda Lıhtenshteın quramasymen oınaıdy.  «Qyzyl saıtandar» qazirdiń ózinde mýndıalǵa shyǵyp otyr desek bolady. Qolda bar málimetke qaraǵanda, olar J tobynda 7 oıynan keıin 15 upaı jınap, birinshi orynda tur.

Ekinshi orynda 7 matchta 13 upaı ıelengen Soltústik Makedonııa komandasy kele jatsa, onyń ókeshesin 7 oıynda 13 upaı alǵan Ýels jasaǵy basyp keledi. Endi ekinshi orynnyń taǵdyry da osy Soltústik Makedonııa men Ýelstiń oıynynyń arasynda sheshiledi. Al Qazaqstan komandasy irikteý týrnırin besinshi orynmen aıaqtady. Ulttyq qurama 8 matchta 8 upaı jınady. Eki ret jeńip, eki ret teń oınap, tórt ret jeńilip, 9 dop soǵyp, 13 gol jiberip, óz tobynda besinshi oryn aldy.

Qazaqstan Ýelsten 1:3, 0:1, Soltústik Makedonııadan 0:1, Belgııadan 0:6 esebimen jeńilip, Soltústik Makedonııamen 1:1 teń tússe, Lıhtenshteındi 4:0, 2:0 esebimen jeńdi.

Sóz sońynda ulttyq qurama komandanyń bas jattyqtyrýshysynyń mindetin atqarýshy Talǵat Baısýfınov týraly aıtpasqa bolmaıdy. Bir sózben aıtsaq, Talǵat Marýanuly bas jattyqtyrýshy bolyp qalý kerek dep oılaımyz. Bizdiń elge Reseıden de basqa shetelden de «maman» kerek emes. Bizge qazaqpen qazaqsha sóıleıtin, oıynshynyń júregine jetetin sózder aıtyp, ony tyńǵylyqty daıyndap, namysyn qaırap, alańǵa jigerlendirip shyǵaratyn jattyqtyrýshy kerek. Qazir biz bul orynǵa Baısýfınovten basqa bapkerdi kórip otyrǵan joqpyz. Sondyqtan da biz oǵan buǵan deıin bas jattyqtyrýshy bolǵan Álı Álıevtiń jolyn jalǵastyryp, bulaqtyń kózin ashyp, komandany jigerlendirip oınatqany úshin «bes» degen baǵa beremiz! Oǵan bárimiz kelisemiz dep oılaımyz.

Qazaqstan – Belgııa – 1:1

Gol soqqan: Sátbaev 9 – Vanaken 48

Eskertýler: Tapalov 29, Sátbaev 46, Qaıyrov 69, Baısýfınov 78, Anarbekov 84 – Onana 40

Alańnan qýyldy: Chesnokov 79

Qazaqstan: Anarbekov (Q), Vorogovskıı, Qasym, Álip (K), Qaıyrov,​ Tapalov (Jýkov 90+2), Orazov (Qasabýlat 90+1), Samorodov (Qaraman 80) – Kenjebek (Áshirbek 57), Chesnokov, Sátbaev (Svırıdov 56);

Qosalqy quram: Seısen (Q),  Shaızada (Q), S.Astanov, Malyı, Jagorov, E.Astanov, Jýmat;

Bas jattyqtyrýshynyń mindetin atqarýshy: Talǵat Baısýfınov.

Belgııa:  Sels (Q), Seıs (de Keıper 81), de Vınter, Teate, Kastan, Raskın (Verman 89), Onana (Tılemans 71), Vanaken, de Ketelare (Openda 71),  Doký, Trossar (Salemakers 71);

Qosalqy quram: Lammens (Q),  Vandevoordt (Q) – Mehele – Vıtsel, Lıýkebakıo, Vanhaýtte, Moreıra;

Bas jattyqtyrýshy: Rýdı Garsııa.

Tóreshiler: Donatas Rýmshas, Aleksandr Radıýs, Dovıdas Sýjedelıs, Robertas Valıkonıs (bári – Lıtva).;

15.11.2025. «Astana Arena», Astana. 28 012 kórermen.

 

Dastan KENJALIN,

ASTANA