ۋەفا چەمپيوندار ليگاسى: «قايرات» ەندى استانادا وينايدى

«قايرات» ۋەفا چەمپيوندار ليگاسى اياسىندا گرەكيانىڭ «وليمپياكوس» جانە بەلگيانىڭ «بريۋگگە» كوماندالارىمەن استانادا وينايدى، دەپ حابارلادى الماتى قالاسىنىڭ فۋتبول كلۋبى.

چەمپيوندار ليگاسىنىڭ جالپى كەزەڭىندە «وليمپياكوس» كلۋبىمەن ويىن 9 جەلتوقساندا، «بريۋگگە» كومانداسىمەن ماتچ 20 قاڭتاردا «استانا ارەنا» ستاديونىندا بولادى.

-الماتىداعى ورتالىق ستاديوندا ماتچتى قىستا وتكىزۋ تاجىريبەسى كورسەتكەندەي، تومەن تەمپەراتۋرا، شاتىردىڭ جوقتىعى، قار جاۋ قاۋپى جانكۇيەرلەر ءۇشىن قولايسىزدىق تۋعىزىپ، الاڭ قىزمەتىن قيىنداتادى. كورەرمەندەرگە جايلى ءارى قاۋىپسىز جاعداي جاساۋ ءۇشىن ماتچ جابىق ستاديوندا بولادى، — دەپ حابارلادى كلۋب.

سونداي-اق «قايرات» ماتچتارعا بيلەتتىڭ باعاسى 15 000 – 50 000 تەڭگە ارالىعىندا بولاتىنىن جاريا ەتتى.

-بيلەتتەر 28 قاراشادان باستاپ Qairat SuperApp جانە Freedom SuperApp ءموبيلدى قوسىمشالارىندا ساتىلا باستايدى. ءبىر ادامعا ەكى بيلەتتەن ارتىق راسىمدەۋگە بولمايدى، — دەلىنگەن حابارلامادا.

كلۋبتىڭ حابارلاۋىنشا، Ticketon ماماندارى «قايرات» فك-نىڭ ءوز الاڭىنداعى ماتچتارىنا العان ابونەمەنت يەلەرىنە جالپى ساتىلىم باستالعانعا دەيىن حابارلاسىپ، بيلەت راسىمدەۋ، باسىمدىق ارقىلى ساتىپ الۋ ءتارتىبى تۋرالى تولىق اقپارات بەرەدى.

ەسكە سالا كەتسەك، «قايراتتىڭ» ءوز الاڭىنداعى «رەال مادريد» جانە «پافوس» كوماندالارىمەن ويىندارىنا بيلەت 30-250 مىڭ تەڭگە ارالىعىندا ساتىلدى.

«قايرات» قاراشا ايىندا سىرت الاڭدا دانيانىڭ «كوپەنگاگەن» كلۋبىمەن وينايدى. بۇل ماتچ 26 قاراشادا بولادى. ال 29 قاڭتاردا انگليانىڭ «ارسەنال» جاساعىمەن جاسىل الاڭعا شىعادى.