SportPress.kz Qazaqstan sport jańalyqtary
«Qaırat» ÝEFA Chempıondar lıgasy aıasynda Grekııanyń «Olımpıakos» jáne Belgııanyń «Brıýgge» komandalarymen Astanada oınaıdy, dep habarlady Almaty qalasynyń fýtbol klýby.
Chempıondar lıgasynyń jalpy kezeńinde «Olımpıakos» klýbymen oıyn 9 jeltoqsanda, «Brıýgge» komandasymen match 20 qańtarda «Astana Arena» stadıonynda bolady.
-Almatydaǵy Ortalyq stadıonda matchty qysta ótkizý tájirıbesi kórsetkendeı, tómen temperatýra, shatyrdyń joqtyǵy, qar jaýý qaýpi jankúıerler úshin qolaısyzdyq týǵyzyp, alań qyzmetin qıyndatady. Kórermenderge jaıly ári qaýipsiz jaǵdaı jasaý úshin match jabyq stadıonda bolady, — dep habarlady klýb.
Sondaı-aq «Qaırat» matchtarǵa bılettiń baǵasy 15 000 – 50 000 teńge aralyǵynda bolatynyn jarııa etti.
-Bıletter 28 qarashadan bastap Qairat SuperApp jáne Freedom SuperApp mobıldi qosymshalarynda satyla bastaıdy. Bir adamǵa eki bıletten artyq rásimdeýge bolmaıdy, — delingen habarlamada.
Klýbtyń habarlaýynsha, Ticketon mamandary «Qaırat» FK-nyń óz alańyndaǵy matchtaryna alǵan abonement ıelerine jalpy satylym bastalǵanǵa deıin habarlasyp, bılet rásimdeý, basymdyq arqyly satyp alý tártibi týraly tolyq aqparat beredi.
Eske sala ketsek, «Qaırattyń» óz alańyndaǵy «Real Madrıd» jáne «Pafos» komandalarymen oıyndaryna bılet 30-250 myń teńge aralyǵynda satyldy.
«Qaırat» qarasha aıynda syrt alańda Danııanyń «Kopengagen» klýbymen oınaıdy. Bul match 26 qarashada bolady. Al 29 qańtarda Anglııanyń «Arsenal» jasaǵymen jasyl alańǵa shyǵady.
