SportPress.kz قازاقستان سپورت جاڭالىقتارى
يتاليادا كەلەسى جىلى 6-22 اقپان ارالىعىندا وتەتىن قىسقى وليمپيادا ويىندارىنىڭ باستالۋىنا 50 كۇننەن از ۋاقىت قالدى.
وسىعان بايلانىستى ۇلتتىق وليمپيالىق كوميتەتتىڭ رەسمي سايتى Olympic.kz جارىستاردى تريبۋنادان تاماشالاۋدى جوسپارلاپ وتىرعان جانكۇيەرلەرگە ارناپ ارنايى نۇسقاۋلىق ازىرلەدى.
بيلەتتەردى ساتۋ ءتارتىبى
2026 جىلعى قىسقى وليمپيادا ويىندارىنا بيلەتتەر تەك تسيفرلىق فورماتتا ساتىلادى. ۇيىمداستىرۋ كوميتەتى بيلەتتەردى تاراتاتىن جالعىز رەسمي ارنالار — وليمپيادا ويىندارىنىڭ رەسمي بيلەت پلاتفورماسى مەن حالىقارالىق وليمپيادالىق كوميتەتىنىڭ رەسمي سەرىكتەسى On Location سايتى ەكەنىن اتاپ ءوتتى.
بيلەتتەردى باسقا دا قىزمەت كورسەتۋ ورتالىعىنان نەمەسە جەكە دەلدالدار ارقىلى ساتىپ الۋ جارىستارعا كىرۋگە كەپىلدىك بەرمەيدى جانە ارەنالارعا كىرگىزبەۋ قاۋپىن تۋدىرادى. سوندىقتان بەيرەسمي جولمەن بيلەت الۋدان باس تارتقان ءجون.
بيلەتتەردى قايدان جانە قالاي ساتىپ الۋعا بولادى؟
جەكەلەگەن سپورتتىق سەسسيالار مەن سالتاناتتى راسىمدەرگە ارنالعان بيلەتتەر وليمپيادا ويىندارىنىڭ رەسمي بيلەت سايتىندا ساتىلادى. ال بيلەت پەن قوسىمشا قىزمەتتەردى قامتيتىن پاكەتتەر تەك On Location ارقىلى ۇسىنىلادى. باسقا اۆتوريزاتسيالانعان پلاتفورمالار جوق.
ساتىپ الۋ ءۇشىن مىندەتتى تۇردە تىركەۋدەن ءوتۋ قاجەت. ساتىلىمنىڭ العاشقى كەزەڭىندە سۇرانىسقا يە بيلەتتەرگە قول جەتكىزۋ لوتەرەيا جۇيەسى ارقىلى جۇزەگە اسىپ، جەڭىمپازدارعا 48 ساعاتتىق ساتىپ الۋ مۇمكىندىگى بەرىلدى. 2025 جىلدىڭ كوكتەمىنەن باستاپ بيلەتتەر اشىق ساتىلىمعا شىقتى. پاراليمپيادا ويىندارىنا بيلەتتەر بولەك ساتىلادى. سونداي-اق ولاردىڭ باعاسى ايتارلىقتاي تومەن.
بيلەتءتىڭ باعاسى
ويىنداردىڭ باعا ساياساتى بارىنشا كەڭ اۋديتورياعا باعىتتالعان. ەڭ ارزان بيلەتتەردىڭ قۇنى — 30 ەۋرو، بۇل باعاعا حوككەي ءتۋرنيرىنىڭ ىرىكتەۋ ماتچتارىن كورۋگە بولادى. بارلىق بيلەتتىڭ 20 پايىزدان استامى 40 ەۋروعا دەيىن، ال 57 پايىزى 100 ەۋروعا دەيىن باعالانادى.
ەڭ قولجەتىمدى سپورت تۇرلەرىنىڭ قاتارىندا:
— كەرلينگ — 40-150 ەۋرو،
— بياتلون — 50-200 ەۋرو،
— تاۋ شاڭعىسى — 100-220 ەۋرو.
شورت-ترەككە بيلەتتەر 150-450 ەۋرو بولسا، كونكيمەن جۇگىرۋ سپورتىن تاماشالاۋ قۇنى 180–280 ەۋرو تۇرادى. كوپ كورەرمەن جينالاتىن سپورت تۇرلەرى — فريستايل مەن سنوۋبورد. كىرۋ باعاسى 50-440 ەۋرو ارالىعىندا.
مانەرلەپ سىرعاناۋ ەڭ قىمبات سپورت تۇرلەرىنىڭ قاتارىنا كىرەدى. بيلەتتەردىڭ قۇنى C ساناتى ءۇشىن 280 ەۋرودان باستالىپ، گالا-كورسەتىلىمدە A ساناتىنداعى ورىندار 1 200 ەۋروعا دەيىن جەتەدى. نەگىزگى جارىس سەسسيالارىندا A ساناتى — 650-750 ەۋرو، B ساناتى — 450-550 ەۋرو.
حوككەي ءتۋرنيرى ەڭ كەڭ باعا اۋقىمىنا يە. ىرىكتەۋ ماتچتارى 30 ەۋرودان باستالسا، جارتىلاي فينالدار مەن قولا جۇلدە ءۇشىن وتەتىن ويىنداردى تاماشالاۋ قۇنى 200–500 ەۋرو تۇرادى. ەرلەر اراسىنداعى فينالعا بيلەتتەر 450–1 400 ەۋرو ارالىعىندا ساتىلادى.
ميلان قالاسىنداعى «سان-سيرو» ستاديونىندا وتەتىن اشىلۋ سالتاناتىنىڭ بيلەتتەرى 260–2 026 ەۋرو، ال ۆەرونا ارەناسىنداعى جابىلۋ ءراسىمى 950–2 900 ەۋرو شاماسىندا باعالانادى.
بيلەتءتىڭ ءتۇرى مەن ورىن ساناتتارى
بيلەتتەر جارىس كۇنىنە ەمەس، جەكەلەگەن سەسسيالارعا ساتىلادى. كوپتەگەن ءىس-شارادا بىرنەشە ورىن ساناتى بار.
A ساناتى — ەڭ جاقسى كورىنىس پەن ەڭ جوعارى باعا،
B ساناتى — باعا مەن ساپانىڭ وڭتايلى ۇيلەسىمى،
C جانە D ساناتتارى — ەڭ قولجەتىمدى، ادەتتە جوعارعى قاباتتاردا نەمەسە بۇرىشتىق سەكتورلاردا ورنالاسادى. كەيبىر سپورت تۇرلەرىندە ورىن بەكىتىلمەگەن بيلەتتەر قاراستىرىلعان، بۇل ولاردىڭ باعاسىن تومەندەتەدى.
بيلەتتەر فورماتى جانە ارەنالارعا كىرۋ
بارلىق بيلەت تەك تسيفرلىق فورماتتا بەرىلەدى. جارىستارعا كىرۋ Milano Cortina 2026 ءموبيلدى قوسىمشاسى ارقىلى جۇزەگە اسادى. قوسىمشا 2025 جىلدىڭ سوڭىندا قولجەتىمدى بولادى. كىرۋگە ارنالعان QR-كود سەسسيا باستالۋىنا 24 ساعات قالعاندا بەلسەندىرىلىپ، بيلەت يەسىنىڭ اتىنا تىركەلەدى. قاعاز بيلەتتەر قاراستىرىلماعان.
ساتىپ الۋعا بايلانىستى شەكتەۋلەر
تىركەلگەن ءاربىر پايدالانۋشى ساتىلىمنىڭ بارلىق كەزەڭىندە ءبىر اككاۋنتقا ەڭ كوبى 25 بيلەت قانا ساتىپ الا الادى. ءبىر ترانزاكتسيادا 10 بيلەتتەن ارتىق الۋعا بولمايدى. ال اشىلۋ جانە جابىلۋ سالتاناتتارى سياقتى اۋقىمدى ءىس-شارالار مەن كەيبىر سپورت تۇرلەرى ءۇشىن ءبىر اككاۋنتقا 4 بيلەتتەن ارتىق ساتىپ الۋعا رۇقسات بەرىلمەيدى. بيلەتتەردى 16 جاستان اسقان تۇلعالار ساتىپ الا الادى. 14 جاسقا دەيىنگى بالالار 18 جاستان اسقان ەرەسەك اداممەن بىرگە كىرەدى. سونداي-اق 4 جاستان اسقان ءار بالاعا جەكە بيلەت قاجەت.
بيلەتتەردى قايتا ساتۋ
2025 جىلدىڭ جەلتوقسان ايىندا بيلەتتەردى قايتا ساتۋعا ارنالعان رەسمي پلاتفورما ىسكە قوسىلادى. بۇل – جوسپار وزگەرگەن جاعدايدا بيلەتتى زاڭدى ءارى قاۋىپسىز تۇردە وتكىزۋدىڭ جالعىز جولى. بيلەتتەر بەلگىلەنگەن باعامەن ساتىلادى جانە پلاتفورما قىزمەتى ءۇشىن شامامەن 5% كوميسسيا الىنادى.
On Location قوناقجايلىلىق پاكەتتەرى
قوناقجايلىلىق باعدارلاماسى جوعارى دەڭگەيدەگى قىزمەت كورسەتۋ مەن سۇرانىسقا يە جارىستارعا كەپىلدەندىرىلگەن قولجەتىمدىلىكتى قالايتىن جانكۇيەرلەرگە ارنالعان. پاكەتتەردىڭ قۇنى 150 ەۋرودان باستالىپ، فينالدار مەن سالتاناتتى راسىمدەر ءۇشىن ورنالاستىرۋ مەن ترانسفەردى قامتىعان جاعدايدا 10 مىڭ ەۋرودان اسىپ كەتۋى مۇمكىن.
پاكەت تۇرىنە قاراي ونىڭ قۇرامىنا بەلگىلى ءبىر ساناتتاعى بيلەتتەر، باستى كىرەبەرىس، كەيتەرينگ ۇسىنىلاتىن لاۋندج-ايماقتارعا قولجەتىمدىلىك، ال پرەميۋم نۇسقالاردا قوناقۇي مەن كولىك قىزمەتى كىرەدى.
ۇيىمداستىرۋشىلاردىڭ ايتۋىنشا، قاراپايىم بيلەت سپورتتىق جارىستى تاماشالاپ، ساپارىن ءوز بەتىنشە جوسپارلاۋدى قالايتىن جانكۇيەرلەرگە ارنالعان. ال قوناقجايلىلىق پاكەتتەرى فينالدار، سالتاناتتى راسىمدەر، بىرلەسكەن توپتار، جايلىلىق پەن كەپىلدەندىرىلگەن قولجەتىمدىلىكتى جوعارى قوياتىن كورەرمەن ءۇشىن ءتيىمدى شەشىم بولادى.
