SportPress.kz قازاقستان سپورت جاڭالىقتارى
جاقىندا بەلگىلى شاڭعىشى ماعجان امانكەلدى ۇلىمەن سۇحباتتاسۋدىڭ ءساتى ءتۇستى. ول حالىقارالىق جارىستاردا قىسقى سپورت تۇرلەرىنەن ەل نامىسىن قورعاپ، تالاي سىنداردان سۇرىنبەي كەلە جاتقان جاس سپورتشى.
ماعجان جاستايىنان قىسقى سپورتتى وزىنە سەرىك ەتىپ، بيىلعا دەيىن ەلىشىلىك تۋرنيرلەر مەن حالىقارالىق دۇرمەكتى دودالارعا قاتىسىپ، قۇرمەت تۇعىرىنىڭ ەڭ بيىك ساتىسىنا شىعىپ وتىر. جارىستا جەڭىمپاز بولۋ ەكىنىڭ ءبىرىنىڭ قولىنان كەلە بەرمەيدى. ول كوپ ەڭبەكتى تالاپ ەتەدى. ماڭداي تەرمەن كەلگەن جەڭىستىڭ ءدامى دە بولەك ەكەنىن سپورتشىلار جاقسى بىلەدى. سوندىقتان ماعجان اڭگىمە كەزىندە سپورتقا قاتىستى دا ايتار ويى بار ەكەنىن ايتتى. ەندى سول شاعىن سۇحباتتى وقىرماننىڭ نازارىنا ۇسىنۋدى ءجون كورىپ وتىرمىز.
-ماعجان، اشىعىن ايتساق سەنىڭ دەڭگەيىڭدەگى سپورتشىنى دايىنداۋ قانشا تۇرادى؟
-شىنىن ايتقاندا، كاسىبي قىسقى سپورت — وتە قىمبات. ءبىر ماۋسىمنىڭ وزىنە شەتەلدىك جارىستار، وقۋ-جاتتىعۋ جيىندارى، قۇرال-جابدىق، قىزمەت، مەديتسينا، قالپىنا كەلۋ كىرەدى.
الەمدىك دەڭگەيدە دايىندالاتىن ءبىر سپورتشىعا جىلىنا ونداعان ميلليون تەڭگە قاجەت. بۇل ارتىق شىعىن ەمەس — باسەكەگە قابىلەتتى بولۋ ءۇشىن ەڭ تومەنگى قاجەتتى دەڭگەي.
-ال قازاقستاندا سپورتشىعا ناقتى قانشا قارجى بولىنەدى؟
-كوپ ادام ويلاعانداي ەمەس. مەملەكەتتىك قارجىلاندىرۋ ءبارىن تولىق جاپپايدى. كوبىنە تەك بازالىق جيىندار مەن جارىستاردىڭ ءبىر بولىگى عانا قامتىلادى. قالعانىنىڭ ءبارى — جەكە دايىندىق، قوسىمشا جارىستار، كەيدە ءتىپتى جول شىعىندارى سپورتشىنىڭ نەمەسە وتباسىنىڭ موينىندا بولادى.
-دەمەك، «سپورتشىلار تولىق قامتاماسىز ەتىلگەن» دەگەن ويدان شىعىرىلعان با؟
-ءيا، بۇل — ميف. ويدان شىعارىلعان. ەگەر سەن وليمپيادا چەمپيونى نەمەسە تۇراقتى تۇردە مەدال الىپ جۇرگەن سپورتشى بولماساڭ، رەسۋرس ىزدەۋگە ءماجبۇرسىڭ.
قازاقستاندا الدىمەن ناتيجە تالاپ ەتىلەدى، سودان كەيىن عانا قولداۋ بولۋى مۇمكىن.
ەۋروپادا كەرىسىنشە — الدىمەن ينۆەستيتسيا، كەيىن تالاپ.
-الەم كۋبوگى مەن الەم چەمپيوناتىنا قاتىسۋ تابىس اكەلە مە؟
-جوق. العاشقى كەزەڭدە حالىقارالىق جارىستار تابىس ەمەس، تازا شىعىن اكەلەدى. جۇلدە قارجىسى تەك جوعارى ورىنداردان باستالادى. ال وعان دەيىن سەن ءوز اتىڭا، رەيتينگىڭە جانە ەلىڭە ينۆەستيتسيا سالاسىڭ.
-وندا نەگە كوپشىلىك سياقتى سپورتتان ەرتەرەك كەتىپ قالمادىڭ؟
-سەبەبى مەن ءوز دەڭگەيىمدى ءبىلدىم. مەن قازاقستان بۇرىن بولماعان دەڭگەيدە باسەكەگە تۇسە الاتىنىن كوردىم.
وسى دەڭگەيگە ءبىر رەت شىققاننان كەيىن، «قيىن» دەگەن سىلتاۋمەن كەتۋ — مەن ءۇشىن السىزدىك.
-شاڭعى قوسسايىسى جابىلعان سوڭ مانساپتى اياقتاۋعا بولاتىن ەدى. نەگە جالعاستىردىڭ؟
-سەبەبى، سپورت — تەك ءبىر ديستسيپلينا ەمەس. بۇل — كلاسس.
مەن شاڭعى ترامپلينىنەن سەكىرۋدە ءبارىن نولدەن باستادىم دا ءبىرىنشى ماۋسىمدا-اق قازاقستان كۋبوگىن جەڭىپ الدىم.
بۇل مەنىڭ جۇيەگە بەرگەن جاۋابىم بولدى: ماسەلە مەندە ەمەس.
-قازىر ساعان نە ماڭىزدىراق — قارجى ما، الدە نازار ما؟
-ماعان ەڭ كەرەگى — تۇراقتى ءارى تۇسىنىكتى قولداۋ.
سپورتشى ەرتەڭگى جارىستى قالاي قارجىلاندىرامىن دەپ ەمەس، ناتيجە تۋرالى ويلاۋى كەرەك.
سپورتقا سالىنعان ينۆەستيتسيا — قايىرىمدىلىق ەمەس، بۇل ستراتەگيا.
-قازاقستانداعى جاس سپورتشىلارعا نە ايتار ەدىڭ؟
-ءمىنسىز جاعداي كۇتپەڭدەر. ول بولمايدى.
بىراق ەگەر سەن شىنىمەن مىقتى بولساڭ، جۇيە سەنى ەرتە مە، كەش پە مويىندايدى.
ەڭ باستىسى — سەنى ەلەمەۋگە بولمايتىن دەڭگەيگە جەتۋ.
-سوڭعى سۇراق. ءوزىڭنىڭ باستى ماقساتىڭدى قالاي تۇجىرىمدايسىڭ؟
-قازاقستاننىڭ ەڭ قيىن قىسقى سپورت تۇرلەرىندە قاتىسۋى قالىپتى قۇبىلىسقا اينالۋى كەرەك.
مەن العاشقى قادامدى جاسادىم. ەندى كەلەسى قادامدى كىم جاساۋعا دايىن — سول ماڭىزدى.
-اڭگىمەڭە راحمەت!
اڭگىمەلەسكەن، رۇستەم جۇمان
