تۇركىستاندا قازاقستان چەمپيوناتىنا 1052 شاحماتشى قاتىسىپ جاتىر

تۇركىستان قالاسىندا شاحماتتان جاسوسپىرىمدەر اراسىندا قازاقستان چەمپيوناتى باستالدى، دەپ حابارلادى وبلىس اكىمىنىڭ ءباسپاسوز قىزمەتى.

ءدۇبىرلى سىنعا ەلىمىزدىڭ بارلىق وڭىرىنەن 1052 سپورتشى تىركەلىپ، سىنعا ءتۇسىپ جاتىر. چەمپيوناتتىڭ اشىلۋ سالتاناتىنا تۇركىستان وبلىسىنىڭ اكىمى نۇرالحان كوشەروۆ قاتىسىپ، جارىسقا قاتىسۋشىلارعا ساتتىلىك تىلەدى.

– قاسيەتتى تۇركىستان قالاسىنا قوش كەلىدىڭىزدەر! مەملەكەت باسشىسىنىڭ تاپسىرماسىنا سايكەس، ەلىمىزدە زياتكەرلىك سپورت تۇرلەرىن، ونىڭ ىشىندە شاحماتتى دامىتۋعا ەرەكشە كوڭىل بولىنۋدە.  وسى ماقساتتا «2023-2027 جىلدارعا ارنالعان شاحماتتى دامىتۋدىڭ جول كارتاسى» اياسىندا تۇركىستان وبلىسىندا ناقتى ءارى ناتيجەلى جۇمىستار اتقارىلىپ كەلەدى.

قازىرگى تاڭدا وبلىستاعى 20 سپورت مەكەمەسىندە 97 جاتتىقتىرۋشى 2 مىڭنان اسا شاحماتشىمەن تۇراقتى وقۋ-جاتتىعۋ ساباقتارىن جۇرگىزۋدە. سونىمەن قاتار وڭىردە 11 شاحمات ءۇيى اشىلىپ، كوپقاباتتى تۇرعىن ۇيلەردىڭ اۋلالارى مەن ساياباقتارىندا اشىق شاحمات الاڭدارى ورناتىلدى. بۇل – شاحماتتى بۇقارالىق دەڭگەيدە دامىتۋعا باعىتتالعان ماڭىزدى باستاما. تۇركىستان وبلىسى سوڭعى جىلدارى شاحماتتان رەسپۋبليكالىق جانە حالىقارالىق جارىستاردى ۇيىمداستىراتىن ورتالىقتاردىڭ بىرىنە اينالدى. تۇراقتى قولداۋدىڭ ارقاسىندا ءوڭىر شاحماتشىلارىنىڭ جەتىستىكتەرى دە كوبەيۋدە. اتاپ ايتار بولساق، اسىلحان اسيا قارىنداسىمىز 2024 جىلعى الەم چەمپيوناتىنىڭ كۇمىس جۇلدەگەرى، 2025 جىلعى ازيا چەمپيونى اتاندى. سۇلتانحان نۇريسلام جاسوسپىرىمدەر اراسىندا الەم چەمپيوناتىنىڭ كۇمىس جۇلدەگەرى بولدى. باسقا دا جاس سپورتشىلارىمىز ءتۇرلى جارىستاردا جەڭىستەرىمەن قۋانتىپ ءجۇر. تۇركىستانداعى دودا جاڭا تالانتتاردىڭ اشىلۋىنا جانە وتاندىق شاحماتتىڭ دامۋىنا سەرپىن بەرەدى دەپ سەنەمىن. جارىسقا قاتىسۋشىلارعا ساتتىلىك، ءادىل ويىن جانە جەڭىس تىلەيمىن! – دەدى نۇرالحان كوشەروۆ.

شاحمات فەدەراتسياسىنىڭ ۆيتسە-پرەزيدەنتى مارات ەسەنوۆ تۇركىستان تورىندەگى جارىستىڭ ۇيىمداستىرىلۋ دەڭگەيىن جاقسى باعالادى. شاحمات فەدەراتسياسىنىڭ پرەزيدەنتى تيمۋر تۋرلوۆتىڭ ىستىق سالەمىن جەتكىزىپ، وسى چەمپيونات ارقىلى قازاقستاننىڭ جاسوسپىرىمدەر قۇراماسى جاساقتالاتىنىن ايتتى.

ودان كەيىن وبلىس اكىمى مەن شاحمات فەدەراتسياسىنىڭ ۆيتسە-پرەزيدەنتى جاسوسپىرىمدەر اراسىندا توپ جارىپ جۇرگەن چەمپيوندارمەن بىرگە چەمپيوناتتىڭ العاشقى ءجۇرىسىن جاسادى. تانىمال چەمپيوندار ءوز قولتاڭبالارى قويىلعان شاحمات تاقتاسىن ءوڭىر باسشىسىنا سالتاناتتى تۇردە تاپسىردى.

شاحمات فەدەراتسياسى، تۋريزم جانە سپورت مينيسترلىگى، تۇركىستان وبلىسى اكىمدىگىنىڭ قولداۋىمەن وتكىزىلىپ جاتقان چەمپيونات 10 كۇنگە سوزىلادى. اتاپ ايتقاندا، ۇلدار جانە قىزدار اراسىندا 6، 8، 10، 12، 14، 16 جانە 18  جاسقا دەيىنگى ساناتتار بويىنشا كلاسسيكا، راپيد جانە بليتس تۇرلەرىنەن مەدالدار ساراپقا سالىنادى. چەمپيوندار مەن جۇلدەگەرلەر مەدال، ديپلوم جانە اقشالاي سىياقىلارمەن ماراپاتتالادى. جارىستىڭ جلپى جۇلدە قورى – 15 ملن 120 مىڭ تەڭگە. ءار جاس ساناتى بويىنشا ءبىرىنشى ورىنعا – 250 مىڭ، ەكىنشى ورىنعا  – 150 مىڭ، ءۇشىنشى ورىنعا – 100 مىڭ تەڭگە تاپسىرىلادى.

بىلتىر جاسوسپىرىمدەر مەن مەكتەپ وقۋشىلارى  الەم، ازيا  چەمپيوناتتارىندا 122 مەدال جەڭىپ الدى (52 التىن، 32 كۇمىس جانە 38 قولا).  سول چەمپيوندار تۇركىستانداعى چەمپيوناتتا ءوز مىقتىلىعىن دالەلدەۋ ءۇشىن تاعى دا سىنعا ءتۇسىپ جاتىر. ەل چەمپيوندارى مەن جۇلدەگەرلەرى قازاقستان قۇراماسى ساپىندا حالىقارالىق دودالارعا قاتىسادى.