Saıypqyran. Jas balýannyń jarqyn jeńisi

Aqtaý qalasynda dzıýdodan jasóspirimder arasynda ótken Qazaqstan chempıonatynda aýdanymyzdyń maqtanyshy Raýan Ǵazızov jaqsy nátıje kórsetti.

Eldiń túkpir-túkpirinen jınalǵan dodada jas balýan Ereımentaý aýdanynyń abyroıyn asqaqtatty.

Chempıonatta ol alty ret bozkilemge shyǵyp, sonyń beseýinde jeńiske jetip, tek bir beldesýde ǵana jeńilis tapty. Raýan fınalda Qyzylorda oblysynyń balýanymen kúsh synasty. Tartysqa toly beldesýler jas sportshynyń jarysqa daıyndyǵyn, tabandylyǵyn jáne jeńiske degen jigerin aıqyn kórsetti.

Jerlesimiz 2009 jyly Ereımentaý qalasynda týǵan. Ol kúrespen 6 jasynan bastap, ıaǵnı 2015 jyldan beri turaqty túrde aınalysyp keledi. Jas bolsa da, sporttaǵy joly erte bastalyp, úlken eńbek pen tózimdiliktiń arqasynda búgingi bıik belesterge jetip otyr.

Aıta keterligi, bul jas sanatynda Ereımentaý aýdany sportshylary sońǵy ret 2019 jyly Qostanaı qalasynda júldeli oryn alǵan bolatyn. Sol jyly Oljas Erenǵaıypov Qazaqstan chempıonatynda úshinshi oryn ıelengen edi. Endi mine, araǵa birneshe jyl salyp, aýdanymyz taǵy da respýblıkalyq jarysta óz myqtysyn tanytyp otyr.

-Men 2009 jyly 20 qańtarda  Aqmola oblysy, Ereımentaý aýdanynda qarapaıym otbasynda dúnıege keldim. Ákem Baýyrjan Ǵazızuly Muhamedjanov temirjol salasynda 25 jyldan astam eńbek etip keledi. Anam  Jarylqasyn Eleýsinqyzy Bıtaqova mektepte muǵalim,  ulaǵatty ustaz. Otbasymyzda 3 er bala bar. Men — ortanshysymyn.

Aýdanymyzdyń Nasyr Smaǵulov atyndaǵy mektep lıeıiniń  tabaldyryǵyn attap, bilimge qadam bastadym. 1-synyptan bastap kúreske degen qyzyǵýshylyǵym oıanyp, Sársenbek  О́tepov aǵaıǵa shákirt bolyp jattyǵýdy bastap kettim. Kóptegen aýdandyq, oblystyq, respýblıkalyq jarystarǵa qatysa otyryp, meniń sportqa degen qyzyǵýshylyǵym arta tústi.

6-synypty aıaqtaǵannan keıin. Qajymuqan Muńaıtpasov atyndaǵy Olımpıada rezerviniń respýblıkalyq mamandandyrylǵan mektep-ınternat-kolledjine 7-synyp oqýshysy bolyp qabyldandym. Qazir bilim ordasynyń 11-synybynda oqımyn.  Sportpen shuǵyldaný ár túli qasıetterdi  talap etedi. Olar dene daıyndyǵy, kóńil-kúı daıyndyǵy jáne tapqyrlyq. Sport arqyly  men shydamdylyqty, tózimdilikti, jeńilgen jaǵdaıda moıymaı, alǵa qaraı umtylýdy úırendim. Alǵa qoıǵan maqsat, armandarym kóp. Soǵan jetý jolyńda erinbeı eńbek etip, bar kúsh jigerimdi salamyn, — dedi ol.

Jas balýannyń ózi aıtqandaı, bul jetistiginde bilikti jattyqtyrýshylardyń eńbegi zor. Ony sporttyq sheberlikke baýlyp, úlken dodaǵa daıyndaǵan jattyqtyrýshylar — Samat Tileýbergenov pen Erhan Ǵabbasov. Olar shákirtiniń ár beldesýine jan-jaqty daıyndalyp, senim men jiger syılaı bildi.

Bul jeńis — tek bir sportshynyń ǵana emes, Ereımentaý aýdanynyń sport salasyndaǵy úlken jetistigi. Jasóspirim balýanymyz — aýdanymyzdyń shynaıy maqtanyshy, óskeleń urpaqqa úlgi bolar sportshy.

Bahtııar JEPENOV,

Ereımentaý aýdany ákiminiń baspasóz hatshysy