SportPress.kz قازاقستان سپورت جاڭالىقتارى
ساناۋلى كۇندەردەن كەيىن يتاليانىڭ ميلان جانە كورتينا-د’امپەتستسو قالالارىندا XXV قىسقى وليمپيا ويىندارى باستالادى. ءتورت جىلدىقتىڭ باستى دوداسىنا الەمنىڭ 93 ەلىنەن 3 500-دەن استام سپورتشى قاتىسادى دەپ جوسپارلانعان، دەپ حابارلادى تۋريزم جانە سپورت مينيسترلىگى.
قازاقستان تاۋەلسىز مەملەكەت رەتىندە بيىلعى قىسقى وليمپياداعا توعىزىنشى مارتە قاتىسادى. ۇلتتىق قۇراما ساپىنان يتالياداعى دودادا جالپى سانى 36 سپورتشى (18 ەر، 18 ايەل) ەل نامىسىن قورعايدى. سالىستىرۋ ءۇشىن ايتا كەتسەك، بۇدان ءتورت جىل بۇرىن قىتايدىڭ بەيجىڭ قالاسىندا وتكەن قىسقى وليمپياداعا قازاقستان اتىنان 34 سپورتشى (17 ەر، 17 ايەل) باق سىناعان ەدى.
وسى ورايدا نازارلارىڭىزعا قىسقى وليمپيادادا قازاقستان نامىسىن قاي وڭىردەن نەشە سپورتشى قورعايتىنىن ۇسىنامىز.
-وزدەرىڭىزگە ءمالىم، ەلىمىزدە قىسقى سپورت تۇرلەرى نەگىزىنەن سولتۇستىك جانە شىعىس وڭىرلەردە جاقسى دامىعان. دەگەنمەن وليمپياداعا قاتاڭ كليماتى مەن قالىڭ قارى بار وڭىرلەرمەن قاتار، قارى از وڭتۇستىك ايماقتاردان دا سپورتشىلار قاتىسادى.
وڭىرلەر بويىنشا يتالياداعى قىسقى وليمپياداعا ەڭ كوپ سپورتشىنى الماتى قالاسى مەن اقمولا وبلىسى ۇسىنىپ وتىر. وڭتۇستىك استانادان ميلانعا 4 سپورت تۇرىنەن 6 سپورتشى اتتانادى. ال اقمولادان 2 سپورت تۇرىنەن 6 سپورتشى بارادى، — دەلىنگەن حابارلامادا.
كەيىنگى ورىندارعا شىعىس قازاقستان، الماتى وبلىستارى، سونداي-اق استانا جانە شىمكەنت قالالارى جايعاسقان. شىعىس قازاقستان وبلىسى مەن شىمكەنت قالاسىنان 1 سپورت تۇرىنەن 4 سپورتشىدان قاتىسسا، استانا قالاسىنان 3 سپورت تۇرىنەن 4 سپورتشى، الماتى وبلىسىنان 4 سپورتشى 2 سپورت تۇرىنەن ونەر كورسەتەدى.
سونداي-اق، پاۆلودار وبلىسىنان 3 سپورتشى (3 سپورت ءتۇرى)، قوستاناي وبلىسىنان 2 سپورتشى (1 سپورت ءتۇرى)، سونداي-اق سولتۇستىك قازاقستان، قاراعاندى جانە اباي وبلىستارىنان ءبىر-بىردەن (1 سپورت ءتۇرى) سپورتشى ونەر كورسەتەدى.
XXV قىسقى وليمپيا ويىندارى 6-22 اقپان كۇندەرى بولادى.
