Mılan-2026: qysqy Olımpıadaǵa qaı óńirden neshe sportshy barady?

Sanaýly kúnderden keıin Italııanyń Mılan jáne Kortına-d’Ampeo qalalarynda XXV qysqy Olımpııa oıyndary bastalady. Tórt jyldyqtyń basty dodasyna álemniń 93 elinen 3 500-den astam sportshy qatysady dep josparlanǵan, dep habarlady Týrızm jáne sport mınıstrligi.

Qazaqstan táýelsiz memleket retinde bıylǵy qysqy Olımpıadaǵa toǵyzynshy márte qatysady. Ulttyq qurama sapynan Italııadaǵy dodada jalpy sany 36 sportshy (18 er, 18 áıel) el namysyn qorǵaıdy. Salystyrý úshin aıta ketsek, budan tórt jyl buryn Qytaıdyń Beıjiń qalasynda ótken qysqy Olımpıadaǵa Qazaqstan atynan 34 sportshy (17 er, 17 áıel) baq synaǵan edi.

Osy oraıda nazarlaryńyzǵa qysqy Olımpıadada Qazaqstan namysyn qaı óńirden neshe sportshy qorǵaıtynyn usynamyz.

-О́zderińizge málim, elimizde qysqy sport túrleri negizinen soltústik jáne shyǵys óńirlerde jaqsy damyǵan. Degenmen Olımpıadaǵa qatań klımaty men qalyń qary bar óńirlermen qatar, qary az ońtústik aımaqtardan da sportshylar qatysady.

О́ńirler boıynsha Italııadaǵy qysqy Olımpıadaǵa eń kóp sportshyny Almaty qalasy men Aqmola oblysy usynyp otyr. Ońtústik astanadan Mılanǵa 4 sport túrinen 6 sportshy attanady. Al Aqmoladan  2 sport túrinen 6 sportshy barady, — delingen habarlamada.

Keıingi oryndarǵa Shyǵys Qazaqstan, Almaty oblystary, sondaı-aq Astana jáne Shymkent qalalary jaıǵasqan. Shyǵys Qazaqstan oblysy men Shymkent qalasynan 1 sport túrinen 4 sportshydan qatyssa, Astana qalasynan 3 sport túrinen 4 sportshy, Almaty oblysynan 4 sportshy 2 sport túrinen óner kórsetedi.

Sondaı-aq, Pavlodar oblysynan 3 sportshy (3 sport túri), Qostanaı oblysynan 2 sportshy (1 sport túri), sondaı-aq Soltústik Qazaqstan, Qaraǵandy jáne Abaı oblystarynan bir-birden (1 sport túri) sportshy óner kórsetedi.

XXV qysqy Olımpııa oıyndary 6-22 aqpan kúnderi bolady.