SportPress.kz قازاقستان سپورت جاڭالىقتارى
يتاليانىڭ ميلان–كورتينا-د’امپەتستسو قالالارىندا وتەتىن قىسقى وليمپيا ويىندارىنىڭ باستالۋىنا 10 كۇن قالدى، دەپ حابارلادى تۋريزم جانە سپورت مينيسترلىگى.
ءتورت جىلدىقتىڭ باستى دوداسىندا قازاقستان ۇلتتىق قۇراماسى سپورتتىڭ 10 ديستسيپليناسى بويىنشا باق سىنايدى. ەل نامىسىن بارلىعى 36 سپورتشى قورعايدى. ونىڭ ىشىندە 18 ەر جانە 18 ايەل سپورتشى بار.
ۇلتتىق قۇرامانىڭ ورتاشا جاسى – 25 جاس. كوماندا ساپىنداعى ەڭ جاس سپورتشى – فريستايل-اكروباتيكادان سىنعا تۇسەتىن اسان اسىلحان، ول نەبارى 16 جاستا. ال ەڭ تاجىريبەلى ءارى جاسى ۇلكەن سپورتشى – شورت-ترەكتەن ەل نامىسىن قورعايتىن ابزال اجعاليەۆ، جاسى 33-تە.
قۇراماداعى ەڭ تاجىريبەلى سپورتشىلاردىڭ ءبىرى – فريستايل-موگۋل شەبەرى يۋليا گالىشەۆا. ول 2018 جىلعى وليمپيا ويىندارىنىڭ قولا جۇلدەگەرى. سونداي-اق، سپورتشى 2010، 2014، 2018 جانە 2022 جىلدارداعى وليمپياداعا قاتىسقان.
قىسقى وليمپيا ويىندارى 2026 جىلعى 6–22 اقپان ارالىعىندا يتاليادا بولادى. ءدۇبىرلى دوداعا الەمنىڭ 93 ەلىنەن 3 500-دەن استام سپورتشى قاتىسادى دەپ جوسپارلانعان.
