Qysqy Olımpııa oıyndarynyń bastalýyna 10 kún qaldy

Italııanyń Mılan–Kortına-d’Ampeo qalalarynda ótetin Qysqy Olımpııa oıyndarynyń bastalýyna 10 kún qaldy, dep habarlady Týrızm jáne sport mınıstrligi.

Tórt jyldyqtyń basty dodasynda Qazaqstan ulttyq quramasy sporttyń 10 dısıplınasy boıynsha baq synaıdy. El namysyn barlyǵy 36 sportshy qorǵaıdy. Onyń ishinde 18 er jáne 18 áıel sportshy bar.

Ulttyq quramanyń ortasha jasy – 25 jas. Komanda sapyndaǵy eń jas sportshy – frıstaıl-akrobatıkadan synǵa túsetin Asan Asylhan, ol nebári 16 jasta. Al eń tájirıbeli ári jasy úlken sportshy – short-trekten el namysyn qorǵaıtyn Abzal Ajǵalıev, jasy 33-te.

Quramadaǵy eń tájirıbeli sportshylardyń biri – frıstaıl-mogýl sheberi Iýlııa Galysheva. Ol 2018 jylǵy Olımpııa oıyndarynyń qola júldegeri. Sondaı-aq, sportshy 2010, 2014, 2018 jáne 2022 jyldardaǵy Olımpıadaǵa qatysqan.

Qysqy Olımpııa oıyndary 2026 jylǵy 6–22 aqpan aralyǵynda Italııada bolady. Dúbirli dodaǵa álemniń 93 elinen 3 500-den astam sportshy qatysady dep josparlanǵan.