ەربول حاميتوۆ الەم كۋبوگىندا تاعى ءبىر مەدال الدى

پولشانىڭ ياكۋشيتسە قالاسىندا تىرەك-قيمىل اپپاراتى جانە كورۋ قابىلەتى زاقىمدانعان سپورتشىلار اراسىندا ءوتىپ جاتقان پارا شاڭعى جارىسىنان الەم كۋبوگىنىڭ كەزەڭىندە ەربول حاميتوۆ (LW12) 6 كم قاشىقتىقتى 18 مينۋت 24 سەكۋندتا ءجۇرىپ ءوتىپ، كۇمىس جۇلدەگە يە بولدى، دەپ حابارلادى تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ «دەنە مۇمكىندىكتەرى شەكتەۋلى ادامداورعا ارنالعان سپلرتتىق دايارلاۋ ورتالىعى» رمقك.

التىن جۇلدەنى يتاليانىڭ سپورتشى دجۋزەپپە رومەل (18:02) جەڭىپ السا، قولا جۇلدە ۋكراينالىق پاۆەل بالگە (18:27) بۇيىردى.

بۇل – ەربول حاميتوۆتىڭ پارا شاڭعى جارىسىنان الەم كۋبوگىنداعى ەكىنشى كۇمىس جۇلدەسى. بۇعان دەيىن ول 1 كم سپرينتتىك جارىستا دا كۇمىس جۇلدەگەر اتانعان بولاتىن.

پارا شاڭعى جارىسىنان الەم كۋبوگى كەزەڭى 28 قاڭتار باستالعان. ول 1 اقپانعا دەيىن بولادى. دوداعا الەمنىڭ 25 ەلىنەن 300-گە جۋىق سپورتشى قاتىسىپ جاتىر.

قازاقستان ۇلتتىق قۇراماسى ساپىندا الەكساندر گەرليتس (LW6)، سەرگەي ۋسولتسەۆ (LW12)، نۇرلان ءالىموۆ (LW6)، يۋري بەرەزين (LW12)، ۆلاديسلاۆ كوبال (LW8)، رومان كۋربانوۆ (NS3)، اننا گراچوۆا (NS3) پەن دەنيس زينوۆ (LW3) بار. الداعى كۇندەرى سپورتشىلار 10 كم كلاسسيكالىق جانە 10 كم جاپپاي ستارت جارىستارىندا باق سىنايدى.

جارىس ميلان–كورتين–2026 XIV قىسقى پاراليمپيا ويىندارىنا جولداما بەرەتىن رەيتينگتىك جارىستار قاتارىنا كىرەدى.