ميحايل شايدوروۆ – وليمپيا ويىندارىنىڭ چەمپيونى!

بۇگىن تۇندە يتاليانىڭ ميلان مەن كورتينا-د’امپەتستسو قالالارىندا ءوتىپ جاتقان XXV قىسقى وليمپيا ويىندارىنان قۋانىشتى حابار كەلىپ جەتتى.

مۇندا مانەرلەپ سىرعاناۋدان ەركىن باعدارلامادا ەرلەر اراسىندا وتكەن جەكەلەي باسەكەدە 21 جاستاعى جاس تاانت ميحايل شايدوروۆ جارىس جولىنا شىعىپ، وليمپيادا چەمپيونى اتاندى.

ول قازاقتىڭ الەمگە ايگىلى ءانشىسى ديماش قۇدايبەرگەننىڭ ورىنداۋىنداعى «Confessa» مەن «The Diva Dance» ءانىن تاڭداپ، مۇز ايدىندا ەركىن كوسىلدى.  جاس تالانت العاشقى تەحنيكالىق ەلەمەنتكە ۇشتىك اكسەل، ءبىر ەيلەر جانە تورتتىك سالحاۋ جاساپ، ءساتتى ورىنداپ شىقتى.

ءسويتىپ، ول تەحنيكالىق ەلەمەنتتەر ورىنداۋدان 114.68 ۇپاي، ال باعدارلاما كومپونەنتتەرىن ورىنداۋدا 83.96 ۇپايعا يە بولدى. وسىنىڭ ناتيجەسىندە سپورتشى قىسقا باعدارلاماداعى 92.94 ۇپاي جانە ەركىن باعدارلاماداعى 198.64 ۇپايدى قوسقاندا 291.58 ۇپايمەن وليمپيا ويىندارىنىڭ التىن جۇلدەسىن جەڭىپ الدى.

ەكىنشى جانە ءۇشىنشى ورىندا كۇنشىعىس ەلىنىڭ وكىلدەرىنە بۇيىردى. جاپون يۋما كاگياما مەن سيۋن ساتو جۇلدەگەرلەر قاتارىنان كورىندى.

ميحايل شايدوروۆتىڭ بۇل جۇلدەسى – بيىلعى دوداداعى العاشقى التىن جۇلدە بولسا، قازاقستان تاريحىنداعى ەكىنشى التىن مەدال. ول اراعا 32 جىل سالىپ، قۇرمەت تۇعىرىنىڭ ەڭ بيىك ساتىسىنا شىقتى. وعان دەيىن 1994 جىلى نورۆەگيانىڭ ليللەحاممەر قالاسىندا جالاۋى جەلبىرەگەن جارىستا شاڭعىشى الەكساندر ۆينوكۋروۆ التىن مەدالدى موينىنا تاققان بولاتىن.

تاعى ءبىر ايتاتىن نارسە، بۇل جۇلدە سوڭعى 8 جىلدا كەلىپ جەتكەن مەدال. قازاقستان سوڭعى رەت 2018 جىلى وڭتۇستىك كورەيانىڭ پحەنچحان قالاسىندا وتكەن قىسقى ويىنداردا 1 قولا مەدال يەلەندى. جۇلدەنى فريستايل-موگۋل سپورتىنان يۋليا گالىشەۆا جەڭىپ الىپ، ەلىمىزدىڭ قورجىنىنا جالعىز مەدالدى سالعان ەدى. ال مانەرلەپ سىرعاناۋ جارىسىنان سوڭعى رەت دەنيس تەن 2014 جىلى سوچي وليمپياداسىندا قولا مەدال جەڭىپ الدى.

بيىلعى دودادا ميحايل شايدوروۆ قىسقا باعدارلامادا بەسىنشى ورىن الىپ، اقش قۇراماسىنىڭ وكىلى يليا مالينين ءبىرىنشى ورىنعا يە بولعان ەدى. الايدا، ەركىن باعدارلامادا وتانداسىمىز جۇيكەگە سىر بەرمەي، بارلىق ەلەمەنتتەردى ءساتتى ورىنداپ، ەڭ كوپ ۇپاي جينادى. مالينين ەركىن باعدارلامادا قوباجىپ، لايىقتى ونەر كورسەتە الماي 8-ورىنعا ءتۇسىپ قالدى. مۇنداي جاعداي بارلىق سپورتشىدا بولادى. ال وتانداسىمىز پسيحولوگيالىق جاعىنان دا دايىن بولىپ شىقتى.

وسى جارىستان كەيىن تۋريزم جانە سپورت ءمينيسترى ەربول مىرزابوسىنوۆ مەن ۇلتتىق وليمپيادا كوميتەتىنىڭ توراعاسى گەننادي گولوۆكين چەمپيون ميحايل شايدوروۆتى ارنايى قۇتتىقتادى.

مينيستر مىرزابوسىنوۆ ۇستىنە كوك تۋدى جامىلعان وليمپيادا چەمپيونىن قولىڭ قىسىپ، قۇشاقتاپ، قۇتتى بولسىن ايتتى.

-قۇتتى بولسىن! جەڭىس قۇتتى بولسىن!، — دەدى ول.

وليمپيا ويىندارىنىڭ كۇمىس جۇلدەگەرى، اتى اڭىزعا اينالعان بوكسشى جاس تالانتقا ونىڭ التىن مەدالىن قولىنا ۇستاپ تۇرىپ، ءوزىنىڭ اقىل-كەڭەسىن ايتتى.

— ەڭ الدىمەن قۇتتى بولسىن ايتامىن. ەندى ءسىز وليمپيادا وتباسىنداسىز. وسىمەن ماقتانىڭىز، — دەدى ول.

سودان كەيىن چەمپيوننىڭ جۇلدەسىنىڭ ەكىنشى جاعىن كورسەتىپ بىلاي دەدى:

-بىراق بۇل مەدالدىڭ دا ەكى جاعى بار. ادام بولىپ قالا بەرىڭىز. وليمپيادا چەمپيونى بولۋ — ۇلكەن جاۋاپكەرشىلىك، — دەدى گولوۆكين.

سونىمەن بىرگە ول سپورتشىعا ادامنىڭ مەرەيىن، بەلەدىن قوعام الدىندا التىن مەدال ەمەس، ونىڭ ادامگەرشىلىگى عانا وسىرەتىنىن ەسكەرتتى.

شايدوروۆ ءوز كەزەگىندە مينيستر ەربول مىرزابوسىنوۆ پەن گەننادي گولوۆكينگە جانە ولارمەن بىرگە كەلگەن بارشا ازاماتقا العىسىن ايتتى.

— مەن بارلىق قازاقستاندىقتارعا ۇلكەن العىس ايتقىم كەلەدى. ارينە، سپورت بولعان سوڭ ءارتۇرلى پىكىرلەر بولادى. كوپ ادام ماعان قىسىم بولادى دەپ ويلادى. بىراق ءبارى كەرىسىنشە بولدى. بۇل مەنى شىنىمەن جىگەرلەندىرىپ، كۇش بەردى. مەن تەك كۇرەسكىم كەلەدى. سول ءۇشىن سوڭىنا دەيىن كۇرەستىم، — دەدى سپورتشى.

سودان كەيىن ول بارلىق قازاقستان حالقىنا سالەمىن جولدادى. بۇگىن بەلگىلى بولعان تاعى ءبىر جاڭالىق، مەملەكەت باسشىسى قاسىم-جومارت توقاەۆ وليمپيادا چەمپيونى ميحايل شايدوروۆتى II دارەجەلى «بارىس» وردەنىمەن ماراپاتتايدى. بۇل تۋرالى اقوردانىڭ ءباسپاسوز قىزمەتى حابارلادى.

— قاسىم-جومارت توقاەۆ ميحايل شايدوروۆقا جوعارى شەبەرلىگى، جەڭىسكە دەگەن ەرىك-جىگەرى ءۇشىن العىس ايتتى. مەملەكەت باسشىسى بارشا سپورت سۇيەر قاۋىم مەن ەل ازاماتتارى سپورتشىنىڭ ايتۋلى جەتىستىگىن ماقتان تۇتاتىنىن جەتكىزدى. قاسىم-جومارت توقاەۆ ميحايل شايدوروۆتى II دارەجەلى «بارىس» وردەنىمەن ماراپاتتاۋ تۋرالى شەشىم قابىلدادى. سونداي-اق جاتتىقتىرۋشىلارعا، ءتيىستى مينيسترلىككە اتقارعان جۇمىسى ءۇشىن ريزاشىلىق ءبىلدىردى. پرەزيدەنت وليمپيادا چەمپيونىنا تولايىم تابىس پەن جەڭىس تىلەدى، — دەلىنگەن حابارلامادا.

قازىر قولدا بار دەرەككە قاراعاندا، قازاقستان وليمپيادادا جالپى ەسەپتە 15-ورىنعا كوتەرىلدى.

 

داستان كەنجالين،

استانا