Mıhaıl Shaıdorov – Olımpııa oıyndarynyń chempıony!

Búgin túnde Italııanyń Mılan men Kortına-d’Ampeo qalalarynda ótip jatqan XXV qysqy Olımpııa oıyndarynan qýanyshty habar kelip jetti.

Munda mánerlep syrǵanaýdan erkin baǵdarlamada erler arasynda ótken jekeleı básekede 21 jastaǵy jas taant Mıhaıl Shaıdorov jarys jolyna shyǵyp, Olımpıada chempıony atandy.

Ol qazaqtyń álemge áıgili ánshisi Dımash Qudaıbergenniń oryndaýyndaǵy «Confessa» men «The Diva Dance» ánin tańdap, muz aıdynda erkin kósildi.  Jas talant alǵashqy tehnıkalyq elementke úshtik aksel, bir eıler jáne tórttik salhaý jasap, sátti oryndap shyqty.

Sóıtip, ol tehnıkalyq elementter oryndaýdan 114.68 upaı, al baǵdarlama komponentterin oryndaýda 83.96 upaıǵa ıe boldy. Osynyń nátıjesinde sportshy qysqa baǵdarlamadaǵy 92.94 upaı jáne erkin baǵdarlamadaǵy 198.64 upaıdy qosqanda 291.58 upaımen Olımpııa oıyndarynyń altyn júldesin jeńip aldy.

Ekinshi jáne úshinshi orynda Kúnshyǵys eliniń ókilderine buıyrdy. Japon Iýma Kagııama men Sıýn Sato júldegerler qatarynan kórindi.

Mıhaıl Shaıdorovtyń bul júldesi – bıylǵy dodadaǵy alǵashqy altyn júlde bolsa, Qazaqstan tarıhyndaǵy ekinshi altyn medal. Ol araǵa 32 jyl salyp, qurmet tuǵyrynyń eń bıik satysyna shyqty. Oǵan deıin 1994 jyly Norvegııanyń Lıllehammer qalasynda jalaýy jelbiregen jarysta shańǵyshy Aleksandr Vınokýrov altyn medaldi moınyna taqqan bolatyn.

Taǵy bir aıtatyn nárse, bul júlde sońǵy 8 jylda kelip jetken medal. Qazaqstan sońǵy ret 2018 jyly Ońtústik Koreıanyń Phenchhan qalasynda ótken qysqy oıyndarda 1 qola medal ıelendi. Júldeni frıstaıl-mogýl sportynan Iýlııa Galysheva jeńip alyp, elimizdiń qorjynyna jalǵyz medaldy salǵan edi. Al mánerlep syrǵanaý jarysynan sońǵy ret Denıs Ten 2014 jyly Sochı Olımpıadasynda qola medal jeńip aldy.

Bıylǵy dodada Mıhaıl Shaıdorov qysqa baǵdarlamada besinshi oryn alyp, AQSh quramasynyń ókili Ilıa Malının birinshi orynǵa ıe bolǵan edi. Alaıda, erkin baǵdarlamada otandasymyz júıkege syr bermeı, barlyq elementterdi sátti oryndap, eń kóp upaı jınady. Malının erkin baǵdarlamada qobajyp, laıyqty óner kórsete almaı 8-orynǵa túsip qaldy. Mundaı jaǵdaı barlyq sportshyda bolady. Al otandasymyz psıhologııalyq jaǵynan da daıyn bolyp shyqty.

Osy jarystan keıin týrızm jáne sport mınıstri Erbol Myrzabosynov men Ulttyq Olımpıada komıtetiniń tóraǵasy Gennadıı Golovkın chempıon Mıhaıl Shaıdorovty arnaıy quttyqtady.

Mınıstr Myrzabosynov ústine kók týdy jamylǵan Olımpıada chempıonyn qolyń qysyp, qushaqtap, qutty bolsyn aıtty.

-Qutty bolsyn! Jeńis qutty bolsyn!, — dedi ol.

Olımpııa oıyndarynyń kúmis júldegeri, aty ańyzǵa aınalǵan boksshy jas talantqa onyń altyn medalin qolyna ustap turyp, óziniń aqyl-keńesin aıtty.

— Eń aldymen qutty bolsyn aıtamyn. Endi siz Olımpıada otbasyndasyz. Osymen maqtanyńyz, — dedi ol.

Sodan keıin chempıonnyń júldesiniń ekinshi jaǵyn kórsetip bylaı dedi:

-Biraq bul medaldiń da eki jaǵy bar. Adam bolyp qala berińiz. Olımpıada chempıony bolý — úlken jaýapkershilik, — dedi Golovkın.

Sonymen birge ol sportshyǵa adamnyń mereıin, beledin qoǵam aldynda altyn medal emes, onyń adamgershiligi ǵana ósiretinin eskertti.

Shaıdorov óz kezeginde mınıstr Erbol Myrzabosynov pen Gennadıı Golovkınge jáne olarmen birge kelgen barsha azamatqa alǵysyn aıtty.

— Men barlyq qazaqstandyqtarǵa úlken alǵys aıtqym keledi. Árıne, sport bolǵan soń ártúrli pikirler bolady. Kóp adam maǵan qysym bolady dep oılady. Biraq bári kerisinshe boldy. Bul meni shynymen jigerlendirip, kúsh berdi. Men tek kúreskim keledi. Sol úshin sońyna deıin kúrestim, — dedi sportshy.

Sodan keıin ol barlyq Qazaqstan halqyna sálemin joldady. Búgin belgili bolǵan taǵy bir jańalyq, memleket basshysy Qasym-Jomart Toqaev Olımpıada chempıony Mıhaıl Shaıdorovty II dárejeli «Barys» ordenimen marapattaıdy. Bul týraly Aqordanyń baspasóz qyzmeti habarlady.

— Qasym-Jomart Toqaev Mıhaıl Shaıdorovqa joǵary sheberligi, jeńiske degen erik-jigeri úshin alǵys aıtty. Memleket basshysy barsha sport súıer qaýym men el azamattary sportshynyń aıtýly jetistigin maqtan tutatynyn jetkizdi. Qasym-Jomart Toqaev Mıhaıl Shaıdorovty II dárejeli «Barys» ordenimen marapattaý týraly sheshim qabyldady. Sondaı-aq jattyqtyrýshylarǵa, tıisti mınıstrlikke atqarǵan jumysy úshin rızashylyq bildirdi. Prezıdent Olımpıada chempıonyna tolaıym tabys pen jeńis tiledi, — delingen habarlamada.

Qazir qolda bar derekke qaraǵanda, Qazaqstan Olımpıadada jalpy esepte 15-orynǵa kóterildi.

 

Dastan KENJALIN,

ASTANA