بوزكىلەمدەگى باسەكە: تارازدا تالانتتار تانىلدى

تاراز قالاسىندا گرەك-ريم، ەركىن جانە ايەلدەر كۇرەسىنەن U15 جانە U23 اراسىنداعى قازاقستان چەمپيوناتى ءوز مارەسىنە جەتتى. ون كۇنگە سوزىلعان چەمپيوناتقا ەلىمىزدىڭ بارلىق وڭىرلەرىنەن كەلگەن 2 034 جاس بالۋان قاتىستى، دەپ حابارلادى قازاقستان كۇرەس فەدەراتسياسىنىڭ ءباسپاسوز قىزمەتى.

اتالعان دودا جاس سپورتشىلاردىڭ شەبەرلىگىن شىڭداپ، بولاشاق ۇلتتىق قۇراما ساپىنا ۇمىتكەر بالۋانداردى انىقتاۋدا ماڭىزدى جارىستاردىڭ ءبىرى سانالادى. ءار سالماق دارەجەسىندە ۇزدىك شىققان سپورتشىلار قازاقستان قۇراماسىنىڭ قاتارىنا قوسىلىپ، رەسمي چەمپيوناتتاردا ەل نامىسىن قورعايدى.

جارىس اياسىندا گرەك-ريم، ەركىن جانە ايەلدەر كۇرەسى بويىنشا جالپىكوماندالىق ەسەپ قورىتىندىلارى شىعارىلدى. جۇلدەلى ورىندارعا ىلىككەن وڭىرلەردىڭ مەدال كورسەتكىشى ولاردىڭ دايىندىق دەڭگەيىن ايقىن اڭعارتادى. ماسەلەن، تۇركىستان وبلىسىنىڭ قۇراماسى 19 التىن، 16 كۇمىس جانە 19 قولا مەدال ەنشىلەپ، بىرنەشە باعىتتا كوشباسشىلىقتى بەكەمدەدى. الماتى وبلىسى 10 التىن، 6 كۇمىس، 10 قولا مەدالمەن تۇراقتى ناتيجەسىن كورسەتتى. اتىراۋ وبلىسىنىڭ قورجىنىندا 6 التىن، 5 كۇمىس، 6 قولا جۇلدە بولسا، جامبىل وبلىسى 7 التىن، 4 كۇمىس، 7 قولا مەدالدى جەڭىپ الدى. الماتى قالاسىنىڭ بالۋاندارى 7 التىن، 4 كۇمىس، 6 قولا مەدال يەلەنىپ، چەمپيوناتقا جاقسى دايىندىقپەن كەلگەنىن دالەلدەدى. ال شىعىس قازاقستان مەن قاراعاندى وبلىستارى تيىسىنشە 2 التىن، 3 كۇمىس، 3 قولا مەدالدان ەنشىلەدى.

اتاپ ايتقاندا، قازاقستان كۇرەس فەدەراتسياسىنىڭ سپورت ديرەكتورى جاندوس سايحانوۆ ءتۋرنيردىڭ جالپى دەڭگەيىنە توقتالىپ، وڭىرلىك دايىندىق جۇيەسىنە قاتىستى پىكىر ءبىلدىردى.

– تاراز تورىندە وتكەن چەمپيوناتىمىز ءبىز ءۇشىن ناقتى تالداۋ الاڭى بولدى. قاي وڭىردە جۇيە بار، قاي باعىتتا جۇمىس ءالسىز – ءبارى كورىندى. تۇركىستان وبلىسىنىڭ ناتيجەسى ولاردىڭ ءبىرىزدى دايىندىق جۇيەسىن كورسەتسە، باسقا وڭىرلەردەن ءوز باعىتتارى بويىنشا العا جىلجي باستاعانى بايقالادى. ەڭ باستىسى باسەكە بار. قازىر بىزگە ءدال وسى ىشكى باسەكەنى جوعالتپاي، ونى ساپاعا اينالدىرۋ ماڭىزدى. وسى چەمپيوناتتا كوزگە تۇسكەن بالۋاندار الداعى ۋاقىتتا ۇلتتىق قۇراما ساپىنا تارتىلىپ، حالىقارالىق جارىستاردا ەل نامىسىن قورعاۋعا ءوز مۇمكىندىكتەرىن الادى، – دەدى چەمپيوناتقا جاقسى باعاسىن بەرگەن جاندوس ءتۇسىپحان ۇلى.

جالپى العاندا، بيىلعى چەمپيونات ءبىر عانا ءوڭىردىڭ ايقىن ۇستەمدىگىمەن ەمەس، كەرىسىنشە بىرنەشە ايماقتىڭ ءوز باعىتتارى بويىنشا العا شىققانىن كورسەتتى. دەگەنمەن، تۇركىستان وبلىسىنىڭ كەشەندى ناتيجەسى ونى كوشباسشى ءوڭىر رەتىندە دارالاپ تۇر. ال وزگە وڭىرلەردىڭ باسەكەگە قابىلەتتىلىگى ەل ىشىندەگى كۇرەستىڭ دەڭگەيى ءوسىپ كەلە جاتقانىن اڭعارتتى.

بيىلعى چەمپيوناتتىڭ باستى جاڭالىقتارىنىڭ ءبىرى – ەركىن كۇرەستەن الەم چەمپيونى ريزابەك ايتمۇحاننىڭ 125 كەلى سالماقتا كۇرەسۋى بولدى. استانالىق بالۋان وزىنە تىڭ سالماقتا بەلدەسكەنىنە قاراماستان، فينالعا دەيىن جەتىپ، شەشۋشى كەزدەسۋدە اقتوبەلىك سپورتشى ءالىمجان ءسالىمجاندى ايقىن باسىمدىقپەن جەڭدى.

– مەنىڭ جەڭىسكە جەتۋدەگى باستى تاكتيكام – ارسەنالىمداعى بارلىق ءادىس-ءتاسىلدى ءتيىمدى قولدانىپ، 6 مينۋت بويى ايانباي كۇرەسۋ، قارسىلاسىمدى تولىق باقىلاۋدا ۇستاۋ. بۇل جولى دا سول جوسپارىم جۇزەگە استى. ال جاڭا سالماققا كەلەر بولساق، باپكەرلەرىممەن اقىلداسىپ، ىشكى جارىستاردا 125 كەلىدە، ال حالىقارالىق دودالاردا 97 كەلىدە كۇرەسەتىن بولىپ شەشتىك. بۇعان دەيىن نۇركەن ءابدىروۆتى ەسكە الۋعا ارنالعان تۋرنيردە اۋىر سالماقتا ءوزىمدى سىناپ كورگەن ەدىم. الداعى ۋاقىتتا ازيا ويىندارى، الەم جانە ازيا چەمپيوناتتارىنا قاتىسۋدى جوسپارلاپ وتىرمىن، – دەدى ريزابەك ايتمۇحان.

جارىستا جەكەلەگەن سپورتشىلاردىڭ ونەرى دە ەرەكشە باعالاندى. بيىلعى چەمپيوناتتا ءۇش كۇرەس ءتۇرى بويىنشا U15 جانە U23 جاس ساناتتارىندا جالپى التى ۇزدىك بالۋان انىقتالىپ، ولارعا «دارا ءتاسىل» جانە «قايسار رۋح» اتالىمدارى تابىس ەتىلگەن بولاتىن. الدىمەن U15 جاس ساناتىندا گرەك-ريم كۇرەسىنەن 38 كەلىدە كۇمىس جۇلدەگەر اتانعان ماڭعىستاۋلىق ەرالى جاندوس «قايسار رۋح» نوميناتسياسىنا يە بولدى. ايەلدەر كۇرەسىندە 50 كەلىدە بەلدەسكەن تۇركىستاندىق كاۋسار ءىلياس تاباندىلىعىمەن كوزگە ءتۇسىپ، وسى اتالىممەن ماراپاتتالدى. ەركىن كۇرەستە 62 كەلىدە سىنعا تۇسكەن شىمكەنتتىك كوبەي تورعاۋىت تا «قايسار رۋح» يەگەرلەرىنىڭ قاتارىنان كورىندى.

ال U23 جاس ساناتىندا گرەك-ريم كۇرەسىنەن 77 كەلىدە جۇلدەگەر اتانعان شىعىسقازاقستاندىق ەلدوس كامەلوۆ «دارا ءتاسىل» اتالىمىنا يە بولدى. ايەلدەر كۇرەسىندە 72 كەلىدە توپ جارعان قىزىلوردالىق جىبەكجان سابىرجانوۆا دا وسى نوميناتسيانى جەڭىپ الدى. ەركىن كۇرەستە 74 كەلىدە كۇرەسكەن ابايلىق الماس سابىر «دارا ءتاسىل» يەگەرى اتاندى.

نوميناتسيا يەگەرلەرىنە قازاقستان كۇرەس فەدەراتسياسى 150 مىڭ تەڭگەنىڭ سەرتيفيكاتتارىن تاپسىردى.

سونىمەن قاتار، 41 كەلى سالماق دارەجەسىنىڭ فينالىندا بەلدەسكەن بالعىن بالۋاندار كورەرمەندەردىڭ ەرەكشە ىقىلاسىنا بولەندى. سولتۇستىك قازاقستان وبلىسىنىڭ وكىلى رايىمبەك جاقسىلىق پەن اقتوبەلىك بايسالبەك احمەتجان اراسىنداعى بەلدەسۋ سوڭعى سەكۋندقا دەيىن تارتىستى ءوتتى. جاقسى كۇرەستى باعالاعان فەدەراتسيانىڭ پرەزيدەنتى ەركىن وقساۆ قوس بالۋاننىڭ ارقايسىسىنا 300 مىڭ تەڭگەنىڭ سەرتيفيكاتىن تابىس ەتتى.

ايتا كەتسەك، گرەك-ريم، ەركىن جانە ايەلدەر كۇرەسىنەن U15 جانە U23 اراسىنداعى قازاقستان چەمپيوناتىنىڭ جالپى جۇلدە قورى 45 ميلليون تەڭگە بولدى. U15 ساناتىنىڭ چەمپيوندارىنا 200 مىڭ تەڭگە كولەمىندە سىياقى بەكىتىلسە، ەكىنشى جانە ءۇشىنشى ورىن يەلەرىنە سايكەسىنشە 100 مىڭ جانە 50 مىڭ تەڭگە تاپسىرىلدى. ال U23 ساناتىنىڭ ۇزدىكتەرى 500 مىڭ تەڭگە، كۇمىس جۇلدەگەرلەر 300 مىڭ تەڭگە، ال قولا مەدال يەگەرلەرى 150 مىڭ تەڭگە كولەمىندەگى قارجىلاي ماراپاتقا يە بولدى.