SportPress.kz Qazaqstan sport jańalyqtary
Taraz qalasynda grek-rım, erkin jáne áıelder kúresinen U15 jáne U23 arasyndaǵy Qazaqstan chempıonaty óz máresine jetti. On kúnge sozylǵan chempıonatqa elimizdiń barlyq óńirlerinen kelgen 2 034 jas balýan qatysty, dep habarlady Qazaqstan kúres federaııasynyń baspasóz qyzmeti.
Atalǵan doda jas sportshylardyń sheberligin shyńdap, bolashaq ulttyq qurama sapyna úmitker balýandardy anyqtaýda mańyzdy jarystardyń biri sanalady. Ár salmaq dárejesinde úzdik shyqqan sportshylar Qazaqstan quramasynyń qataryna qosylyp, resmı chempıonattarda el namysyn qorǵaıdy.
Jarys aıasynda grek-rım, erkin jáne áıelder kúresi boıynsha jalpykomandalyq esep qorytyndylary shyǵaryldy. Júldeli oryndarǵa ilikken óńirlerdiń medal kórsetkishi olardyń daıyndyq deńgeıin aıqyn ańǵartady. Máselen, Túrkistan oblysynyń quramasy 19 altyn, 16 kúmis jáne 19 qola medal enshilep, birneshe baǵytta kóshbasshylyqty bekemdedi. Almaty oblysy 10 altyn, 6 kúmis, 10 qola medalmen turaqty nátıjesin kórsetti. Atyraý oblysynyń qorjynynda 6 altyn, 5 kúmis, 6 qola júlde bolsa, Jambyl oblysy 7 altyn, 4 kúmis, 7 qola medaldi jeńip aldy. Almaty qalasynyń balýandary 7 altyn, 4 kúmis, 6 qola medal ıelenip, chempıonatqa jaqsy daıyndyqpen kelgenin dáleldedi. Al Shyǵys Qazaqstan men Qaraǵandy oblystary tıisinshe 2 altyn, 3 kúmis, 3 qola medaldan enshiledi.
Atap aıtqanda, Qazaqstan kúres federaııasynyń sport dırektory Jandos Saıhanov týrnırdiń jalpy deńgeıine toqtalyp, óńirlik daıyndyq júıesine qatysty pikir bildirdi.
– Taraz tórinde ótken chempıonatymyz biz úshin naqty taldaý alańy boldy. Qaı óńirde júıe bar, qaı baǵytta jumys álsiz – bári kórindi. Túrkistan oblysynyń nátıjesi olardyń birizdi daıyndyq júıesin kórsetse, basqa óńirlerden óz baǵyttary boıynsha alǵa jyljı bastaǵany baıqalady. Eń bastysy báseke bar. Qazir bizge dál osy ishki básekeni joǵaltpaı, ony sapaǵa aınaldyrý mańyzdy. Osy chempıonatta kózge túsken balýandar aldaǵy ýaqytta ulttyq qurama sapyna tartylyp, halyqaralyq jarystarda el namysyn qorǵaýǵa óz múmkindikterin alady, – dedi chempıonatqa jaqsy baǵasyn bergen Jandos Túsiphanuly.
Jalpy alǵanda, bıylǵy chempıonat bir ǵana óńirdiń aıqyn ústemdigimen emes, kerisinshe birneshe aımaqtyń óz baǵyttary boıynsha alǵa shyqqanyn kórsetti. Degenmen, Túrkistan oblysynyń keshendi nátıjesi ony kóshbasshy óńir retinde daralap tur. Al ózge óńirlerdiń básekege qabilettiligi el ishindegi kúrestiń deńgeıi ósip kele jatqanyn ańǵartty.
Bıylǵy chempıonattyń basty jańalyqtarynyń biri – erkin kúresten Álem chempıony Rızabek Aıtmuhannyń 125 keli salmaqta kúresýi boldy. Astanalyq balýan ózine tyń salmaqta beldeskenine qaramastan, fınalǵa deıin jetip, sheshýshi kezdesýde aqtóbelik sportshy Álimjan Sálimjandy aıqyn basymdyqpen jeńdi.
– Meniń jeńiske jetýdegi basty taktıkam – arsenalymdaǵy barlyq ádis-tásildi tıimdi qoldanyp, 6 mınýt boıy aıanbaı kúresý, qarsylasymdy tolyq baqylaýda ustaý. Bul joly da sol josparym júzege asty. Al jańa salmaqqa keler bolsaq, bapkerlerimmen aqyldasyp, ishki jarystarda 125 kelide, al halyqaralyq dodalarda 97 kelide kúresetin bolyp sheshtik. Buǵan deıin Nurken Ábdirovti eske alýǵa arnalǵan týrnırde aýyr salmaqta ózimdi synap kórgen edim. Aldaǵy ýaqytta Azııa oıyndary, Álem jáne Azııa chempıonattaryna qatysýdy josparlap otyrmyn, – dedi Rızabek Aıtmuhan.
Jarysta jekelegen sportshylardyń óneri de erekshe baǵalandy. Bıylǵy chempıonatta úsh kúres túri boıynsha U15 jáne U23 jas sanattarynda jalpy alty úzdik balýan anyqtalyp, olarǵa «Dara tásil» jáne «Qaısar rýh» atalymdary tabys etilgen bolatyn. Aldymen U15 jas sanatynda grek-rım kúresinen 38 kelide kúmis júldeger atanǵan mańǵystaýlyq Eraly Jandos «Qaısar rýh» nomınaııasyna ıe boldy. Áıelder kúresinde 50 kelide beldesken túrkistandyq Káýsár Ilııas tabandylyǵymen kózge túsip, osy atalymmen marapattaldy. Erkin kúreste 62 kelide synǵa túsken shymkenttik Kóbeı Torǵaýyt ta «Qaısar rýh» ıegerleriniń qatarynan kórindi.
Al U23 jas sanatynda grek-rım kúresinen 77 kelide júldeger atanǵan shyǵysqazaqstandyq Eldos Kamelov «Dara tásil» atalymyna ıe boldy. Áıelder kúresinde 72 kelide top jarǵan qyzylordalyq Jibekjan Sabyrjanova da osy nomınaııany jeńip aldy. Erkin kúreste 74 kelide kúresken abaılyq Almas Sabyr «Dara tásil» ıegeri atandy.
Nomınaııa ıegerlerine Qazaqstan kúres federaııasy 150 myń teńgeniń sertıfıkattaryn tapsyrdy.
Sonymen qatar, 41 keli salmaq dárejesiniń fınalynda beldesken balǵyn balýandar kórermenderdiń erekshe yqylasyna bólendi. Soltústik Qazaqstan oblysynyń ókili Raıymbek Jaqsylyq pen aqtóbelik Baısalbek Ahmetjan arasyndaǵy beldesý sońǵy sekýndqa deıin tartysty ótti. Jaqsy kúresti baǵalaǵan federaııanyń prezıdenti Erkin Oqsav qos balýannyń árqaısysyna 300 myń teńgeniń sertıfıkatyn tabys etti.
Aıta ketsek, grek-rım, erkin jáne áıelder kúresinen U15 jáne U23 arasyndaǵy Qazaqstan chempıonatynyń jalpy júlde qory 45 mıllıon teńge boldy. U15 sanatynyń chempıondaryna 200 myń teńge kóleminde syıaqy bekitilse, ekinshi jáne úshinshi oryn ıelerine sáıkesinshe 100 myń jáne 50 myń teńge tapsyryldy. Al U23 sanatynyń úzdikteri 500 myń teńge, kúmis júldegerler 300 myń teńge, al qola medal ıegerleri 150 myń teńge kólemindegi qarjylaı marapatqa ıe boldy.
