باپكەر مەن بالۋانعا قۇرمەت دەگەن وسى

جاقىندا استانادا «سەمەي ءوڭىرىنىڭ بالۋاندارى مەن باپكەرلەرى» اتتى تاريحي-دەرەكتى جيناق جارىققا شىقتى.

بۇل ەڭبەكتىڭ ماڭىزدىلىعى سول، وندا كوپتەگەن تانىمدى ماقالالار مەن دەرەكتەر جاريالانعان.

جيناق ەكى توم بولىپ باسىلعان. وسى ەكى تومعا 1046 ماتەريال كىرگىزىلگەن.

كىتاپتى قۇراستىرۋمەن اينالىسىپ جۇرگەن سوڭ، مۇنداي ەڭبەكتى شىعارۋ ارينە، وڭاي بولدى دەپ ايتا المايمىن. بۇل دەگەنىڭىز ەڭ اۋەلى كىتاپتىڭ شىعۋىنا دەمەۋشى ىزدەۋ، سودان كەيىن بارىپ ونى ۋاقىتىندا باسپاعا تاپسىرۋ ءۇشىن جوسپار قۇرىپ، جيناقتى تاراۋ-تاراۋعا ءبولىپ، ماتەريال جيناستىرۋ، اۆتورلار تارتۋ، ماقالانى دايىنداۋ. مىنە، وسىنداي كۇندى كۇن، ءتۇندى ءتۇن دەمەي، كوزگە كورىنبەيتىن قىرۋار جۇمىستان كەيىن عانا جيناق جارىققا شىعادى. وسى جەردە مەن ەڭبەكتىڭ باس دەمەۋشىسى سپورت جاناشىرى، ەلىمىزدىڭ ءبىرتۋار اپتال ازاماتى، داڭقتى بالۋان، كسرو-نىڭ جانە قازاقستاننىڭ ەڭبەك سىڭىرگەن سپورت شەبەرى، قازىر پارلامەنت ءماجىلىسىنىڭ دەپۋتاتى بولىپ ەلگە قىزمەت ەتىپ جۇرگەن داۋلەت بولات ۇلى تۇرلىحانوۆقا العىسىمدى ايتقىم كەلەدى. ويتكەنى، «بۇگىنگى كۇن — ەرتەڭگى تاريح» دەگەن ءسوز بار. كىتاپقا دەمەۋشى بولىپ، ونى جارىق دۇنيەگە شىعارۋ بۇل — بۇگىنگى، كەشەگى كۇندى تاسپاعا ءتۇسىرىپ، بولاشاق ۇرپاققا ەلىمىزدىڭ تاريحىن دارىپتەۋ، ناسيحاتتاۋ دەپ بىلەمىن.

كەشەگى كىتاپتىڭ تۇساۋكەسەر راسىمىندەگى ءسوزىمدى قايتالاپ ايتسام، مەن داۋلەت بولات ۇلىمەن 2001 جىلدان بەرى تانىسپىن. سول كەزدەن بەرى ونىڭ سوڭىنان ءبىر ءسوزدىڭ ەرىپ جۇرگەنىن ەستىمەپپىن، ءبىر ەرسى ءىسىن كورمەپپىن. كەرىسىنشە، ونىڭ كوپ ادامعا قامقورشى، ەل سپورتىنا جاناشىر، كوپتەگەن ساۋاپتى ىسپەن اينالىسىپ جۇرگەنىن عانا بىلەمىن. ءبىر سوزبەن ايتقاندا، داۋلەت بولات ۇلىنىڭ شاراپاتىن كورگەن ادام كوپ. سونىڭ ىشىندە جيناقتا اتى اتالىپ، ءوزى تۋرالى ماقالا شىققان مىڭنان استام باپكەر مەن بالۋان بار.

بۇل جاتتىقتىرۋشىلار مەن بالۋانداردىڭ ەڭبەگىن كىتاپقا كىرگىزىپ، سولار تۋرالى ماتەريال دايىنداعان بەلگىلى قالامگەرلەر ومىرزاق سۇلتانوۆ پەن سىرىم حاسەنوۆكە دە العىسىم شەكسىز. بۇل كىسىلەردىڭ ەسىمى ەلگە كەڭىنەن تانىمال. ەكەۋى دە سپورت تاقىرىبىنا قالام تارتىپ، كوپتەگەن ەڭبەك جازعان قالامگەرلەر. ولار كىتاپقا سپورت جۋرناليستەرىنىڭ ماتەريالدارىن دايىنداپ، وزدەرى دە ماقالا جازىپ، كوپ ەڭبەكتەنگەن. سىرىم حاسەنوۆ باۋىرىمىزدىڭ ايتۋىنشا، جيناققا دۇنيە جيناۋعا ءتورت جىل ۋاقىت كەتكەن. ءتورت جىل! قانشاما ەڭبەك دەسەڭىزشى.

كىتاپقا پىكىر جازعان ءوزى دە سپورت تاقىرىبىنا ارنالعان كوپتەگەن ەڭبەكتىڭ اۆتورى، سپورت تاريحشىسى، بەلگىلى قالامگەر قىدىربەك رىسبەكتىڭ ايتۋىنشا، جيناققا بۇرىنعى سەمەي ءوڭىرى، بۇگىنگى اباي وبلىسىنىڭ رەسپۋبليكالىق، حالىقارالىق ارەنالاردا كەڭىنەن تانىلعان بالۋاندارى مەن ولاردى جاتتىقتىرعان باپكەرلەر، اتاقتى تورەشىلەر، كۇرەستىڭ دامۋىنا ەلەۋلى ۇلەس قوسقان قايراتكەرلەر تۋرالى دەرەكتەر مەن دۇنيەلەر كىرگىزىلدى.

—بۇل جيناق ەكى توم بولىپ شىقتى. كىتاپتا ورتا عاسىردان بەرى وسى كەزگە دەيىن سەمەي وڭىرىنەن شىعىپ، قالىڭ ەلگە تانىلعان باپكەرلەر مەن بالۋانداردىڭ سپورتتاعى جەتىستىكتەرى، ولاردىڭ قيلى تاعدىرىنان سىر شەرتەتىن جازبا دەرەكتەر بار. كىتاپ سپورت سۇيەر قاۋىمعا ارنالعان العاشقى جيناقتالعان تولىمدى ەڭبەك، — دەدى ول.

تاعى ءبىر ايتاتىن نارسە، ەكى تومداعى ماتەريالدى دايىنداۋ ءوز الدىنا، كىتاپتاعى فوتوسۋرەتتەر دە جاقسى شىققان. ال فوتونى ىزدەۋ، ونى تاريحقا اينالدىرۋ دەگەنىمىز بۇل دا ءبىر كوزگە كورىنبەيتىن ەڭبەك. بۇل فوتولار دەندەرباي ەگىزوۆ، قىدىربەك رىسبەك، داۋلەت تۇرلىحانوۆ پەن ماقالا اۆتورلارىنىڭ ارحيۆتەرىنەن، الەۋمەتتىك جەلى پاراقشالارىنان الىنعان.

كىتاپتى قاراپ وتىرىپ، ونىڭ ساپاسىنا دا ءمان بەرەمىز عوي. جاقسى كىتاپ جاقسى بەزەندىرىلۋىمەن دە قۇندى. وسى رەتتە جيناقتى كومپيۋتەردە بەتتەگەن سەرىكبول مىرزابەكوۆ پەن كوز مايىن تامىزىپ، قاتەلەردى تۇزەگەن كوررەكتور دامەجان ەلەمەسوۆانىڭ جانە كىتاپتىڭ دەمەۋشىسى DAEWOO KAZAKHSTAN (دەۋ بۋس كازاحستان) جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى اسەمحان دوسقوجانوۆتىڭ اتىن اتاپ، ساۋاپتى ىسكە ارالاسقانى ءۇشىن ريزاشىلىعىمدى بىلدىرەمىن.

قازاق سپورتى جاساي بەرسىن!

 

داستان كەنجالين،

استانا