SportPress.kz قازاقستان سپورت جاڭالىقتارى
استانادا ءوتىپ جاتقان حالىقارالىق مۋلتيسپورتتىق «بولاشاق ويىندارى – 2026» ءتۋرنيرى كورەرمەن قىزىعۋشىلىعى بويىنشا جوبا تاريحىنداعى ەڭ جوعارى كورسەتكىشكە جاقىنداپ كەلەدى.
«جارىستىڭ العاشقى ءتورت كۇنىنىڭ وزىندە ترانسلياتسيالار 85 ميلليوننان استام قارالىمعا جەتتى. قازىرگى قارقىن ساقتالسا، تۋرنير اياقتالعانعا دەيىنگى جالپى اۋديتوريا كولەمى 430-490 ميلليون قارالىمعا جەتۋى مۇمكىن.
مۇنداي ناتيجە حالىقالالىق مەدياسەرىكتەستەر جەلىسىنىڭ ايتارلىقتاي كەڭەيۋى ىقپال ەتىپ وتىر. تۋرنير قىتاي، تمد، وڭتۇستىك امەريكا، ءۇندىستان مەن الەمنىڭ وزگە دە ەلدەرىندەگى جەتەكشى تەلەۆيزيالىق جانە تسيفرلىق پلاتفورمالار ارقىلى تاراتىلىپ جاتىر. نەگىزگى سەرىكتەستەر قاتارىندا HUYA، BIGG TV، Play TV، XP Esports، VK، bilibili، Rutube مەن Douyu پلاتفورمالارى بار»، دەپ حابارلادى تۋريزم جانە سپورت مينيسترلىگى.
ۆەدومستۆونىڭ مالىمەتىنە قاراعاندا، كورەرمەن اۋديتورياسىنىڭ كوبەيۋىنە تسيفرلىق پلاتفورمالار دا ايتارلىقتاي ىقپال ەتىپ وتىر. بۇعان دەيىن بولعان تۋرنيردە بارلىق قارالىمنىڭ شامامەن 82 پايىزى ستريمينگتىك سەرۆيستەرگە ءتيسىلى بولسا، بيىل بۇل كورسەتكىشتىڭ ودان ءارى ءوسىپ كەلە جاتقانى بايقالادى.
ءتۋرنيردىڭ ەڭ جوعارى كورەرمەن كورسەتكىشى الداعى فينالدىق جارىستار كەزىندە بولادى.
5 تامىزدا Dota 2 ءتۋرنيرىنىڭ فينالى بولسا، 8-9 تامىزدا Counter-Strike 2، Mobile Legends: Bang Bang پەن فيدجيتال-فۋتبول جارىستارىنىڭ جەڭىمپازدارى انىقتالادى. ساراپشىلار ءدال وسى باسەكەلەر جالپى اۋديتوريا ءوسىمنىڭ نەگىزگى درايۆەرىنە اينالادى دەپ بولجاپ وتىر.
ءتۋرنيرىنىڭ استانادا ۇيىمداستىرىلۋى قازاقستاننىڭ حالىقارالىق دەڭگەيدەگى سپورتتىق ءارى تەحنولوگيلىق ءىس-شارالاردى ءتيىستى دەڭگەيدە وتكىزە الاتىن ەل ەكەنىن تاعى ءبىر مارتە دالەلدەپ وتىر.
ميلليونداعان شەتەلدىك كورەرمەندى قامتىعان ترانسلياتسيالار قازاقستاننىڭ حالىقارالىق دەڭگەيدەگى مارتەبەسىن ارتتىرىپ، ەلىمىزدىڭ الەمدىك فيدجيتال يندۋستريالىق پوزيتسياسىن نىعايتۋعا ىقپال ەتىپ جاتىر.
ەسكە سالا كەتسەك، «بولاشاق ويىندارى» – ءداستۇرلى سپورت پەن تسيفرلىق تەحنولوگيالاردى ۇشتاستىراتىن حالىقارالىق مۋلتيسپورتتىق تۋرنير. بيىلعى جارىس 29 شىلدەدە باستالدى. ول 9 تامىزعا دەيىن بولادى.
داستان كەنجالين
