SportPress.kz قازاقستان سپورت جاڭالىقتارى
فۋتبولدان وزبەكستان ۇلتتىق قۇراماسىنىڭ باس جاتتىقتىرۋشىسى فابيو كانناۆارو العاش رەت كوماندانىڭ الەم چەمپيوناتىنداعى ويىندارىنا قورىتىندى جاساپ، قۇرامانىڭ ساتسىزدىگىن ءتۇسىندىردى.
Instagram-داعى ەفيردەن بەلگىلى بولعانداي، ءباسپاسوز ءماسليحاتىندا باس جاتتىقتىرۋشىعا الەمدىك دودادان كەيىن نەلىكتەن بىردەن كوماندامەن بىرگە وزبەكستانعا بارماي، يتالياعا دەمالۋعا كەتىپ قالعانى، باس جاتتىقتىرۋشى رەتىندە قانشا ايلىق الاتىنى، قۇرامانىڭ الداعى ازيا كۋبوگىنا دايىندىعى تۋرالى سۇراقتار قويىلدى.
كانناۆارو سىن-پىكىرلەر مەن الەم چەمپيوناتىنان كەيىن ەل اراسىندا تاراعان نەشە ءتۇرلى قاۋەسەتكە جاۋاپ بەردى.
ول الدىمەن الەم چەمپيوناتىنان كەيىن يتالياعا دەمالۋعا كەتتى دەگەن اقپاراتتى جوققا شىعاردى. باس جاتتىقتىرۋشى مۋنديالدان كەيىن ءوز ەلىنە وزبەكستان سۋپەرليگاسىنداعى ۇزىلىسكە بايلانىستى عانا بارعانىن ايتتى.
وسى رەتتە ول ۇلتتىق قۇرامانىڭ الەم چەمپيوناتىنداعى ويىنىنا قاتىستى پىكىر ءبىلدىردى.
«الەم چەمپيوناتىندا كوماندالاردىڭ قارقىنى وتە كۇشتى. مەن ءوزىم فۋتبولشى رەتىندە ءتورت الەم چەمپيوناتىنا قاتىستىم. سوندىقتان ءبارىن ءوز كوزىممەن كورگەننەن كەيىن ايتىپ وتىرمىن. جالپى، وزبەكستان فۋتبول قاۋىمداستىعى (وفق) ۇلتتىق قۇراما كوماندانى مۋنديالعا جاقسى دايىندادى. ۇيىمداستىرۋ جاعىنان ەشقانداي كىنارات بولعان جوق. ال نەلىكتەن كەيبىر ويىنشىلار قۇرامعا قوسىلماعانى تۋرالى ايتسام، تۋرگۋنبوەۆ پەن حوجيمات ەركينوۆ جارىسقا قازىرگى سپورتتىق بابىنا بايلانىستى بارمادى. ءيا، كوپ ادام تۋرگۋنبوەۆ پەن حوجيمات ەركينوۆ نەگە قۇرامعا الىنبادى دەپ سۇرايدى. مەن ولاردىڭ بابىنا قارادىم. ەكەۋىمەن دە جەكە سويلەستىم»، دەدى ول.
ءباسپاسوز ءماسليحاتىندا ول ۇلتتىق قۇراما تۋرالى جالعان اقپارات تاراتقان ادامداردى دا ايتتى. يتاليالىق باپكەر ۇلتتىق قۇرامانىڭ اينالاسىندا جالعان اقپاراتتىڭ كوپ تارالعانىن ايتىپ، ونى كەيبىر ادامداردىڭ ادەيى، قاساقانا ىستەگەنىن جەتكىزدى. سونىمەن بىرگە ول كەيبىر ادامدار ويلاعانداي جىلىنا 4 ملن ەۋرو المايتىنىن، فەدەراتسيانىڭ كەلىسىممەن ءوزى يتاليادان شاقىرىپ العان كومەكشىلەرىنە ءوز قالتاسىنان ايلىق بەرەتىنىن اتاپ ءوتتى.
«مەن جىلىنا 4 ملن ەۋرو المايمىن. مەنىڭ كومەكشىم رولاندو بيانكي قۇرامادا تەگىن جۇمىس ىستەدى. بۇعان دەياىن قۇرامادا جاقسى جەرگىلىكتى ماماندار بولدى. بىراق مەن ماسساجيستتەر مەن فيزيوتەراپەۆتتەردى يتاليادان اكەلگىم كەلدى. ولارعا ءوز قالتامنان اقشا تولەيمىن»، دەدى ول.
وسىدان كەيىن كانناۆارو ۇلتتىق قۇراما تۋرالى وتىرىك ايتاتىن ادامداردىڭ اتىن اتماسا دا شەت جاعىن ىممەن تۇسىندىرگىسى كەلدى.
«بىرەۋ وتە كوپ وتىرىك اقپارات تاراتتى. ءوز ارامىزدا وتىرىك ايتاتىن ادام بار. بۇل مەنىڭ شەتەلدىك باپكەر بولعانىم ءۇشىن بولۋى مۇمكىن. بىراق، مەن سىزدەرگە ايتايىن، ءبىز ۇستانعان ەرەجەلەردى مەن ويلاپ تاپقان جوقپىن. بۇل – ەۋروپادا قالىپتاسقان ستاندارتتار. سوندىقتان مەن تۋرالى نەلىكتەن وسىنشاما كوپ وتىرىك اقپارات تارالدى دەپ ويلايمىن. سونى تۇسىنبەدىم. بۇرىنعى باس جاتتىقتىرۋشى كاپادزە – جاقسى مامان، ارينە. ول جاقسى ناتيجە كورسەتتى. بىراق بۇل مەنى ۇنەمى سىناۋعا سەبەپ بولماۋى كەرەك قوي»، دەدى كانناۆارو.
جيىندا ازيا كۋبوگىنا دايىندىق تۋرالى دا اڭگىمە بولدى.
ول ازيا كۋبوگىنا دەيىن قۇرامدا وزگەرىستەر بولاتىنىن اشىپ ايتتى. جاسىرعان جوق. ونىڭ ايتۋىنشا، ەندى ۇلتتىق قۇراماعا ويىنشىلار بۇرىنعى جەتىستىكتەرى ءۇشىن ەمەس، قازىرگى كورسەتكەن ويىنىنا قاراي شاقىرىلادى.
«بىردەن باسىن اشىپ ايتايىن، ازيا كۋبوگى الدىندا كوماندانىڭ قۇرامى وزگەرەدى. ءبىز ەندى جاستارعا كوبىرەك مۇمكىندىك بەرەمىز. بۇدان بىلاي ۇلتتىق قۇراماعا بۇرىنعى ەڭبەگى ءۇشىن ەمەس، ءوزىن جاقسى قىرىنان كورسەتىپ جۇرگەن فۋتبولشىلار عانا شاقىرىلادى»، دەدى كانناۆارو.
كانناۆارو ۇلتىق قۇرامانىڭ ازيا كۋبوگىنا قىدىرىپ بارمايتىنىن ەسكەرتتى.
«ءبىز ازيا كۋبوگىنا قىدىرىپ قايتۋ ءۇشىن بارمايمىز. مەن وسى قىزمەتكە كەلگەندەالەم چەمپيوناتىندا بىردەن ناتيجە كۇتپەڭىزدەر دەپ ايتتىم. سولاي ما؟! ال ەندى ازيا كۋبوگىندا ءبىز شامامىز كەلگەنشە جاقسى ويناۋعا تىرىسامىز. ەندى ەشبىر قارسىلاستان قورىقپايمىز»، دەدى باس جاتتىقتىرۋشى.
ءسوز سوڭىندا كانناۆارو الادعى كەزدە تاشكەنتتە يران قۇراماسىمەن جولداستىق ماتچ وتكىزۋ تۋرالى كەلىسسوزدەر ءجۇرىپ جاتقانىن حابارلادى. ول فۋتبولشىلاردىڭ الاڭدا ءبىر-بىرىمەن تۇسىنىستىكتە ويناۋدىڭ ماڭىزدىلىعىن اتاپ ءوتتى. الەم چەمپيوناتىنىڭ كەيبىر كادرلىق شەشىمدەرىنىڭ دۇرىس بولماعانىن مويىندادى. سودان كەيىن جاس وزبەك فۋتبولشىلارىنىڭ بولاشاعى زور ەكەنىن، ولار كوبىرەك ەۋروپا چەمپيوناتتارىندا ويناۋ كەرەكتىگىن ايتتى.
وزبەكستان قۇراماسى بيىلعى جىلعى الەم چەمپيوناتىنا تۇڭعىش رەت قاتىسىپ، ءۇش ويىننىڭ بارىندە دە بىردە-ءبىر ۇپاي العان جوق. ولار ءبىرىنشى ماتچتا كولۋمبيادان 1:3 ەسەبىمەن جەڭىلگەن ەدى.
داستان كەنجالين
