ەلەنا رىباكينا ەلگە كەلە جاتىر

تەننيستەن الەمنىڭ ءبىرىنشى راكەتكاسى ەلەنا رىباكينا استانا مەن الماتى قالالارىنا بارىپ، جاس سپورتشىلارعا شەبەرلىك ساباقتارىن بەرەدى.

رىباكينا ەلدە ءبىر اپتا بولادى. وسى ۋاقىتتا ول بالالارعا شەبەرلىك ساباقتارىن بەرىپ، ءوز تاجىريبەسىمەن بولىسەدى. سودان كەيىن  جانكۇيەرلەرمەن كەزدەسەدى. سونىمەن قاتار، سپورتشى تسينتسينناتيدە وتكەن WTA 1000 ساناتىنداعى تۋرنيردە العان احيلل ءسىڭىرىنىڭ جاراقاتىنا بايلانىستى مەديتسينالىق تەكسەرۋدەن وتەدى. ءدال وسى جاراقاتتىڭ سالدارىنان تەننيسشى اتالعان ءتۋرنيردىڭ شيرەك فينالىنا قاتىسۋدان باس تارتۋعا ءماجبۇر بولعان ەدى. اياعىنداعى جاراقات US Open-2026 ءتۋرنيرى كەزىندە دە تەننيسشىنى مازالادى. الايدا سپورتشى جاراقاتىنا قاراماستان، تۋرنيردە اۋىرسىنۋدى باساتىن دارىلەردىڭ كومەگىمەن ويناپ، چەمپيوندىق تيتۋلدى جەڭىپ الدى.

بۇعان دەيىن رىباكينا Wimbledon-2022 ءتۋرنيرى مەن Australian Open-2026 اشىق چەمپيوناتىن جەڭىپ العان. اقش اشىق چەمپيوناتىنداعى جەڭىسى ارقىلى ول قازاقستان قورجىنىنا جەكەلەي سىندا ءۇشىنشى «ۇلكەن دۋلىعا» جۇلدەسىن اكەلىپ، ەلىمىزدىڭ اتىن الەمدىك تەننيس تاريحىنا جازدى.

جاتتىقتىرۋشىلار شتابىنىڭ مالىمەتىنە قاراعاندا، رىباكينانىڭ ەمدەلۋى مەن تولىق قالپىنا كەلۋىنە كەمىندە ەكى اپتا قاجەت. وسىعان بايلانىستى سپورتشى قىتايدا وتەتىن بيللي دجين كينگ كۋبوگىنىڭ فينالدىق كەزەڭىنە قاتىسا المايدى. الداعى ۋاقىتتا تەننيسشىنىڭ باستى ماقساتى – دەنساۋلىعىن قالپىنا كەلتىرىپ، تولىققاندى جاتتىعۋ پروتسەسىنە ورالۋ.

رىباكينا حالىقارالىق ارەنادا قازاقستاننىڭ نامىسىن قورعاۋدى ماقتان تۇتاتىنىن تالاي رەت اتاپ وتكەن. ونىڭ جەتىستىكتەرى وتاندىق تەننيس ءۇشىن ەرەكشە ماڭىزعا يە. ال US Open تۋرنيرىندەگى جەڭىسى مەن الەمدىك رەيتينگتىڭ كوش باسىنا شىعۋى قازاقستان سپورتى تاريحىنداعى ماڭىزدى بەلەسكە اينالدى.

بۇعان دەيىن ەلەنا رىباكينانىڭ الەمنىڭ ءبىرىنشى راكەتكاسى اتانعانىن حابارلاعان ەدىك. وسى جەتىستىگىنىڭ ارقاسىندا ول قوماقتى تابىس تاپتى.

داستان كەنجالين،

استانا