Baǵdat Sabaz: «Jeńilip jatqanda jeńiske jetetinime sendim»

Astanada kúres túrlerinen ótip jatqan álem chempıonatynda grek-rım kúresinen 67 keli salmaqta qola júldeger atanǵan Baǵdat Sabazǵa  medal alý ońaı bolǵan joq. Bul týraly ol jarystan keıin aıtty.

«Qola júlde úshin beldesýdegi kúresime kóńilim toldy. Qarsylasym osal bolǵan joq. Olımpıada júldegeri. Beldesý óte tartysty, qıyn boldy. Álem chempıonaty óz elimizde ótip jatqandyqtan barymdy saldym.

Tórt upaı aıyrmasymen jeńilip jatqanda da ishteı jeńiske jetetinime sendim.

Qoldaý kórsetken barsha jankúıerge alǵysymdy bildiremin. Olardyń qoldaýyn sezindim. Sondaı-aq jeke jattyqtyrýshy men bas jattyqtyrýshyǵa kóp raqmet aıtamyn. Sol kisilerdiń arqasynda jeńiske jettim», dedi ol.

Ol aldaǵy ýaqytta 67 kelide kúresýdi jalǵastyratynyn, endi kelesi jyly ótetin álem chempıonatyna daıyndalatynyn aıtty.

Baǵdat Sabaz úshinshi oryn úshin beldesýde Ázerbaıjan ókili Hasrat Djafarovty 8:5 esebimen jeńip, qola medaldi ıelendi.

Dastan KENJALIN,

ASTANA