ەركىن وقاسوۆ: بالۋانداردىڭ كۇرەسىنە كوڭىلىم تولمايدى

قازاقستان كۇرەس فەدەراتسياسىنىڭ پرەزيدەنتى ەركىن وقاسوۆ بالۋانداردىڭ الەم چەمپيوناتىنداعى كۇرەسىنە كوڭىلى تولمايتىنىن ايتىپ، بارشا جانكۇيەردەن كەشىرىم سۇرادى، دەپ حابارلايدى SportPress.kz.

 ول بالۋانداردان بۇدان دا جاقسى كورسەتكىش كۇتكەنىن، الداعى ۋاقىتتا ناتيجەنى جاقسارتۋ فەدەراتسيا جۇمىسىنىڭ باستى مىندەتى بولاتىنىن اتاپ ءوتتى.

«بالۋانداردىڭ الەم چەمپيوناتىنداعى ناتيجەسىنە كوڭىلىم تولمايدى. ءبىز بۇدان جاقسى كورسەتكىش كۇتكەن ەدىك. ال چەمپيوناتتى ۇيىمداستىرۋ تۇرعىسىنان استانا وزىنە جۇكتەلگەن مىندەتتى ابىرويمەن اتقاردى. الەمدىك دوداداعى ناتيجە ءۇشىن فەدەراتسيانىڭ اتىنان بارشا جانكۇيەردەن كەشىرىم سۇرايمىن.

ءبىز جۇمىسىمىزدى ەندى باستاپ جاتىرمىز. الداعى ۋاقىتتا سپورتشىلارىمىزدىڭ ناتيجەسىن جاقسارتۋ ءۇشىن بار كۇش-جىگەرىمدى جۇمساۋعا دايىنمىن.

بۇل مەنىڭ عانا ەمەس، جاتتىقتىرۋشىلار مەن بالۋانداردىڭ دا ورتاق ماقساتى. ءبىزدى قولداپ، توعىز كۇن بويى جانكۇيەر بولعان بارشاڭىزعا العىس ايتامىن!» دەدى ەركىن قادىرعالي ۇلى.

سونىمەن بىرگە ول چەمپيوناتتى ۇيىمداستىرۋعا اتسالىسقان ازاماتتارعا العىسىن ءبىلدىردى.

وسىدان كەيىن قازاقستان كۇرەس فەدەراتسياسى الداعى ۋاقىتتا ۇلتتىق قۇرامالاردىڭ دايىندىعىن كۇشەيتۋگە، جاتتىقتىرۋشىلار مەن سپورتشىلاردىڭ جۇمىسىن جەتىلدىرۋگە جانە حالىقارالىق جارىستارداعى ناتيجەنى جاقسارتۋعا باسىمدىق بەرەتىنىن مالىمدەدى.

«فەدەراتسيا ۇجىمى توراعا بەلگىلەگەن مىندەتتەردى ىسكە اسىرۋ ءۇشىن بىرلەسە جۇمىس اتقارۋعا دايىن. باستى ماقسات – بالۋانداردىڭ الەمدىك ارەناداعى باسەكەگە قابىلەتتىلىگىن ارتتىرىپ، جانكۇيەر سەنىمىن اقتاۋ»، دەپ حابارلادى قازاقستان كۇرەس فەدەراتسياسىنىڭ ءباسپاسوز قىزمەتى.

جارىس تۋرالى چەمپيوناتتىڭ جابىلۋ سالتاناتىندا بىرىككەن كۇرەس الەمىنىڭ (UWW) پرەزيدەنتى نەناد لالوۆيچ تە ءوز پىكىرىن ءبىلدىردى. ول الەمدىك دودانىڭ ۇيىمداستىرىلۋىنا وتە جاقسى باعا بەردى. مارتەبەلى مەيمان ەلىمىزدىڭ نەبارى 4-5 ايدىڭ ىشىندە وسىنداي اۋقىمدى حالىقارالىق جارىستى وتكىزۋگە دايىندالىپ، بارلىق ۇيىمداستىرۋشىلىق مىندەتتى لايىقتى دەڭگەيدە اتقارا العانىن ەرەكشە اتاپ ءوتتى.

UWW پرەزيدەنتى الەم چەمپيوناتىن جاقسى ۇيىمداستىرعانى ءۇشىن قازاقستان كۇرەس فەدەراتسياسىنىڭ توراعاسى ەركىن وقاسوۆقا حالىقارالىق ۇيىمنىڭ اتىنان ارنايى ەستەلىك سىيلىق پەن چەمپيوندارعا ارناپ تىگىلگەن RUDIS كومپانياسىنىڭ جەيدەسىن تابىس ەتتى. وسى ارادا ايتا كەتەتىن ءبىر نارسە، مۇنداي ماراپات ەلىمىزدىڭ كۇرەس تاريحىندا العاش رەت بەرىلىپ وتىر.

بيىلعى الەمدىك دودا 1 قاراشادا مارەسىنە جەتتى. وسى كۇنى استاناداعى «بارىس ارەنا» سپورت كەشەنىندە الەم چەمپيوناتى سالتاناتتى جاعدايدا اياقتالىپ، جەر-ءجۇزىنىڭ 135 ەلىنەن كەلگەن 900-دەن استام بالۋان ءوز ەلدەرىنە قايتتى.

استاناداعى دۇرمەكتى دودا توعىز كۇنگە سوزىلدى. وسى ۋاقىتتا بالۋاندار 30 سالماق دارەجەسىندە جۇلدەلەردى ساراپقا سالدى.

الەم چەمپيوناتىنىڭ اۋىسپالى تۋى 2027 جىلعى دودانى ۇيىمداستىراتىن اقش دەلەگاتسياسىنىڭ وكىلدەرىنە تاپسىرىلدى.

ەسكە سالا كەتسەك، گرەك-ريم كۇرەسىنىڭ شە­بەر­لەرى باستاپ بەرگەن الەم چەم­پيوناتىن ايەلدەر كۇرەسى مەن ەركىن كۇرەس بالۋاندارى تۇيىندەدى. وكىنىشكە قاراي، ەلوردا تورىندەگى الەمدىك دودادا ەلىمىزدىڭ ءانۇرانى شىرقالمادى.

بيىلعى كۇرەس تۇرلەرىنەن الەم چەمپيوناتىندا قازاقستان قۇراماسى بەس مەدال جەڭىپ الدى. ونىڭ ىشىندە ءبىر كۇمىس جانە ءتورت قولا جۇلدە بار. ۇلتتىق قۇراما جالپىكوماندالىق ەسەپتە 15-ورىنعا يە بولدى.