SportPress.kz Qazaqstan sport jańalyqtary
Senegaldyń astanasy Dakar qalasynda jalaýy jelbiregen IV jazǵy jasóspirimder Olımpıadasynda sporttyq gımnastıkadan Eva Taıeva úzdik 18 gımnasshynyń qataryna kirip, fınalǵa joldama aldy.
Ol jekeleı kópsaıysta 47,866 upaı jınap, jalpy esepte 21-orynǵa shyqty.
Taǵy bir gımnasshy Andreı Terman kópsaıysta óner kórsetti. Otandasymyz alty snarıadta óner kórsetip, 69,199 upaı jınady. Degenmen fınalǵa shyǵa almady.
Tasjoldaǵy velosporttan uldar arasynda ótken toptyq jarys ta máresine jetti. Bul saıysta Qazaqstan namysyn Gleb Novıkov qorǵady.
Ol 76,5 shaqyrym qashyqtyqty 1 saǵat 48 mınýt 3 sekýndta júrip ótip, 22-shi bolyp máre syzyǵyn kesti. Novıkov chempıonnan 59 sekýndqa qalyp qoıdy.
Jarysta belgııalyq Daan Vılmsen top jaryp, altyn medal ıelendi. Onyń nátıjesi – 1:47:04. Reseılik Stepan Bortnık kúmis júldege ıe bolsa, aýstralııalyq Kaleb Makkenzı qola medal jeńip aldy.
Úsh sportshy da jarysty birdeı ýaqytta aıaqtady. Júldegerler márege kimniń birinshi jetkenine qaraı anyqtaldy.
Veloshabandoz Ánel Táshbaı tasjoldaǵy velosporttan toptyq jarysqa qatysty.
Ol 1 saǵat 31 mınýt 19 sekýnd nátıjemen máre syzyǵyn jetinshi bolyp kesti.
Alǵashqy 20 sportshy máre syzyǵyn birdeı ýaqytta kesti. Sondyqtan qorytyndy oryndar sportshylardyń márege kelý retine qaraı anyqtaldy.
Boksshy Maral Tólepbergen alǵashqy jekpe-jeginde jeńiske jetti.
Ol áıelder boksynda 54 kelige deıingi salmaqta el namysyn qorǵap jatyr.
Maral Tólepbergen alǵashqy jekpe-jeginde Ulybrıtanııa ókili Kalsı Djaıamen qolǵap túıistirip, ony 3:1 esebimen jeńdi.
Osylaısha ol jasóspirimder Olımpıadasynyń shırek fınalyna shyqty.
Reseı sportshysy Angelına Novolodskaıa Olımpıada chempıony atandy. Aýstralııalyq Elsı Apps ekinshi oryn alsa, chehııalyq Lında Sıtkova qola júldege ıe boldy.
Qazirgi tańda jasóspirimder Olımpıadasynda Qazaqstan quramasynyń enshisinde eki medal bar. Dzıýdoshy Fatıma Supyǵalıeva altyn medal ıelense, Ramazan Áınegov trıatlonnan qola júldege ıe boldy.
Dastan KENJALIN,
ASTANA
