Álem chempıonatynda qazaq mergenderi júlde aldy

Búgin Ońtústik Koreıadan súıinshi habar aldyq. At ústinen sadaq atýdan uıymdastyrylǵan álem chempıonatynyń  komandalyq jarysynda bizdiń úsh mergenimiz qola júldeger atandy.

Ońtústik Koreıanyń Sokhcho qalasynda at ústinen sadaq atýdan XV álem chempıonatynyń 27 tamyzda bastalǵanyn, bizdiń Abzal Týlybekov, Eralhan Aıkóz, Baqdáýlet Babajan, Aıtbek Sarybaı  esimdi mergenderimizdiń osy jarystyń bel ortasynda júrgenin birer kún buryn habarlaǵan bolatynbyz. Bıylǵy álem chempıonatynda 27 memlekettiń jetpiske jýyq mergeni baq synaýda.

Sýrette: At ústinen sadaq atýdan  álem chempıonatynda «Massae  stıli»  boıynsha 2018 jylǵy chempıon, al, bıylǵy XV álem chempıonatynyń qola júldegeri, bolashaǵynan zor úmit kúttirgen qazaqtyń aıtýly surmergenderiniń biri  Abzal Týlybekov. 

Sýrette: At ústinen sadaq atýdan  XV álem chempıonatynda «Massae  stıli»  boıynsha  qola júldeger atanǵan (soldan ońǵa qaraı) mergender Eralhan Aıkóz ben Baqdáýlet Babajan.

Qazaq eliniń ulttyq qurama komandasyn XV álemdik dodaǵa bastap barǵan qos jattyqtyrýshynyń biri, Jamby atýdan respýblıkalyq bas tóreshi Eldos Badashev bergen málimetke súıensek, bıylǵy álem chempıonatynyń básekesinde dúnıejúzi mergenderi «Koreı stıli», «Túrik stıli», «Massae  stıli», «Mogý stıli» jáne «Qazaq stıli» atty bes túrli jarystan synǵa túsýde. Bizdiń mergender – Abzal Týlybekov, Eralhan Aıkóz, Baqdáýlet Babajan búgin «Massae  stıli» boıynsha ótken komandalyq jarysta qola júldeni utyp alǵan. Eske sala ótelik, dál osy jarys túrinen ótken jylǵy Álem chempıonatynda Abzal Týlybekov pen Eldos Badashev bas júldeni ıelengen bolatyn. Bul degenińiz, on bes metrlik qashyqtyqtan 20 santımerlik nysanany quıǵyta shapqan at ústinen atyp qulatý saıysy. «Massae  stıli» boıynsha ótken búgingi mergendik saıysynda bas júldeni Ońtústik Koreı, kúmis júldeni Amerıka sportshylary ıelenipti.

Sýrette: Qazaq eliniń ulttyq qurama komandasyn XV álemdik básekege bastap barǵan  jattyqtyrýshy, Jamby atýdan respýblıkalyq bas tóreshi,  At ústinen sadaq atýdan  álem chempıonatynda «Massae  stıli»  boıynsha 2018 jylǵy chempıon  Eldos Badashev (oń jaqta).

Erteń at ústinen sadaq atýdan XV álem chempıonatynyń sońǵy kúni.  «Túrik stıli», «Mogý stıli» jáne álemdik synnyń baǵdarlamasyna tuńǵysh qosylǵan «Qazaq stıli» boıynsha mergendik básekeleri erteń ótkizilmekshi. Jamby atýdyń bas tóreshisi bizdiń surmergenderdiń erteńgi «Qazaq stıli» boıynsha ótetin jarysta taǵy da qomaqty júldeni ıelenedi degen senimde. Mergenderimizge biz de tilekshi bolaıyq. Erteń qazaq sportshylarynyń qanjyǵasyna XV álemdik dodanyń bas júldesi baılanýy bek múmkin.