SportPress.kz قازاقستان سپورت جاڭالىقتارى
ءبىزدىڭ سۇرمەرگەندەر وڭتۇستىك كورەيادا وتكەن XV الەم چەمپيوناتىنان قانجىعالارىن مەدالعا تولتىرىپ ورالۋدا. قازاق ۇلتتىق قۇراما كومانداسىنىڭ سپورتشىلارى الەمدىك ايقاستا جيىنى 3 التىن، 2 كۇمىس، 12 قولا مەدال ۇتىپ الدى دەگەن ءسۇيىنشى حابار الدىق. جەڭىمپاز سپورتشىلارىمىز ارقىلى وڭتۇستىك كورەياداعى دۇنيەجۇزىلىك ات ۇستىنەن ساداق اتۋ فەدەراتسياسى ۇلتتىق سپورت قاۋىمداستىعىنا ارنايى سىيلىق جولداپتى.
وڭتۇستىك كورەيانىڭ سوكحچو قالاسىندا ات ۇستىنەن ساداق اتۋدان وتكەن XV الەم چەمپيوناتى بۇگىن اياقتالدى. 27 مەملەكەتتىڭ تاڭداۋلى مەرگەندەرى «كورەي ءستيلى»، «تۇرىك ءستيلى»، «ماسساە ءستيلى»، «موگۋ ءستيلى» جانە بيىلعى الەمدىك باسەكەنىڭ باعدارلاماسىنا تۇڭعىش ەنگىزىلگەن «قازاق ءستيلى» سياقتى بەس ءتۇرلى جارىستان بەس كۇن بويى باق سىنادى.
ەسكە سالىپ وتسەك، XV الەم چەمپيوناتىنا اتتانعان قازاقستان ۇلتتىق قۇراماسى ساپىندا ابزال تۋلىبەكوۆ، ەرالحان ايكوز، باقداۋلەت باباجان، ايتبەك سارىباي ەسىمدى سپورتشىلار مەن جاتتىقتىرۋشىلار ەلدوس باداشەۆ پەن ارسلان قابجانوۆ بار بولاتىن. ءبىز كەشەگى اقپاراتىمىزدا ابزال تۋلىبەكوۆ، ەرالحان ايكوز، باقداۋلەت باباجاننىڭ «ماسساە ءستيلى» بويىنشا وتكەن كوماندالىق جارىستا قولا جۇلدەنى ۇتىپ العانىن حابارلاعان بولاتىنبىز. «ماسساە ءستيلى» بويىنشا وتكەن كەشەگى مەرگەندىك سايىسىندا باس جۇلدەنى وڭتۇستىك كورەي، كۇمىس جۇلدەنى امەريكا سپورتشىلارى يەلەنىپتى.
ال، بۇگىن ءبىزدىڭ مەرگەندەر قالىڭ جانكۇيەردى ۇلتتىق سپورتتىڭ تاريحىندا بۇرىن-سوڭدى بولماعان ۇزدىك ناتيجەلەرىمەن قۋانتۋدا. قازاق مەرگەندەرى الەم چەمپيوناتىنىڭ سوڭعى كۇنى مەدال سانىن ون جەتىگە جەتكىزىپتى. بۇگىنگى كۇنى وتكەن كوماندالىق جارىستارعا رەسپۋبليكالىق، حالىقارالىق جارىستاردىڭ بىرنەشە دۇركىن جۇلدەگەرى اتانعان ايتۋلى مەرگەن، جامبى اتۋدان ەلىمىزدىڭ باس تورەشىسى ەلدوس باداشەۆ تە قاتىسىپ، جەڭىمپازدار قاتارىنان كورىنگەن.
سۋرەتتە: ات ۇستىنەن ساداق اتۋدان XV الەم چەمپيوناتىن جەڭگەن قازاق سۇرمەرگەندەرى (سولدان وڭعا قاراي): ابزال تۋلىبەكوۆ – 3 قولا مەدال; ايتبەك سارىباي – 1 التىن، 1 قولا مەدال; ەلدوس باداشەۆ – 1 التىن، 2 – قولا مەدال; باباجان باقداۋلەت – 3 قولا مەدال; ەرالحان ايكوز – 1 التىن، 2 – كۇمىس، 3 – قولا –مەدال.
قولىمىزدا بار اقپاراتقا سۇيەنسەك، ات ۇستىنەن ساداق اتۋدان XV الەمدىك دودادا سپورتشىلارىمىز تومەندەگىدەي جارىس تۇرلەرىنە قاتىسىپ، جۇلدەلى ورىنداردى يەلەنىپتى.
«تۇرىك ءستيلى» بويىنشا «قاباق» اتۋدان كوماندالىق جارىستىڭ جەڭىمپازدارى:
ەلدوس باداشەۆ، ايتبەك سارىباي، ەرالحان ايكوز;
«تۇرىك ءستيلى» بويىنشا جەكە نىسانا اتۋدان ەكى دۇركىن كۇمىس جۇلدەگەرى:
ەرالحان ايكوز;
«كورەي ءستيلى» بويىنشا بىر نىسانا اتۋدان كوماندالىق جارىستىڭ قولا جۇلدەگەرلەرى:
ەلدوس باداشەۆ، باباجان باقداۋلەت، ايتبەك سارىباي;
«كورەي ءستيلى» بويىنشا ەكى نىسانا اتۋدان كوماندالىق جارىستىڭ قولا جۇلدەگەرلەرى:
ەلدوس باداشەۆ، ابزال تۋلىبەكوۆ، ەرالحان ايكوز;
«ماسساە ءستيلى» بويىنشا كوماندالىق جارىستىڭ قولا جۇلدەگەرلەرى:
باباجان باقداۋلەت، ابزال تۋلىبەكوۆ، ەرالحان ايكوز;
«ماسساە ءستيلى» بويىنشا «ماستەرشيپ» جارىسىنىڭ قولا جۇلدەگەرلەرى:
باباجان باقداۋلەت، ابزال تۋلىبەكوۆ، ەرالحان ايكوز.
ات ۇستىنەن ساداق اتۋدان XV الەم چەمپيوناتىندا ولجا سالعان قازاقستان ۇلتتىق قۇراما كومانداسىنىڭ سپورتشىلارى 3 قىركۇيەك كۇنى الماتىعا ورالادى. دۇنيەجۇزىلىك مەرگەندىك سايىسىندا قازاق ەلىنىڭ نامىسىن اسقاقتاتقان سۇرمەرگەن ۇلدارىڭىزدىڭ جەڭىسى قۇتتى بولسىن، قادىرلى جانكۇيەر!
تولەگەن جاكىتاي
