«اقيقات» جۋرنالىنىڭ ءداستۇرلى دوداسى

الماتىدا وسىمەن جەتىنشى رەت شاحماتتان «قازاق گازەتتەرى» جشس-نە قاراستى «اقيقات» جۋرنالىنىڭ جۇلدەسى ءۇشىن تۋرنير ءوتتى.

بۇل جارىس 2012 جىلى سەرىكتەستىكتىڭ باس ديرەكتورى-رەداكتورلار كەڭەسىنىڭ توراعاسى بولعان قارىمدى قالامگەر، قوعام قايراتكەرى جۇمابەك ومار ۇلى كەنجاليننىڭ ۇسىنىسىمەن باستالىپ، قازىر جۋرناليستەر اراسىنداعى ءداستۇرلى تۋرنيرلەردىڭ بىرىنە اينالىپ وتىر.

بيىلعى دوداعا 26 جۋرناليست قاتىستى. تۋرنير جىلداعى ءداستۇر بويىنشا شۆەيتساريالىق جۇيە بويىنشا 5 تۋردان ءوتىپ، وعان  شاحمات مەكتەبىنىڭ ديرەكتورى داۋلەت يمانبەرلينوۆ تورەلىك ەتتى. ال جارىسقا «ايعاق» تەلەراديوكومپانياسى دەمەۋشىلىك جاسادى.

تۋرنيردە ءبىرىنشى ورىندى «اقيقات» جۋرنالىنىڭ باس رەداكتورى امانحان ءالىم جەڭىپ الدى. ەكىنشى ورىندى جۋرناليست بالتابەك تۇيەتاەۆ، ءۇشىنشى ورىندى تىلەك ابدراحيموۆتار يەلەندى. ال الدانازار جايلى ۇلى، ەرىك وسپانوۆ پەن يبرايم باراتوۆقا ىنتالاندىرۋ سىيلىعى بۇيىردى. سونداي-اق، اسحان ومىرباەۆقا «بەلسەندى قاتىسۋشى»، اعا بۋىن وكىلدەرى ماماديار جاقىپ پەن ايان نىسانالينگە «ارداگەر قاتىسۋشى» نوميناتسياسى بويىنشا اقشالاي سىيلىقتار مەن العىس حاتتار تابىس ەتىلدى.

–وسى تۋرنيرگە جىلدا قاتىسامىز. سوندا جۋرناليستەر ءبىر-ءبىرىن كورىپ قۋانادى. وسىندا دۇنيەدەن ءوتىپ كەتكەن تالاي ازاماتتاردى ەسكە الامىز. بۇل ءتۋرنيردىڭ باستاماشىسى جۇمابەك كەنجالين بولاتىن. ەندى وسى جارىستى جۇمابەكتىڭ اتىنا بەرسە دە ارتىق بولماس ەدى. الداعى ۋاقىتتا ونى جىگىتتەر ويلانار.

بۇل جاقسى ءداستۇر. قازاق جۋرناليستيكاسىندا مۇنداي ءداستۇرلى نارسە تىم كوپ ەمەس. «اقيقات» جۋرنالى جاقسى باستاماسىن جۇيەلى جۇرگىزىپ كەلە جاتىر. جارىس الداعى ۋاقىتتا دا جالعاسا بەرسە دەپ ويلايمىن. ويتكەنى، ول كەرەك. بۇرىن ءبىز جۋرناليستەر ءبىر-بىرىمىزبەن جاقىن جۇرەتىنبىز. ول كەزدە ۇلكەن ءبىر عيماراتتا بىرگە جۇمىس ىستەدىك. ال ەندى ءبىر-ءبىرىمىزدى كورۋ ءۇشىن وسىنداي كەزدەسۋلەر بىزگە كەرەك-اق. سوندىقتان مەن وسىنى ۇيىمداستىرعان ازاماتتارعا راحمەتىمدى ايتامىن. بولاشاقتا جاقسى نارسە جالعاسا بەرسىن دەيمىن، – دەدى قازاق جۋرناليستكاسىنىڭ قايراتكەرى ماماديار جاقىپ.

ال ءتۋرنيردى وتكىزۋشى «قازاق گازەتتەرى» جشس-نە قاراستى «اقيقات» جۋرنالىنىڭ باس رەداكتورى امانحان ءالىم بىزگە بەرگەن سۇحباتىندا جارىستىڭ ءمانى مەن ماڭىزىنا توقتالىپ، وعان ارىپتەستەرىمىزدىڭ جىل سايىن كوپتەپ قاتىسىپ كەلە جاتقانىن، ءتۋرنيردىڭ الداعى ۋاقىتتا دا جالعاسا بەرەتىنىن ايتتى.

لايىم سولاي بولسىن! ءجۇز جىلدىق تاريحى بار اعا جۋرنالدىڭ جۇلدەسى ءۇشىن جارىستار كوبەيە بەرسىن!

 
رۇستەم جۇمان ۇلى،

 الماتى