قابانباي باتىر مەموريالى مارەسىنە جەتتى

سەمەيدە داڭقتى قولباسشى، دارابوز باتىر قاراكەرەي قابانبايعا ارنالعان «قابانباي باتىر مەموريالى سامبو كۇرەسىنەن قازاقستان رەسپۋبليكاسىنىڭ كۋبوگى» ءوز مارەسىنە جەتتى. بۇل تۋرالى جاقسىلىق ۇشكەمپىروۆ اتىنداعى سەمەي سپورت اكادەمياسى.

جاقسىلىق ۇشكەمپىروۆ اتىنداعى سەمەي سپورت اكادەمياسى جانە شىعىس قازاقستان وبلىستىق سپورتتىق جانە جاۋىنگەرلىك سامبو فەدەراتسياسىنىڭ ۇيىمداستىرۋىمەن وتكەن جارىس بيىل 20-شى مارتە جالاۋىن كوتەردى. ۇلان – عايىر اتىراپتان ۇلىلار ەلىنە جينالعان سامبو شەبەرلەرى سەمەيدىڭ تورىنە توسەلگەن بوزكىلەمنىڭ كورىگىن قىزدىرادى. ەرلەر، ايەلدەر جانە جاۋىنگەرلىك سامبودان سىنعا تۇسكەندەر 9 سالماقتا باق سىنادى. ايتا كەتەيىك، بيىل اتالعان جارىسقا 13 كوماندادان 300-دەن استام بالۋان جينالدى. نۇر-سۇلتان مەن الماتى قالالارى،

الماتى، اقتوبە، باتىس قازاقستان، جامبىل، قاراعاندى، قوستاناي، قىزىلوردا، ماڭعىستاۋ، پاۆلودار، تۇركىستان، شىعىس قازاقستان وبلىستارىنان كەلگەن كىل مىقتىلار ءوزارا كىم مىقتىنى انىقتادى.

جارىستىڭ اشىلۋ سالتاناتىندا سەمەي قالاسى اكىمىنىڭ ورىنباسارى قانات ادىلباەۆ، قازاقستانعا ەڭبەگى سىڭگەن قوعام قايراتكەرى قۇسمان شالاباەۆ قۇتتىقتاۋ ءسوز سويلەدى.

«قابانباي باتىر مەموريالى سامبو كۇرەسىنەن قازاقستان رەسپۋبليكاسى كۋبوگىنىڭ» وتۋىنە دەمەۋشىلىك جاساپ جانە ۇيىمداستىرۋدىڭ ۇنەمى باسى-قاسىندا جۇرگەندەرگە قازاقستاندىق سپورتتىق جانە جاۋىنگەرلىك سامبو فەدەراتسياسىنىڭ جانە شىعىس قازاقستان وبلىستىق سپورتتىق جانە جاۋىنگەرلىك سامبو فەدەراتسياسىنىڭ  ماراپاتتارى تابىستالدى.

«بۇل جارىس جىل سايىن جوعارى دەڭگەيدە وتەدى جانە جىلدىڭ قورىتىندى دەپ ەسەپتەۋگە بولادى. بارلىق كوماندا وزدەرىنىڭ مىقتى بالۋاندارىن اكەلدى. شىعىس قازاقستان، قاراعاندى، الماتى، اقتوبە وبلىستارىنىڭ بالۋاندارىنىڭ دايىندىقتارى جوعارى بولدى. قىزىلوردا، تۇركىستان وبلىستارىنىڭ قىزدارى دا جاقسى ناتيجە كورسەتتى»، – دەيدى جارىستىڭ باس تورەشىسى سەيسەنباي جاناسىلوۆ.

العاشقى ەكى كۇندە قابانباي باتىر مەموريالى ءۇشىن جەكە سالماقتاردا كۇرەسكەندەر ءوزارا جەڭىمپازداردى انىقتادى. ءۇشىنشى كۇنى سامبو كۇرەسىنەن قازاقستان رەسپۋبليكاسىنىڭ كۋبوگى ساراپقا سالىندى. كوماندالىق سايىستا ەرلەر اراسىندا شىعىس قازاقستان وبلىسى ءبىرىنشى، اقتوبە وبلىسى ەكىنشى، الماتى قالاسى ءۇشىنشى ورىننان كورىنسە، ايەلدەر اراسىندا تۇركىستان وبلىسى ءبىرىنشى، قىزىلوردا وبلىسى ەكىنشى، شىعىس قازاقستان وبلىسى ءۇشىنشى ورىنعا تۇراقتادى. جاۋىنگەرلىك سامبودا قوستاناي وبلىسى قارسىلاس شاق كەلتىرمەي تۇعىردىڭ بيىك ساتىسىنان كورىنسە، قاراعاندى جانە شىعىس قازاقستان وبلىسى ەكىنشى جانە ءۇشىنشى ورىندى ءبولىستى. جالپى كوماندالىق ەسەپتە شىعىس قازاقستان وبلىسى ءبىرىنشى، تۇركىستان وبلىسى ەكىنشى جانە اقتوبە وبلىسى ءۇشىنشى ورىن الدى.

جەكە سالماقتا ايەلدەر اراسىندا جادىرا پايىز، ايجان جىلقىباەۆا، مارجان بيزاق، بوتا وڭعارسىن، ارۋجان ءساتوۆا، گۇلدارايىم الماعانبەت، ارۋجان بايزاق، مەرەكە قۇدايبەرگەنوۆا، مەرۋەرت ابۋباكىر توپ جاردى. ەرلەر اراسىندا ارمان تۇرۋمبەتوۆ، قىلىش ەرەنعايىپوۆ، راحات جانانيەت، ايان قۇرمانبەك، ارمان تايباعاروۆ، رۋسلان جارقىنباەۆ، عابيت داۋلەتباەۆ، باتىرحان ءجۇنىسوۆ، ءادىل ورازباەۆ وزا شاپتى. جاۋىنگەرلىك سامبودان سىنعا تۇسكەندەر ىشىندە ءانۋار كارىباەۆ، ايبەك جانبولات ۇلى، باقىتجان عۇمىر، امانجول حايسا، نۇربول قۇلبەكوۆ، احمات بوبوەۆ، ۋمار يانكوۆسكي، الىبەك تەمىرباەۆ، تالعات جيەنتاەۆتاردىڭ بابى كەلىسىپ، باعى جاندى.