جاقسى كەلدى دەگەنشە — جارىق كەلدى دەسەڭشى

ەل سپورتىنىڭ ەڭسەسىن كوتەرۋ ءۇشىن اۋىل-ايماقتاعى سپورتتى دامىتۋ كەرەك ەكەنىن كەيبىر وبلىستار ىسىمەن دالەلدەپ كەلەدى. ايتالىق، جەر جاناتى جەتىسۋ جەرىندە اۋىل سپورتىنا ايىرىقشا كوڭىل بولىنۋدە. وعان سەبەپ، قايبىر ماماندىق بولسىن ءوز سالاسىنىڭ مامانى بولعان جاعدايدا عانا سول سالانىڭ ورەسى كەڭەيىپ، ءىسى وڭعا باسا باستايدى.

مامان بولۋ ءبىر توبە، ەگەر ءوزىنىڭ سۇيىكتى ماماندىعىنا سۇيىسپەنشىلكپەن قاراپ، بەلسەنە جۇمىس ىستەسە نۇر ۇستىنە نۇر بولا تۇسەرى حاق. ءبىزدىڭ ايتقالى وتىرعانىمىز، الماتى وبلىسى سپورتىنىڭ دامۋى مەن سۇيىكتى سالاسىنا جاناشىرلىقپەن قارايتىن بىلىكتى مامان تۋرالى بولىپ وتىر. مىسالى، «جاقسى كەلدى دەگەنشە – جارىق كەلدى دەسەڭشى»، – دەگەندەي، گرەك-ريم كۇرەسىنەن وليمپيادا ويىندارىنىڭ كۇمىس جۇلدەگەرى نۇرباقىت تەڭىزباەۆ الماتى وبلىسى دەنەشىنىقتىرۋ جانە سپورت باسقارماسىنىڭ باسشىلىعىنا كەلگەلى بەرى ءوڭىر سپورتى ەرەكشى قارقىن الىپ، جەر-جەردە سپورت مەكتەپتەرى اشىلىپ، كەشەندى سپورت نىساندارى سالىنا باستادى. سونىمەن قاتار، جاستاردىڭ سپورتقا دەگەن قۇلشىنىسى اسىرەسە اۋىل-ايماقتاردا ايىرىقشا. ارينە، سپورتتىق ينفراقۇرىلىمداردىڭ جاڭا زامان اعىمىنا ساي بوي كوترىپ، سپورت زالدار جاسوسپىرىمدەرگە تولىعا باستاۋى كوڭىلدى قۋانتپاي قويمايدى. ويتكەنى، سپورت پەن دانساۋىلىققا كوڭىل بولگەن قوعامدا جامان ادەت پەن ارەكەتتەرگە ورىن بولماسى انىق. سوندىقتان دا بىلىكتى دە بىلگەر، جاستا بولسا باس بولىپ، ءوڭىر سپورتىن باسقارىپ وتىرعان نۇرباقىت تەڭىزباەۆتىڭ ايماقتاعى سپورتتى دامىتۋ مەن قاتار ۇلكەن سپورتتاعى دارىندى جاستارعا جاعداي تۋعىزۋ ماقساتىنداعى ءاربىر يگىلىكتى قادامى جەمىسىن بەرىپ كەلەدى.

جەتىسۋ جەرىنىڭ وي-قىرىندا وتكەن ءاربىر جودالى جارىستى نازاردان تىس قالدىرمايتىن بىلىكتى مامان جاس بالۋانداردىڭ قاناتىن قامداپ بيىككە ۇشۋىنا قولدان كەلگەنشە قامقورلىعىن اياماۋدا. سونىمەن قاتار، نۇرباقىت تەڭىزباەۆ تالانتتى جاستاردىڭ كوپتەپ ءوسىپ كەلە جاتقانىنا قۋانا ايتادى. «تالاپتى بالا – تالپىنعان قۇستاي، قۇمارى قانباس اسپانعا ۇشپاي»، دەمەكشى، تالانتتى بالالاردىڭ اراسىنان بولاشاقتى وليمپيادا اسۋىن باعىندىراتىن بالۋاندار شىعاتىنىنا وبلىس سپورتىنىڭ باسشىسى نىق سەنىمدى. ارينە، «ۇلدى ۇياسىندا باۋلا» دەگەندەي، دارىندى جاستاردى كورە ءبىلۋ ولاردى كوپ الدىنا شىڭداپ الىپ شىعۋ باپكەرى ءۇشىن ۇلكەن سىن. سوندىقتان دا جاتتىقتىرۋشىلاردىڭ دا تالانتتاردى تاني ءبىلىپ، تالماي جاتتىقتىرۋ ءۇشىن جاعدايلارى وڭدى بولعانى ماڭىزدى. ال، ءوزى سپورتتىڭ قارا قازانىندا قايناپ،سپورت زالدا شۇمەكتەپ تەر توگىپ ارمانى ماقساتىنا جەتە بىلگەن نۇرباقىت سەكىلدى ءوڭىر سپورتىن باسقاراتىن باسشى ول جاعىن جاقسى بىلەدى. سوندىقتان دا باپكەرلەرگە دەگەن قولداۋ-قامقورلىقتى ەرەكشە نازارعا العان. جاسوپىرىمدەرگە الامان جارىستاردا سەسكەنبەي دوداعا ءتۇسۋ ءۇشىن شەبەرلىك پەن قوسا جۇرەكتىلىك تە كەرەك. ال، ءجيى-ءجيى وتكەن جارىستار جاسا بالۋانداردىڭ قايراتىن شىڭداپ، قورقىنىشىن جويادى. بۇل دەگەنىمىز، جاستارعا ءدۇبىرلى وتەر جارىستاردىڭ اۋداي قاجەت ەكەندىگىن بىلدىرەدى. بالۋ ءوسۋ ءۇشىن، ۇلكەن سايىستارعا ۇزبەي اپارىپ باعىن سىناتۋ كەرەك. سوندا عانا جاس بالۋان توسەلىپ، شىڭايا تۇسەدى. مىنە، سوندىقتان دا الماتى وبلىستىق سپورت باسقارماسى ءدۇبىرلى جەكپە-جەكتەردى ۇيىمداسىرۋعا ۇيىتقى بولىپ، زور كوڭىل بولە باستاعان. ال، ەندى تالدىقورعاندا دزيۋدو، گرەك-ريم، ەركىن كۇرەس تۇرلەرىنەن دۇبىرلەتىپ ءوتىپ جاتقان جارىستار ايتىلعان ءسوزىمىزدىڭ ايعاقتارى دەسە بولادى. ەندى سول باسەكەلەردە جەڭىس بيىكتەرىنەن كورىنگەن التىن جۇلدەلى ءجاسوپىرىم ۇل-قىزدار ەل چەمپيوناتىندا وبلىستىڭ نامىسىن قورعايتىن بولادى. ەل سپورتىنىڭ دامۋى اۋىل سپورتىنا تىكەلەي بايلانىستى ەكەندىگىنە بەك سەنىمدەمىز.

اقىن ورداباي ۇلى،

الماتى