الىپتار اۋىلدان شىعادى

جۋىردا جەتىسۋ وڭىرىنە جول ءتۇسىپ بارىپ قايتقان ەدىك. كەزىندە  ءىلياس جانسۇگىروۆ ءوز جىرلارىنا ارقاۋ بولىپ كەستەلەگەن جەتىسۋ ولكەسىنىڭ تۇمسا تابيعاتىنا ءسۇيسىنىپ، ءوزىڭنىڭ دە كومەيىڭنەن جىر سۋىرلىپ شىعاتىنداي كۇيدە بولاسىڭ. اللانىڭ نۇرى قونعان جەردىڭ ءبىر جانناتى دەرسىڭ. كولىكپەن جەلدەي ەسىپ بارا جاتىپ، قازاعىمنىڭ كەڭ بايتاق دالاسىنا كوزىڭ تويماي تامسانا قاراي بەرەسىڭ. بۇل ءبىر عاجاپ اسەرلى كورىنىس.

تالدىقورعان قالاسىنا كەلىپ تابان تىرەگەننەن كەيىن، گرەك-ريم كۇرەسىنەن وليمپيا ويىندارىنىڭ كۇمىس جۇلدەگەرى، الماتى وبلىسى سپورت باسقارماسىنىڭ باستىعى، ءوڭىر سپورتىنىڭ دامۋىنا ولشەۋسىز ۇلەس قوسىپ جۇرگەن دارابوز بالۋان نۇرباقىت تەڭىزباەۆپەن ءبىر تاماشا كەزدەسۋ بولدى.

مەن كەلگەندە  وبلىس ورتالىعىنداعى بىرنەشە سپورت كەشەندەرىندە الماتى وبلىسى مەملەكەتتىك قىزمەتكەرلەرىنىڭ اراسىندا سپورتتىڭ 7 تۇرىنەن سپارتاكيادا بولىپ جاتىر ەكەن. ءار اۋداننىڭ مىقتىلارى جەڭىس ءۇشىن جان اياماي كاسىبي سپورتشىلارداي شەبەرلىكتەرىن سالىپ-اق جاتىر. اسىرەسە، ورتالىقتا بارلىق حالىقارالىق ستاندارتقا ساي سۋ جاڭادان سالىنعان  سۋالابىندا ۇزاقتىققا ءجۇزۋ، شالقالاي مالتاۋ سەكىلدى تۇرلەردەن سىنعا تۇسكەن اۋدان، اۋىلدا تۇراتىن قىزمەتكەرلەردىڭ شەبەرلىگىنە كوز الماي قاراپ، ۇلكەن اسەر الدىم. ءيا، ەلدەگى اعايىنداردىڭ مۇنداي جاقسى كورسەتكىشتەردى كورسەتۋى وڭىرلەردە سپورتقا دەگەن زور كوڭىل ءبولىنۋدىڭ ارقاسىندا دەپ ايتۋعا تولىقتاي نەگىز بار. ويتكەنى، قازىر الماتى وبلىسىنىڭ ءار اۋدانىندا ءتىپتى، كەيبىر اۋىلداردا سپورت كەشەندەرى بىلاي تۇرسىن، وزەن سۋى جوق ايماقتاردىڭ وزىندە سۋ سپورتىنا بار جاعداي جاسالعانىن بايقايسىز.

ەندەشە، ەل سپورتىنىڭ التىن دىڭگەگى اۋىل سپورتىندا ەكەنىن وبلىس سپورتىنىڭ تىزگىنىن ۇستاعان نۇرباقىت تەڭىزباەۆ جاقسى بىلەدى. سول ءۇشىن دە بىلىكتى مامان اۋىل سپورتىن دامىتۋ ارقىلى اۋىلداردا سپورت كەشەندەرىن سالۋعا بار كۇش-جىگەرىن سارپ ەتۋدە. اۋىلدا تۋىپ وسكەن ادام عانا اۋىل تۇرمىسىن، اۋىل جاعدايىن جاقسى بىلەدى. مەنىڭشە، كەزىندە وبلىس اكىمى بولعان اماندىق باتالوۆ پەن وبلىس سپورتىنىڭ قازانىندا قايناپ اۋىل جاستارىنا قامقورلىق قولداۋىن اياماي جۇرگەن بىلىكتى باسشى، بىلگىر مامان، داڭقتى بالۋان نۇرباقىت تەڭىزباەۆتىڭ ەرەن ەڭبەكتەرىنىڭ جەمىسى بۇگىنگى كۇنى كوز الدىڭا كورىنە باستاعانىنىڭ كۋاسى بولاسىز. حوش، سونىمەن جەتىسۋ جەرىنە كەلگەن ساپارىمدا ءوڭىر سپورتىنىڭ تىنىمسىز قارقىن الىپ جاتقانىنا كوز جەتكىزىپ، ەرەكشە اسەردە قالدىم.

بۇگىنگى كۇنى سپورتتىڭ ءار تۇرىنەن وليمپيادا، الەم، ەۋروپا جارىستارىندا ەلىمىزدىڭ نامىسىن ابىرويمەن قورعاپ جۇرگەن الماتى وبلىسىنىڭ سپورتشىلارىنىڭ تولاعاي تابىستارى وڭىرلەردە جاسالعان جاقسى جاعدايدىڭ ناتيجەسى ەكەنىنە كوز جەتكىزەسىز. وسىنداي قاسيەتتى مەكەندەگى سپورتشىلاردىڭ اياق الىسى تۋرالى باق كوزدەرىنەن جازعان جازبالارىم ەسكەرۋسىز قالماعان ەكەن. وبلىس سپورتىنىڭ باسشىسى، بەلگىلى بالۋان نۇرباقىت مولداحمەت ۇلى قۇرمەتپەن ماعان ديپلوم تابىس ەتتى. ازعانا جازبامدى ەلەپ، ەسكەرىپ بەرگەن قۇرمەتىنە بالۋانعا زور العىسىمدى ءبىلدىردىم.  قازاقى داستۇرمەن مەندە ءوز تاراپىمنان وسى جىلى جارىققا شىققان «ىزگىلىكپەن ورىلگەن ءومىر» اتتى قازاق سپورتىنىڭ  قايراتكەرلەرى تۋرالى 30 جىلدىق جيىپ تەرگەن ەڭبەگىم تۋرالى جازعان ەنتسيكلوپەديالىق كىتابىمدى داڭقتى بالۋانعا  تارتۋ ەتتىم. سوسىن بۇل كەزدەسۋدە ەستە قالار دەگەن ويمەن ەستەلىك سۋرەتكە تۇستىك. ءوڭىر سپورتىنىڭ جارشىسى نۇرباقىت مولداحمەت ۇلىمەن وسىلايشا قوشتاسىپ شىققان كەيىن، وسى جەتىسۋ ءوڭىرىنىڭ تۋماسى اتى بارشا قازاققا ءمالىم ايگىلى بالۋان ەركىن كۇرەستەن اتى ايشىقتى بالۋان، قازاق جاستارى اراسىنان تۇڭعىش رەت اتلانتا وليمپياداسىنىڭ قولا جۇلدەگەرى اتانعان، سونىمەن قاتار، قانداستارىمىزدىڭ اراسىنان ازيا ويىندارىنىنىڭ العاش رەت التىن جۇلدەسىن جەڭىپ العان اتى بارشا ەلگە بەلگىلى بالۋان، الماتى وبلىسى وليمپيادالىق رەزەۆتەردى دايارلاۋ ورتالىعىنىڭ ديرەكتورى تاعى ءبىر الاشتىڭ اسىل ەرى ماۋلەن مامىروۆپەن كەزدەسىپ، شىعارماشىلىق كىتابىمدى اسا قۇرمەتپەن تابىس ەتتىم. ويتكەنى، ماۋلەن ساتىمباي ۇلى كىتاپتاعى باستى ءبىر كەيىپكەرلەردىڭ ءبىرى بولاتىن. وسىلايشا جەر جانناتى جەتىسۋعا بارىپ قايتقان ساپارىم مەن ءۇشىن ەرەكشە تارتىمدى ءارى اسەرلى  بولدى.

بۇل ايماقتان نۇرباقىت تەڭىزباەۆ، ماۋلەن مامىروۆ سىندى شوقتىعى بيىك ايگىلى بالۋانداردىڭ ءىزىن باسار ءالى جارىق جۇلدىزداردىڭ شىعاتىنىنا بەك سەنىمدىمىن. ول ءۇشىن ناقتى جاعدايلار جاسالىنىپ جاتقانى كوزدى الىپ تۇر. ال، جاعداي جاسالعان جەردە جاستارىمىزدا جارقىن جەڭىسىمەن جەمىسىن بەرەتىنى ءسوزسىز.

اقىن ورداباي ۇلى،

الماتى