سپورتقا بولىنگەن قارجى تەكسەرىلۋى كەرەك – داۋلەت تۇرلىحانوۆ

بۇگىن الماتىدا قازاقتىڭ ايگىلى بالۋانى، گرەك-ريم، ەركىن جانە ايەلدەر كۇرەسى فەدەراتسياسىنىڭ پرەزيدەنتى، ازيا كۇرەس فەدەراتسياسىنىڭ پرەزيدەنتى، UWW بيۋروسىنىڭ مۇشەسى داۋلەت تۇرلىحانوۆ جۋرناليستەرمەن كەزدەسىپ،ەل سپورتىنداعى وزەكتى ماسەلەلەر جايىندا پىكىرىن ءبىلدىردى.

ءباسپاسوز ءماسليحاتى باستالا سالىپ، داۋلەت بولات ۇلى قازىرگى كۇندەگى ەلدەگى جاسوسپىرىمدەر، جاستار جانە ەرەسەكتەر اراسىنداعى گرەك-ريم، ەركىن جانە ايەلدەر كۇرەسىندەگى جاسالىپ جاتقان ىرگەلى جۇمىستار مەن جەتىستىكتەردى تارقاتا ايتىپ، توبىقتان تارتىپ تۇرعان ءتۇيىندى ماسەلەرگە دە توقتالىپ ءوتتى.

«مەنى قازىرگى كەزدەگى ەل سپورتىنداعى كوپتەگەن وزەكتى ماسەلەلەر تولعاندىرادى. ايتالىق، سپورت پەن مادەنيەتتىڭ قوساقتالىپ جۇمىس ىستەپ جاتقانى دۇرىس ەمەس. ويتكەنى، مادەنيەتتىڭ وزىنە قاتىستى ماسەلەلەرى جەتىپ جاتىر. سول سەكىلدى سپورتتىڭ دا ءوز الدىنا وزەكتى پروبلەمالارى بار. سوندىقتان ەكەۋى دە بولەك شارۋاشىلىق بولعاندىقتان ءبولىنۋى كەرەك. سونىمەن قاتار، مادەنيەت جانە سپورت ءمينيسترى داۋرەن اباەۆقا ايتارىم، ۇلكەن سپورتقا ايماقتاردا بولىنەتىن قارجى ماسەلەسىنە قايتا نازار اۋدارسا دەيمىن. بۇگىنگى كۇنى وقۋ-جاتتىعۋ جۇمىستارىن وتكىزۋ بارىسىندا كوپتەگەن كەدەرگىلەر تۋىنداپ جاتادى. مىسالى، كۇرەس تۇرلەرىندە عانا ەمەس بارلىق سپورتتا باسەكەلەس قارسىلاستارسىز سپورتشى وسپەيتىنىن تۋرالى باسا ايتقىم كەلەدى. ءبىز بۇگىن جاتتىقتىرۋشىلارىمىزدى «قايىرشىنىڭ» كۇيىنە اكەلىپ جەتكىزىپ وتىرمىز. ەلىمىزدە سپورتشىلاردىڭ جارىستارعا دايىندالۋىنا ءتيىستى جاعداي جاسالماعان. سوندىقتان دا سپورت سالاسى ۇلكەن قيىنشىلىقتارعا تاپ كەلىپ وتىر. ايتالىق، باپكەرلەر بارىپ باسشىلىقتان، كوميتەت پەن وليمپيادالىق دايارلاۋ ورتالىعىنىڭ ەسىگىن اشىپ، وقۋ-جاتتىعۋ جيىنىن وتكىزۋ تۋرالى قاراجات قاجەت ەكەنىن سۇراسا، اقشا جوق دەگەن جاۋاپ الادى. مىسالى، گرەك-ريم بالۋاندارى يسلام ويىندارىنا بارىپ، قازاقستان 10 سالماقتىڭ تورتەۋىنە عانا قاتىستى. ال، قالعان سالماق دارەجەلەرىنە قارجى بولىنبەگەن. سوندا مۇنى قالاي تۇسىنۋگە بولادى؟! مەن وسى ورايدا پرەمەر-ءمينيستردىڭ ءبىرىنشى ورىنباسارى ەرالى لۇقپان ۇلى توعجانوۆقا ەلىمىزدەگى بۇقارالىق سپورتقا، جوعارى جەتىستىكتەر سپورتىنا بولىنگەن قارجىعا تەكسەرۋ جۇرگىزۋ تۋرالى ۇندەۋ جولداعىم كەلەدى»، — دەپ داڭقتى بالۋان  ءوز ويىن اشىق ءبىلدىردى.

داۋلەت بولات ۇلى سونىمەن قاتار، جاعا-جاي كۇرەسىن (پلياجنايا بوربا، — رەد.) دامىتۋ بۇگىنگى كەزدە كۇن تارتىبىنەن ماڭىزدى ورىن الىپ وتىرعانىن ايتتى. قازىرگى تاڭدا الەمدە وسى كۇرەس تۇرىنە شىنداپ كىرىسىپ جاتقانىن ايتا كەلىپ، زامان اعىمىنان كەش قالماي ەلىمىزدە دە وسى جاعا-جاي كۇرەسىن دامىتۋدى قولعا الۋ كەرەكتىگىن العا تارتتى. سونىمەن بىرگە، داۋلەت بولات ۇلى الداعى ايدا سەربيانىڭ  بەلگراد قالاسىندا كۇرەس تۇرلەرىنەن وتەتىن الەم چەمپيوناتىنا قاتىساتىن ۇلتتىق قۇرامانىڭ  بالۋاندارى تۋرالى دا ءبىراز اقپار بەرىپ ءوتتى. نەگىزى ەل سپورتىنداعى وزەكتى ماسەلەلەردى كوتەرگەن داڭقتى بالۋاننىڭ ءاربىر ايتقان سوزىنە قوسىلۋعا تۋرا كەلەدى. راسىمەندە وڭىرلەردەگى سپورتقا بولىنەتىن مەملەكەت قارجىسى تىستەگەننىڭ اۋزىندا، ۇستاعاننىڭ قولىندا كەتپەۋى كەرەك. قاجەتتى قارجى كوزى از ءبولىنىپ، جەتەر جەرىنە جەتپەي جاتقاندىقتان سپورت قانا ەمەس ءاربىر سالادا ماسەلە تۋىنداپ جاتقانىن كورىپ جاتىرمىز. سوندىقتان دا داۋلەت بولات ۇلىنىڭ جوعارى بيلىككە جۇرەكجاردا ۇندەۋى وتە دەر كەزىندە بولىپ وتىر دەپ توپشىلاۋعا بولادى. ويتكەنى، بار ءومىرىن كۇرەسكە ارناپ، سپورتتىڭ تايقازانىندا بىتە قايناسىپ وسكەن ايگىلى بالۋاننىڭ كوتەرگەن ماسەلەسى وتە وزەكتى ءارى ماڭىزدى. سول سەبەپتەن حالىقتىڭ  كوكەيىندە كوپتەن بەرى جۇرگەن بۇل ماسەلەگە ءاتۇستى قاراۋعا بولمايدى. ەندەشە، بۇل ۇندەۋگە بيلىك دۇرىس كوزقاراسپەن جاۋاپ بەرەر دەگەن سەنىمدەمىز.

اقىن ورداباي ۇلى،

الماتى