قازاقستان الەم كۋبوگىنىڭ كۇمىس جۇلدەگەرى اتاندى

ەلىمىزدىڭ شورت-ترەكتەن ەرلەر قۇراما كومانداسى كانادانىڭ مونرەال قالاسىندا ءوتىپ جاتقان الەم كۋبوگىنىڭ العاشقى كەزەڭىندە ەستافەتادا ەكىنشى ورىن الدى.

بۇل تۋرالى مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى حابارلادى.

«ا» توبىنىڭ فينالىندا قازاقستانمەن بىرگە يتاليا، وڭتۇستىك كورەيا مەن كانادانىڭ سپورتشىلارى كۇش سىناستى. بۇل كۆارتەتتە مارە سىزىعىن وڭتۇستىك كورەيا ءبىرىنشى بولىپ قيدى (7:01.850). ال وتانداستارىمىز 7:07.972 ناتيجە كورسەتىپ، كۇمىس جۇلدەگە يە بولدى. قولا مەدال كاناداعا بۇيىردى.

كەشە جارتىلاي فينالداعى العاشقى توپتا قازاقستان، كانادا، قىتاي مەن جاپونيا قۇراماسى 5 شاقىرىمعا جارىسقان بولاتىن. وسى سىندا مارەگە ءبىرىنشى بولىپ 7 مينۋت 9 سەكۋندتتا الاڭ يەلەرى جەتتى. قۇرامىندا ابزال اجىعاليەۆ، نۇرتىلەك قاجىعالي، ءادىل عالياحمەتوۆ پەن دەنيس نيكيشا بار ۇلتتىق قۇراما ولاردان 2 سەكۋندقا قالىپ قويدى.

ەندى الەم كۋبوگىنىڭ كەلەسى كەزەڭى 4-6 قاراشا ارالىعىندا اقش-تىڭ سولت-لەيك-سيتي قالاسىندا وتەدى.

داستان كەنجالين،

استانا