Astanada ústel tennısinen «World Tour Grand Finals» týrnıri ótedi

Jeltoqsannyń 14-17 aralyǵynda Astananyń «Dáýlet» sport kesheninde ústel tennısinen álemdik «World Tour Grand Finals» týrnıri ótedi. Osyǵan baılanysty búgin Ortalyq kommýnıkaııalyq qyzmetinde  buqaralyq aqparat quraldary ókilderine  baspasóz máslıhaty  ótti.

BAQ ókilderiniń basyn qosqan sharaǵa Ústel tennısi federaııasynyń bas hatshysy Serik Qasqabasov, Mádenıet jáne sport mınıstriligi Sport jáne deneshynyqtyrý isteri komıteti tóraǵasynyń orynbasary Serik Jarasbaev pen álemdik «World Tour Grand Finals» týrnıriniń uıymdastyrý komıtetiniń ókili Baqytbek Hamıt qatysty.

Jıynda birinshi bolyp sóz alǵan Serik Qasqabasov aldaǵy ótetin halyqaralyq týrnırdiń mańyzyna toqtaldy.

— Ústel tennısi boıynsha álemdegi eń iri jarystardyń biri sanalatyn «World Tour Grand Finals» týrnıri deńgeıi jaǵynan Olımpıada men álem chempıonatynan keıingi orynda tur. Oǵan álemdik reıtıng boıynsha kósh bastap turǵan úzdik 16 tennısshi ǵana (erler men áıelder) qatysady. Sonymen qatar, juptyq saıysta álemdik týrdyń on eki kezeńinde joǵary upaı jınaǵan sportshylarǵa joldama beriledi. Astanaǵa keletinderdiń arasynda 5 Olımpıada chempıony, 9 álem chempıony ataǵyna ıe bolǵan sportshylar bar, — dedi Serik Seıituly.

«World Tour Grand Finals» týrnıri  bıylǵy jyly ótken 12 kezeńniń qorytyndy jarysy bolmaq. Buǵan deıingi kezeńder Býdapesht (Vengrııa), Nıý-Delı (Úndistan), Inchhon (Ońtústik Koreıa), Panagıýrıshte (Bolgarııa), Olomoý (Chehııa), Stokgolm (Shveııa), Doha (Katar), Tokıo (Japonııa), Chendý (Qytaı), Brısben (Avstralııa), Lın (Avstrııa) jáne  Magdebýrg  (Germanııa) qalalarynda ótti.

Astanadaǵy týrnırdi  álemniń 122 eliniń telearnalary kórsetedi. Barlyq telearnalardyń aýdıtorııasy — 800 mln. adam.