Azııa chempıonaty: eki boksshymyz jeńip, bireýi jeńildi

Bokstan eresekter arasynda Iordanııanyń astanasy Amman qalasynda ótip jatqan Azııa chempıonatynyń ekinshi kúni sharshy alańǵa úsh boksshymyz kóterilip, ekeýi kelesi kezeńge joldama alsa, bireýi jeńildi.

Qazaqstan ulttyq quramasynan jarysty alǵashqy bolyp 57 keli salmaqta  Serik Temirjanov bastady. Ol Túrkimenstan eliniń ókili Ihlas Gylychjanovtan aılasyn asyryp, kelesi aınalymǵa shyqty.  Endi ol shırek fınalda byltyrǵy álem chempıonatynyń kúmis júldegeri ıordanııalyq Iýsef Iashashpen kúsh synasady. Jekpe-jek 6 qarashada bolady.

Sətin salyp alǵashqy kezdesýde jeńdim. Qarsylasym osal emes. Tehnıkasy jaqsy, soqqylary myǵym. Bapkerlerdiń aıtqanyn eki etpeı, jeńiske jettim. Elge altyn medalmen oralýǵa barymdy salamyn, — dedi Serik Temirjanov jekpe-jekten keıin.

63,5 kelidegi Sanatáli Tóltaev ózbektiń ataqty boksshysy Rýslan Abdýllaevtan utylyp qaldy. Osy jerde Sanatáliniń ózbekke laıyqty qarsylas bolǵanyn erekshe aıta ketken jón. Naǵyz fınalda kezdesetin qarsylastar edi. Amal qansha jerebe solaı tústi. О́zbekstan quramasy sapyndaǵy qandasymyz jarysty jalǵastyrady. Osy tusta Azııa chempıonatyna О́zbekstan quramasynda taǵy bir etnıkalyq qazaq – Madııar Saıdrahımovtyń qatysatynyn atap ótken jón.

Úshinshi bolyp sharshy alańǵa shyqqan álem chempıony Sáken Bıbosynov úndistandyq Kýmar Sparshty aıqyn basymdylyqpen utty. Sóıtip, ol keshki sessııada jankúıerlerdi qýantty. Dese de qarsylasy Kýmar Sparsh alǵashqy raýnda alǵa shyqqan. Biraq Səken qalǵan 2 raýndta bar sheberligin pash etti. Esep — 4:1.

Bapkerimniń bar aıtqanyn isteı almaı, jıi qatelestim. Byltyrǵy qurlyq chempıonatynda qola medal alǵanymdy ózderińiz bilesizder. Qazirgi maqsatym — jeńimpaz ataný. Degenime jetip, qazaq jankúıerlerin qýantqym keledi, — dedi Səken Bıbosynov.

Chempıonattyń ekinshi kúni taǵy bir qazaq boksshysy sharshy alańǵa shyqty. Qazir Bahreın namysyn qorǵaıtyn Azat Mahmetov əlem chempıony, japon Tomoe ýboımen kezdesip, onyń osal tusyn taba almady.

Búgin, 3 qarashada ulttyq quramanyń tek bir ókili – eki dúrkin əlem chempıony Nazym Qyzaıbaı qolǵap túıistiredi. Al barlyq chempıon 13 qarashada belgili bolady.

Dastan KENJALIN,

ASTANA

Foto: Aıan TО́LEGEN,

AMMAN