Футболдан әлем чемпионатын қайдан көруге болады?

«Qazaqstan» және «Qazsport» телеарналары футболдан Катарда өтетін әлем чемпионатын тікелей эфирде көрсетеді.

«Qazaqstan» телерадиокорпорациясы 20 қараша мен 18 желтоқсан аралығында Катарда өтетін футолдан әлем чемпионатын көрсету құқығын иеленді. Жанкүйерлер мундиальдың матчтарын «Qazaqstan» және «Qazsport» телеарналарынан тікелей эфирде көре алады. Сонымен бірге qazaqstan.tv және qazsporttv.kz сайты мен «Qazaqstan.tv» мобильді қосымшасы арқылы онлайн трансляция жасалады, — делінген корпорацияның хабарламасында.

ХХІІ әлем чемпионаты Катардың 5 қаласындағы 8 стадионда болады. Трансляциялардан бөлек, бір ай бойы тікелей эфирде арнайы бағдарламалар циклы ұйымдастырылады.

20 қарашадан бастап «Qazaqstan» телерадиокорпорациясының түсірілім тобы Катар стадиондарынан репортаждар ұсынып, тікелей қосылымдарға шығады. Чемпионат кезінде корпорацияның әлеуметтік желідегі парақшаларында жанкүйерлер арасында футбол атрибуттары ойнатылады.

Елімізде ХХІІ әлем чемпионатының ойындарын көрсету құқығы тек «Qazaqstan» республикалық телерадиокорпорациясына тиесілі. Чемпионатты өзге ақпарат көздерінен трансляциялауға, таратуға тыйым салынады. Ел аумағындағы мемлекеттік және жекеменшік ғимараттар мен қоғамдық орындардағы көрсетілімдер де тек «Qazaqstan» және «Qazsport» телеарналарының эфирі арқылы көрсетілуі тиіс.

Ойындарды жүргізетін комментаторлар мен матчтар кестесі жақын уақытта жарияланады.

Катарда футболдан әлем чемпионатына 32 елдің ұлттық құрама командасы қатысады. Олар сегіз топқа бөлінді.

Командалар алдымен сегіз топқа бөлініп, топтық кезеңде ойнайды. Әр топтан үздік шыққан екі құрама 1/8 финалға жолдама алады. Одан кейін қарсыласын жеңген сегіз команда ширек финалға шығады.

А тобы: Катар, Нидерланды, Сенегал, Эквадор;

B тобы: Англия, АҚШ, Иран, Уэльс;

C тобы: Аргентина, Мексика, Польша, Сауд Арабиясы;

D тобы: Франция, Дания, Тунис, Австралия;

E тобы: Испания, Германия, Жапония, Коста-Рика;

F тобы: Бельгия, Хорватия, Марокко, Канада;

G тобы: Бразилия, Швейцария, Сербия, Камерун;

H тобы: Португалия, Уругвай, Оңтүстік Корея, Гана.

Футболдан әлем чемпионаты төрт жылда бір рет өтеді. FIFA шешімімен мундиальды 2026 жылы АҚШ, Канада, Мексика бірігіп ұйымдастырады. Оған 32 ел емес, 48 ел қатысады деп жоспарланған.

Ал 2018 жылғы футболдан әлем чемпионатын Ресей ұйымдастырды. Жартылай финалда Франция Бельгияны 1:0, Хорватия Англияны 2:1 есебімен жеңді.

Финалда Франциядан Хорватия 4:2 есебімен жеңіп, әлем чемпионы атанды.

Тағы бір атап өтетін нәрсе, 20 қараша күні Қазақстан президентігіне кезектен тыс сайлау болады. Осы күні Катарда әлем чемпионаты басталады. Сыртқы істер министрлігінің хабарлауынша, Катарға барған отандастарымыз бен Қазақстанның осы елдегі дипломатиялық мекеменің қызметкерлері елшіліктің жанынан құрылатын №280 сайлау учаскесінде дауыс бере алады.

 

Дастан КЕНЖАЛИН,

АСТАНА