فۋتبولدان الەم چەمپيوناتىن قايدان كورۋگە بولادى؟

«Qazaqstan» جانە «Qazsport» تەلەارنالارى فۋتبولدان كاتاردا وتەتىن الەم چەمپيوناتىن تىكەلەي ەفيردە كورسەتەدى.

«Qazaqstan» تەلەراديوكورپوراتسياسى 20 قاراشا مەن 18 جەلتوقسان ارالىعىندا كاتاردا وتەتىن فۋتولدان الەم چەمپيوناتىن كورسەتۋ قۇقىعىن يەلەندى. جانكۇيەرلەر مۋنديالدىڭ ماتچتارىن «Qazaqstan» جانە «Qazsport» تەلەارنالارىنان تىكەلەي ەفيردە كورە الادى. سونىمەن بىرگە qazaqstan.tv جانە qazsporttv.kz سايتى مەن «Qazaqstan.tv» ءموبيلدى قوسىمشاسى ارقىلى ونلاين ترانسلياتسيا جاسالادى، — دەلىنگەن كورپوراتسيانىڭ حابارلاماسىندا.

ءححىى الەم چەمپيوناتى كاتاردىڭ 5 قالاسىنداعى 8 ستاديوندا بولادى. ترانسلياتسيالاردان بولەك، ءبىر اي بويى تىكەلەي ەفيردە ارنايى باعدارلامالار تسيكلى ۇيىمداستىرىلادى.

20 قاراشادان باستاپ «Qazaqstan» تەلەراديوكورپوراتسياسىنىڭ ءتۇسىرىلىم توبى كاتار ستاديوندارىنان رەپورتاجدار ۇسىنىپ، تىكەلەي قوسىلىمدارعا شىعادى. چەمپيونات كەزىندە كورپوراتسيانىڭ الەۋمەتتىك جەلىدەگى پاراقشالارىندا جانكۇيەرلەر اراسىندا فۋتبول اتريبۋتتارى ويناتىلادى.

ەلىمىزدە ءححىى الەم چەمپيوناتىنىڭ ويىندارىن كورسەتۋ قۇقىعى تەك «Qazaqstan» رەسپۋبليكالىق تەلەراديوكورپوراتسياسىنا تيەسىلى. چەمپيوناتتى وزگە اقپارات كوزدەرىنەن ترانسلياتسيالاۋعا، تاراتۋعا تىيىم سالىنادى. ەل اۋماعىنداعى مەملەكەتتىك جانە جەكەمەنشىك عيماراتتار مەن قوعامدىق ورىندارداعى كورسەتىلىمدەر دە تەك «Qazaqstan» جانە «Qazsport» تەلەارنالارىنىڭ ەفيرى ارقىلى كورسەتىلۋى ءتيىس.

ويىنداردى جۇرگىزەتىن كوممەنتاتورلار مەن ماتچتار كەستەسى جاقىن ۋاقىتتا جاريالانادى.

كاتاردا فۋتبولدان الەم چەمپيوناتىنا 32 ەلدىڭ ۇلتتىق قۇراما كومانداسى قاتىسادى. ولار سەگىز توپقا ءبولىندى.

كوماندالار الدىمەن سەگىز توپقا ءبولىنىپ، توپتىق كەزەڭدە وينايدى. ءار توپتان ۇزدىك شىققان ەكى قۇراما 1/8 فينالعا جولداما الادى. ودان كەيىن قارسىلاسىن جەڭگەن سەگىز كوماندا شيرەك فينالعا شىعادى.

ا توبى: كاتار، نيدەرلاندى، سەنەگال، ەكۆادور;

B توبى: انگليا، اقش، يران، ۋەلس;

C توبى: ارگەنتينا، مەكسيكا، پولشا، ساۋد ارابياسى;

D توبى: فرانتسيا، دانيا، تۋنيس، اۆستراليا;

E توبى: يسپانيا، گەرمانيا، جاپونيا، كوستا-ريكا;

F توبى: بەلگيا، حورۆاتيا، ماروككو، كانادا;

G توبى: برازيليا، شۆەيتساريا، سەربيا، كامەرۋن;

H توبى: پورتۋگاليا، ۋرۋگۆاي، وڭتۇستىك كورەيا، گانا.

فۋتبولدان الەم چەمپيوناتى ءتورت جىلدا ءبىر رەت وتەدى. FIFA شەشىمىمەن مۋنديالدى 2026 جىلى اقش، كانادا، مەكسيكا بىرىگىپ ۇيىمداستىرادى. وعان 32 ەل ەمەس، 48 ەل قاتىسادى دەپ جوسپارلانعان.

ال 2018 جىلعى فۋتبولدان الەم چەمپيوناتىن رەسەي ۇيىمداستىردى. جارتىلاي فينالدا فرانتسيا بەلگيانى 1:0، حورۆاتيا انگليانى 2:1 ەسەبىمەن جەڭدى.

فينالدا فرانتسيادان حورۆاتيا 4:2 ەسەبىمەن جەڭىپ، الەم چەمپيونى اتاندى.

تاعى ءبىر اتاپ وتەتىن نارسە، 20 قاراشا كۇنى قازاقستان پرەزيدەنتىگىنە كەزەكتەن تىس سايلاۋ بولادى. وسى كۇنى كاتاردا الەم چەمپيوناتى باستالادى. سىرتقى ىستەر مينيسترلىگىنىڭ حابارلاۋىنشا، كاتارعا بارعان وتانداستارىمىز بەن قازاقستاننىڭ وسى ەلدەگى ديپلوماتيالىق مەكەمەنىڭ قىزمەتكەرلەرى ەلشىلىكتىڭ جانىنان قۇرىلاتىن №280 سايلاۋ ۋچاسكەسىندە داۋىس بەرە الادى.

 

داستان كەنجالين،

استانا