الماتىدا فۋتبول ارداگەرلەرى دوپ تەپتى

كەزىندە باتىر اتامىز باۋىرجان مومىش ۇلى: «مەنىڭ بويىمدا قايرات كۇشىم تاسىپ تۇرعاندا كارىلەردىڭ تىزىمىنە قوسپاڭدار»، دەگەن ەكەن. ويلاپ قاراساق، باتىر اتامىزدىڭ بۇل ءبىر ايتقان قاناتتى سوزىنە الىپ قوسار ەشنارسە تابىلا قويماس. دەسەك تە از-كەم ءوز ويىمدى قوس كەتسەم دەپ وتىرمىن.

راسىمەن دە ادامنىڭ جاسى 45-50 اسقان سوڭ ءبىز ءوزىمىزدى قارت ساناپ كارىلىكتىڭ نوقتاسىن ۋاقىتىنان بۇرىن باسىمىزعا سالاتىنىمىز وسى نەلىكتەن؟. ءومىردىڭ ءوزى ارپالىس، ايقاستان تۇرادى دەسەك، قوعامدا ءوزىمىزدى ەڭسەمىزدى تۇسىرمەي بەلدى بۋىپ، بەلسەنە ءومىر كەشكەنگە نە جەتسىن. اسپان استى ەلىنە قىتايعا بارعان ءبىر ساپارىمدا جاستارى 80-90 جەتىپ قالعان قاريالار كوشەدە تۇرىپ ءتۇرلى جاتتىعۋلار جاساپ نە بولماسا جۇگىرىپ بارا جاتقانىن كورىپ تاڭعالعان ەدىم. ولاردىڭ بۇل جاتتىعۋلارىنا ەشكىم قاراپ تا جاتقان جوق. ويتكەنى، قالىپتى جاعداي دەپ قارايدى. ال، بىزدە كوشە بويىندا ەمەس ارنايى جاتتىعۋ زالدارىنا بارىپ، جاتتىعىپ جاتقان ەگدە ادامداردى كەزدەستىرۋ نەكەن-ساياق دەپ ايتۋعا بولادى. مۇمكىن ءبىزدىڭ قازاق ءۇشىن ەرسى نارسە شىعار. بىراق دەنساۋلىق قيمىل –قوزعالىستان تۇراتىنىن ۇمىتپاساق ەكەن. ءيا، دەنساۋلىق – ادام ءۇشىن تاپتىرماس زور بايلىق. باسقانىڭ بارلىعى وتپەلى-كەتپەلى دۇنيە.

بۇگىن الماتى ماڭىنداعى وتەگەن كەنتىندە ارداگەرلەر اراسىندا احمەت داۆىد ۇلى دەگەن ازاماتتى ەسكە الۋعا ارنالعان جارىس بولىپ ءوتتى. ءيا، جارىستىڭ قالاي وتكەنى تۋرالى الدا ايتارمىن. الدىمەن وسى تۋرنيرگە كەلىپ قاتىسقان ارداگەر سپورتشىلار تۋرالى ءسوز ەتكىم كەلىپ وتىر. ويتكەنى، جوعارىدا ايتقانىمداي، ولار — فۋتبول ارقىلى دەنساۋلىقتارىن بايىتىپ، بەرەكەسىن كورىپ جۇرگەن جاندار. وسى جارىسقا كەلگەن ارداگەر فۋتبولشىلاردىڭ بارلىعى دەرلىك اپتاسىنا ءۇش رەت فۋتبول الاڭدارىندا دوپ قۋالاپ، دەنساۋلىقتارىن شىڭداپ، سالاۋاتتى ءومىر سالتىن ۇستانىپ جۇرگەن كوماندالاردىڭ وكىلدەرى. قايسىبىرىنەن سۇراساڭ دا ولار فۋتبولدى ومىرلەرىنىڭ باستى تىرەگى دەپ قارايتىنىن، جۇگىرۋ ارقىلى دەنساۋلىقتارىن جاقسارتىپ، ءبىر جاعى باستارى قوسىلىپ شەر تارقاسىپ قايتاتىندىقتارىن شەشىلە ايتىپ بەرەدى. سوندىقتان دا وسىنداي تۋرنيرلەر ارداگەرلەر ءۇشىن ۇلكەن مەرەكە ءارى دەنساۋلىق دەپ بىلەدى.

جاستارى كەيبىرىنىڭ 70-تەن اسسا دا الاڭدا 20-داعى جىگىتكە الدىرمايدى. قيمىلدارى ءابجىل، ويىن تەحنيكالارى، شەبەرلىكتەرىنە قۇرمەتپەن قاراپ قول سوعارلىقتاي. بۇگىنگى جارىسقا ىلە اۋداننىڭ ءار ايماعىنان 5 كوماندا كەلىپ قاتىستى.

جارىستى ۇيىمداستىرۋعا ۇيىتقى بولىپ جۇرگەن قازاق سپورت جۋرناليستيكاسىندا ءوز ورنى بار، بەلگىلى جۋرناليست ءالىم اناپيانوۆ اعامىزدىڭ ايتۋىنا قاراعاندا ، بۇل جارىس الداعى جىلى داستۇرلىك ەتىپ وتكىزىلمەكشى.

حوش، سونىمەن، كۇنى بويى الاڭدا جەڭىس ءۇشىن شۇمەكتەپ تەر توگىپ، جانىن سالعان ارداگەر ويىنشىلاردىڭ اراسىنان ءبىرىنشى ورىندى جۋىردا عانا بەلگىلى سپورت كوممەنتاتورى دياس وماروۆتىڭ اتىنداعى ءدۇبىرلى جارىستىڭ جەڭىمپازى اتانعان «وتەگەن كەنتى» كومانداسى جەڭىپ السا، ەكىنشى ورىندى سايفۋددين، دارحان، قانات، باقىتجان، ءازيز سىندى سايدىڭ تاسىنداي ساقا فۋتبول ارداگەرلەرى بار «قارعالى» كومانداسى يە بولدى. ءبىر ايتا كەتەر ءجاي، وسى اتتارى اتالعانداردىڭ اراسىندا دارحان، قانات، سايفۋددين سەكىلدى ارداگەر سپورتشىلار سوناۋ 1986 جىلعى قاندى جەلتوقسان كوتەرىلىسىندەگى ايازدى، ازاپتى تۇندە شوۆينيستىك رەجيمگە قارسى شىعىپ، تاۋەلسىزدىگىمىزدى جەڭىپ اپەرۋگە ۇلەس قوسقان قاhارماندار.

سونىمەن، جارىس سوڭىندا جەڭىمپازدار مەن جۇلدەگەرلەر ۇيىمداستىرۋشىلاردىڭ ازىرلەگەن كۋبوك، ديپلومدارىمەن ماراپاتتالدى. سونىمەن قاتار، «ۇزدىك قورعاۋشى»، «ۇزدىك قاقپاشى»، «ۇزدىك ويىنشى»، «ۇزدىك شابۋىلشى» نوميناتسيالارى بويىنشا ارداگەر ويىنشىلارعا باعالى سىيلىقتار تابىس ەتىلدى. مەندە ۇيگە قۇر قول قايتپاي اللا ءناسىپ ەتىپ، «ۇزدىك شابۋىلشى» ماراپاتىن الىپ قايتتىم. ەلىمىزدە وتكەن سايلاۋ كۇنى جانە بۇگىن كەشكە كاتاردا جالاۋى جەلبىرەيتىن فۋتبولدان الەم چەمپيوناتىمەن بىرگە ءدوپ كەلگەن ارداگەرلەر جارىسى تاماشا كوڭىل-كۇيدە بولىپ ءوتتى. ارداگەرلەردىڭ ايتۋلى دوپ دوداسىنان العان اسەرلەرى كەرەمەت. الداعى جىلى بۇل ءتۋرنيردىڭ گەوگرافيالىق جاعدايى جاقسارا تۇسەتىنى تۋرالى ۇيىمداستىرۋشىلار تىلگە تيەك ەتە كەتتى. جارىس سوڭىندا قاتىسۋشىلارعا داستارحان جايىلىپ، تۋرنير يەسى احمەت مارقۇمدى ەسكە الىپ قۇران وقىلدى.

اقىن ورداباي ۇلى،

الماتى