يسپانيا قۇراماسىنا جاڭا باس جاتتىقتىرۋشى تاعايىندالدى

فۋتبولدان يسپانيا قۇراماسى الەم چەمپيوناتىندا شيرەك فينالعا شىعا الماي قالعاننان كەيىن ونىڭ باس جاتتىقتىرۋشىسى الماستى.

يسپانيا فۋتبول فەدەراتسياسى ەلدىڭ ۇلتتىق قۇراماسى باس جاتتىقتىرۋشىسىنىڭ ورىنتاعىنا لۋيس دە لا فۋەنتە تاعايىندالعانىن مالىمدەدى.

كاتاردا ءوتىپ جاتقان الەم چەمپيوناتىنىڭ ءبىرىنشى ويىنىندا كوستا-ريكا كومانداسىن 7:0 ەتىپ، ويسىراتا ۇتىپ، دوپ دوداسىن تابىستى باستاعان «قىزىل فۋريا» بۇدان كەيىن بىرتىندەپ بوجىراي بەردى. ونىڭ پلەي-وفف كەزەڭىنە ماروككو قۇراماسىمەن ويىنى شىنىندا وتە ناشار بولدى. بارىنشا سۇرەڭسىز وتكەن ماتچتا يسپاندار قارسىلاستارىن ۇتىپ كەتەتىندەي ىنتا دا، شەبەرلىك تە كورسەتە الماي، اقىرىندا پەنالتي سەرياسىندا ماسقارا بولىپ ۇتىلدى. ولاردىڭ العاشقى ءۇش فۋتبولشىسى قارسىلاستار قاقپاسىن ءدال كوزدەي المادى. ەسەسىنە، ءبىر رەت قانا ءمۇلت كەتكەن ماروككولىقتار ءۇش رەت توردى بۇلك ەتكىزىپ، ءوز مەرەيلەرىن ۇستەم ەتىپ شىعا كەلدى.

ءسويتىپ، يسپانيا قۇراماسى شيرەك فينالعا شىعا المادى. وسى ءۇشىن باس جاتتىقتىرۋشى لۋيس ەرنيكە ەلگە كەلگەسىن بىردەن قىزمەتىنەن بوساتىلدى.

ونىڭ ورنىنا كەلىپ جاتقان لۋيس دە لا فۋەنتە بۇرىن يسپانيانىڭ جاسوسپىرىمدەر مەن جاستار قۇرامالارىندا جۇمىس ىستەگەن. ول ەندى ءوزىنىڭ جاڭا مىندەتىنە الەم چەمپيوناتى اياقتالعاننان كەيىن كىرىسەدى. ونىڭ قول استىنداعى يسپانيا قۇراماسى 2020 جىلى توكيودا وليمپيالىق ويىنداردىڭ كۇمىس جۇلدەگەرى اتاندى.

سەرىك ءپىرنازار،

قىزىلوردا