Dınara Sádýaqasova – jyldam shahmattan álem chempıonatynyń kúmis júldegeri!

Búgin Dınara Sádýaqasova Almatyda shahmattan ótip jatqan álem chempıonatynda kúmis júldeger atandy. Ol shahmattyń rapıd túrinen ekinshi orynǵa ıe boldy. Bul týraly Sportty damytý dırekııasynyń baspasóz qyzmeti habarlady.

Dınara Sádýaqasova men qytaılyq Tan Chjýnı 11 týrdan keıin 8,5 upaı jınap, taı-breıkte oınady. Sheshýshi kezdesýde Tan Chjýnıdiń mereıi ústemi tústi. Al qola júlde úndistandyq Savıta Shrıge buıyrdy.

«Alǵashqy jarys kúninen keıin Dınara 4 teń oıynmen týrnır kestesiniń ortasynda kele jatqan. Alaıda búgin qarqynyna-qarqyn qosyp, 6 oıynda qatarynan jeńiske jetti.

Qalǵan qazaqstandyq shahmatshylardan Jansaıa Ábdimálik besinshi, Alýa Nurmanova – 23-shi, Ámına Qaıyrbekova – 26-shy, Bıbisara Asaýbaeva 29-orynǵa taban tiredi. Sondaı-aq alǵashqy kúni mamandardy tańǵaldyrǵan jas shahmatshymyz Zeınep Sultanbek 31-shi, Zarına Nurǵalıeva 35-shi satyǵa turaqtady», — delingen habarlamada.

Byltyrǵy Polshanyń astanasy Varshavada ótken álem chempıonatynda 18 jastaǵy otandasymyz Bıbisara Asaýbaeva dál osy rapıd shahmattan kúmis júldege ıe bolǵan.

Álem chempıonaty 30 jeltoqsanda aıaqtalady. Barlyq nátıjeni Worldrapidandblitz2022.fide saıtynan kóre alasyzdar.