ۋنيۆەرسيادا: قازاقستان قورجىنىنا ەكىنشى التىن مەدال ءتۇستى

بۇگىن اقش-تىڭ لەيك-پلەسيد قالاسىندا ءوتىپ جاتقان قىسقى ۋنيۆەرسيادادا قازاقستان قۇراماسىنىڭ قورجىنى تاعى ءبىر التىن مەدالمەن تولىقتى. تۇعىردان سەكىرۋ جارىسىندا دانيل ۆاسيلەۆ قارسىلاس شاق كەلتىرمەي، ۋنيۆەرسيادانىڭ چەمپيونى اتاندى.

وتانداسىمىز كىشى ترامپليندە (ك-90) 257.3 ۇپاي جينادى. العاشقى مۇمكىندىگىندە 127.2 بالل، ال فينالدا 130.1 ۇپايعا يە بولدى.

قالعان قوس مەدال اۆستريالىق اتلەتتىڭ ەنشىسىندە. كۇمىس جۇلدە ماكسيميليان لينەرگە، قولا مەدال تيمون پاسكال كاحوفەرگە بۇيىردى.

تاعى ءبىر سپورتشىمىز سەرگەي تكاچەنكو جەتىنشى، نيكيتا دەۆياتكين توعىزىنشى، سۆياتوسلاۆ نازارەنكو 21-ءشى، ماعجان امانگەلدى ۇلى 22-ساتىدان كورىندى.

سونداي-اق، كەشە مانەرلەپ سىرعاناۋشى ميحايل شايدوروۆ جۇلدەگە ءبىر تابان جەتپەي قالدى. ول قىسقا باعدارلامادا التىنشى، ال ەركىن باعدارلامادا ءۇشىنشى ناتيجە كورسەتىپ، جالپى 231،08 ۇپاي جينادى. قولا مەدال ءۇشىن تالاستا ميحايل قارسىلاسىنان 0،25 ۇپاي از الدى. مانەرلەپ سىرعاناۋدان ەرلەر اراسىنداعى جارىسقا 19 ەلدىڭ 31 سپورتشىسى قاتىستى.

قازىر قازاقستان دەلەگاتسياسى ەكى التىن مەدالمەن جالپى ەسەپتە التىنشى ورىنعا كوتەرىلدى. ۋنيۆەرسيادا 22 قاڭتارعا دەيىن جالعاسادى.

شامكەن بايىربەك،

استانا