Универсиада: Қазақстанның қоржыны бір алтын, бір қола медальмен толықты

Биатлоншы Бекентай Тұрлыбеков АҚШ-та өтіп жатқан Қысқы универсиадада 10 шақырымға спринт жарысында чемпион атанды.

Жарыс барысында ол екі атыс сызығында бірде-бір оқты бос жіберген жоқ. Нәтиже көрсеткен уақыты – 27:51,5. Осылайша биатлоншы ел құрамасына үшінші алтынды салды.

Аталған жарыста екінші орын Бьорн Уэстервелтке бұйырса, үшінші орынға тағы бір отандасымыз Александр Мухин ие болды. Нәтижесінде Универсиадада ел құрамасы 1 алтын, 1 қола медаль алды.

Бұған дейін биатлоншы Вадим Куралес пен шаңғымен секіру спортынан Данил Васильев чемпион атанған болатын.

Осылайша, медальдар кестесінде қазақстандық спортшылар 3 алтын, 1 қола жүлдемен 3-орынға көтерілді. Алда Жапония және Финляндия құрамалары келеді.

Динара ҚАЛИЕВА,

АСТАНА